Bango ndo ti Nzapa na ndo ti akuâ

A YEKE ye ti mungo vundu na zo mingi tongana mbeni zo so mo ndoye lo akui. Aye so ayeke si na zo na pekoni ayeke kota mingi: nzara ti gigi asigigi na yâ ti lo kue, lo bâ tele ti lo gi lo oko, na lo bâ so mbeni ye amanke lo mingi. Tënë ti kuâ ti mbeni zo ti lo alingbi ti sala si lo bâ tele ti lo so lo lingbi ti sala ye oko pëpe, teti biani atâa kota ti mosoro, wala ngangu ti lo kue, zo oko laso alingbi pëpe ti kiri na mbeni zo so akui awe na fini.

Ye oko, Wasalango e abâ ti lo aye ni tâ nde mingi. Teti so lo leke lani kozo zo na pupu-sese, lo yeke nga na ngangu ti kiri ti leke mbeni zo so akui awe. Teti tënë so, Nzapa alingbi ti bâ ala so akui awe tongana azo so angbâ na fini. Na salango tënë ti awakua be-ta-zo ti giriri so akui awe, Jésus atene: “Na lê ti [Nzapa] ala kue ayeke na fini.”​—Luc 20:38, NW.

Na ngoi so lo de na sese, Jésus ayeke lani na ngangu ti zingo azo na kuâ (Jean 5:21). Ni la, bango ndo ti lo ague oko na ti Babâ ti lo na ndo ala so akui be-ta-zo. Na tapande, tongana mbeni ndeko ti lo Lazare akui, Jésus atene na adisciple ti lo: “Mbi gue ti zingo lo [na lango].” (Jean 11:11). Na lê ti azo, Lazare akui awe, me na lê ti Jéhovah na ti Jésus, Lazare ayeke lango gi langango.

Na gbe ti komandema ti Royaume ti Jésus, fade “londongo ti [akuâ] kue” ayeke duti dä, “azo ti mbilimbili, na azo ti kirikiri.” (Kusala 24:15). Na nda ni, ala so a zingo ala na kuâ ayeke wara fango ye so alondo na Nzapa, nga beku ti ngbâ na fini teti lakue lakue na ndo sese.​—Jean 5:28, 29.

Biani, kuâ ti mbeni zo so mo ndoye mingi alingbi ti mû vundu mingi na mo, so alingbi ti ngbâ na bê ti mo teti angu mingi. Ye oko, tongana e bâ ala so akui awe na bango ndo ti Nzapa, ye so alingbi ti dë bê ti e mingi na ti mû beku na e ngangu.​—2 aCorinthien 1:3, 4.