Salango kusala na mbeni yanga so ayeke nde na Corée

MBENI groupe so asala ye na wâ, me so ayeke kpô abungbi lani na ngoi ti mbeni assemblée ti district ti aTémoin ti Jéhovah na ngu 1997. A yeke lani kozo kota bungbi ti district teti awambongi na kodoro ti Corée. A wara wungo ti azo 1 174 so aga na kota bungbi ni. A sala akapa ni kue tongana adiskur, ahundango tënë, na drame na yanga ti awambongi ti Corée, na a sigigi na lê ti mbeni kota télé so azo kue so ayeke na yâ Da ti Assemblée ni alingbi ti bâ. A yeke lani mbeni kongo nda ti ngangu kua so azo mingi so amû tele ti ala senge asala teti angu mingi.

Ngoi ayeke ga so fade, na ndo sese so ayeke ga paradis, “mê ti awambongi alungula”. (Esaïe 35:5). Ti duti na fini na yâ Paradis so, a lingbi kozoni zo oko oko nga na awambongi alï na yâ paradis ti yingo, nzoni dutingo na lege ti yingo ti awakua ti Nzapa so ayeke na ngia. A lingbi ala ga aTémoin ti Jéhovah so amû tele ti ala na Nzapa, ala wara batême, na ala zia si lo fa ye na ala.​—Michée 4:1-4.

Akete tongo nda ni

Atâa so a to nda ti fa tënë na awambongi na yâ ti angu 1960, a yeke gi na yâ ti angu 1970 si mbeni kete wungo ti awambongi ato nda ti gue na abungbi ti aTémoin ti Jéhovah na Séoul, li-kodoro ti Corée. Mbeni ita-koli Chrétien so alingbi ti sû mbeti hio asala lani kusala na mbeni tableau ti sû na ndo ni angbongboro tënë ti adiskur ni nga na aversê so a sala kusala na ni.

Na ngu 1971, na gbata ti Taejon, mbeni Témoin so ayeke na mbeni molenge ti koli so ayeke wambongi ato nda ti fa na lo nga na akamarade ti lo so ala nga ayeke awambongi, tokua ti Royaume. Ambeni zo so ayeke na wâ na yâ ti groupe so aga fadeso angangu zo so asala kusala mingi na popo ti azo so atene yanga ti awambongi.​—Zacharie 4:10.

Amaseka so amû tele ti ala na bê ti ala mveni

Ti tene awambongi awara hingango ye ti Jéhovah na ti Jésus, na tongaso ala mû lege ti fini, a yeke hunda ti wara ambeni zo mingi so ayeke mû tele ti ala senge ti sala ngangu (Jean 17:3). Ti sala kusala so, ambeni Témoin ti Jéhovah mingi amanda yanga ti awambongi na ala wara adeba nzoni na lege ti apendere ye so.

Park In-sun, mbeni maseka ti ngu 15, azia ândö na gbele lo ti manda yanga ti awambongi. Ti sala ni, lo ga mbeni zo ti mandango ye na yâ ti mbeni ndokua, so na yâ ni, awambongi 20 ayeke sala kusala dä. Lo sala kua ndulu na ala teti anze miombe gi ti manda yanga ti ala nga lege so ala yeke bi bê na ni. Na ngu ti peko, lo ga pionnier permanent wala wafango tënë ti Royaume ti ngoi kue, lo sala lani kusala na mbeni groupe ti awambongi so tâ tënë ti Bible anzere na ala. Groupe ni ague na li ni hio mingi, na a ninga mingi pëpe azo ahon 35 ague lani na abungbi so ayeke sala na dimanche.​—Psaume 110:3.

Na pekoni, ti fani oko ni na Séoul, a leke ti sala abungbi ti aChrétien gi na yanga ti awambongi. Ita Park In-sun asala kusala tongana pionnier spécial na yâ groupe so yâ ni akiri akono. Lo hinga fadeso tâ yanga ti awambongi ni awe. Na yâ ti ambeni nze, lo manda Bible na awambongi 28. Mingi na popo ti ala ague na li ni na aga aTémoin ti Jéhovah.

Tongana ye ti peko ti kusala so a sala na wâ nga na bê kue, na octobre 1976, a zia na Séoul kozo kongregation na yanga ti awambongi, so a wara na yâ ni awafango tënë 40 na apionnier permanent 2. Ye so asala si kusala na yâ ambeni gbata ti Corée amaï. Awambongi mingi ayeke na nzara ti nzo tënë na ayeke ku ti tene a sala vizite na ala.

Salango kusala na popo ti awambongi

Mo lingbi ti hunda tele ti mo tongana nyen a yeke wara awambongi ni. Mingi ni, a yeke gi ala mveni si ayeke tene na amba ti ala. A yeke ga nga ndulu na tele ti amveni ti amagazin ti loso, na ala mû iri nga ndo so a lingbi ti wara awambongi ni dä. Ambeni ndokua ti ngorogbia ayeke mû maboko na mungo mara ti sango tongaso. Kota kusala so a sala na yâ vaka so awambongi alango dä ague na li ni mingi, si na pekoni, a zia na sese akongregation ti yanga ti awambongi osio. A wa amaseka mingi so ayeke Chrétien ti manda yanga ti awambongi.

Biröo ti filiale ti aTémoin ti Jéhovah atokua apionnier spécial so amanda lani yanga ti awambongi ti sala kusala na akongregation ni. A ninga pëpe atokua ambeni ita-koli so asala Ekole ti Formation Ministérielle na akongregation so, na ala kpengba ala na lege ti yingo.

Akpale ayeke dä so alingbi ti hon ndo ni. Ti sala kusala na popo ti awambongi, a hunda ti sala ngangu ti gbu nda ti lege ti salango ye ti ala. Na lege ti bibe nga na ti salango ye, ala yeke azo so asala ye gi polele. Ngoi na ngoi, ye so ayeke dö bê ti azo na a lingbi ti sala si ala yeke mä yâ ti salango ye ti awambongi ni nzoni pëpe. Na ndo ni, tongana aTémoin ayeke manda Bible na awambongi, mingi ni a hunda ti mû maboko na ala ti hinga tâ nzoni yanga ti ala ni nga ti wa ala ti sala si yâ ti kapa ti ala ti dikongo ye na ti mandango ye akiri akono.

Na yâ akusala ti ala ti lâ oko oko, awambongi ayeke wara akpale so azo mingi ahinga ni nzoni pëpe. Fani mingi, ala yeke wara akota kpale ti fa ye so ala ye na andokua ti ngorogbia, ando ti kaïngo kobela na ti vongo nga na kango ye. Teti so aTémoin so ayeke ndulu na akongregation ti ala amû na ala maboko na lege ti ndoye, awambongi awara tâ songo ti aita na yâ kongregation ti aChrétien.​—Jean 13:34, 35.

Fango tënë na alege kue so azi aga na aye ti nzoni

Na Pusan, mbeni kota gbata ti lutingo ti amangboko na mbo ngo ti Corée, mbeni ita atingbi lani na awambongi use so asû na ndo mbeni mbeti: “E ye paradis. E ye ti hinga aversê so asala tënë na ndo fini ti lakue lakue.” Ita ni asû na ndo mbeti ndo so lo lingbi wara ala dä na lo leke ti sala vizite na ala. Tongana lo gue, lo wara gbâ ti azo so ayeke ku kungo ti mä tokua ti Royaume. Ye so apusu lo ti to nda ti manda yanga ti awambongi. Ngoi kete na pekoni, a zia na sese mbeni kongregation na yanga ti awambongi na Pusan.

Mbeni ita ti kongregation ti Pusan abâ awambongi use so ayeke sala lisoro na popo ti ala. Lo ga ndulu na ala. Na bango so ala londo na mbeni bungbi ti lege ti vorongo, lo hunda na ala ti gue na bungbi na Da ti Royaume na ngbonga use ti peko ti midi ti oko lango ni. Ala ga na bungbi ni na a to nda ti manda Bible na ala. Kete ngoi na pekoni, awambongi 2 so ague na kota bungbi ti district na akamarade ti ala awambongi 20. Na popo ti groupe so, ambeni amû tele ti ala na Jéhovah. Azo use aga a-ancien nga mbeni oko serviteur ti mungo maboko na yâ akongregation ti yanga ti awambongi.

A futa ngangu so ala ngbâ ti sala

Teti so ambeni wambongi ni alango yongoro na akongregation ti yanga ti awambongi, fani mingi, a hunda kota ngangu nga na lekengo na bê ti mû lakue na ala kobe ti yingo so alondo na yâ Bible. Na tapande, mbeni koli ti ngu 31 ayeke sala kusala ti gingo susu na tele ti mbeni zoa ti bata na fini ti lo. Lo mä lani tokua ti Bible na lege ti ngambe ti lo so aTémoin ti Jéhovah awara tele na lo. Na salango ngangu ti kaï nzara ti aye ti yingo so atia lo, wagingo susu so ayeke mbeni wambongi atambela akilomètre 16 na bateau ti gue na gbata ti Tongyoung so aduti na yanga ti ngu na mbage ti mbongo ti Corée. Lo ye lani ti tingbi na mbeni pionnier spécial ti kongregation ti yanga ti awambongi ti gbata ti Masan. Na lundi oko oko, pionnier spécial so ayeke sala akilomètre 65 gi ti gue ti manda Bible na wagingo susu so mê ti lo akanga.

Ti gue na bungbi ti dimanche na gbata ti Masan, wambongi ni ayeke sala akilomètre 16 na bateau. Na pekoni lo mû bus ti kiri ti sala mbeni kilomètre 65. Lo wara aye ti nzoni na lege ti ngangu so lo sala. Na yâ ambeni kete nze, lo gue na li ni na yâ mandango yanga ti awambongi, lo manda ambeni kode ti sungo mbeti na yanga ti Corée, na mingi ahon so kue, lo manda oko lege ti lë songo na Jéhovah. Tongana lo bâ nene ti gue na abungbi nga na ti fa tënë lakue, lo zia ndo so lo yeke dä ti gue na ndo so kongregation ti yanga ti awambongi ayeke dä. A yeke lani kete ye? Oko pëpe. Lo zia kusala ti lo ti gingo susu ni, so nze oko oko ayeke ga na lo 2 318 000F CFA. Ye oko, a futa ngangu so lo sala. Na peko ti so lo gue na li ni na yâ tâ tënë, lo mû batême, na fadeso lo yeke na ngia ti sala na Jéhovah na tele ti sewa ti lo.

Kiringo na peko ti ambeti na yanga ti awambongi

Fani mingi, a yeke fa nzo tënë ti Royaume na yanga. Ye oko, ti fa peko ti tokua so alondo na Tënë ti Nzapa tâ na lege ni, a yeke nzoni a fa afango ye ti Bible na mbeni lege so ayeke ninga. Tongaso, na kozo siècle, angangu koli biazo so ahinga ndo mingi asû abuku nga na ambeti (Kusala 15:22-31; aEphésien 3:4; aColossien 1:2; 4:16). Na ngoi ti e, a yeke mû kobe ti yingo so asi singo na lege ti abuku na ambeni mbeti ti aChrétien. A yeke kiri pekoni na ayanga ti kodoro ndulu na 380 nga na ayanga ti awambongi nde nde. Ti kiri peko ti ambeti na yanga ti awambongi ti Corée, biröo ti filiale ayeke na mbeni ndo ti kiringo na peko ti ambeti na yanga ti awambongi. Mbeni ndo ti salango akasete vidéo ayeke sigigi na avidéo na yanga ti awambongi. Ye so ayeke mû kobe ti yingo na awafango nzo tënë so ayeke awambongi nga na azo so asala nzara ti tâ tënë na yâ akongregation ti Corée kue.

Atâa so aita mingi ahinga tâ kode ti tenengo yanga ti awambongi na ayeke mû maboko na lekengo akasete vidéo, mingi ni, a yeke amolenge so ababâ na mama ti ala ayeke awambongi si ayeke tâ anzoni wasungo peko ti ambeti ni. Ala manda ândö yanga ti awambongi na ngoi so ala ngbâ kete. Ala yeke fa peko ti tënë na yanga ti awambongi ni gi pëpe tâ na lege ni, me ala yeke mû nga nda ti tënë so alondo na bê, na a yeke gboto lê na ndo tokua ni na lege ti ageste nga na lê ti ala, na tongaso a yeke ndu bibê nga na bê ti azo.

Tongana ti so e bâ, a yeke sala fadeso akota bungbi lakue na yanga ti awambongi na kodoro ti Corée. A hunda gbâ ti akua, nginza, na ngangu ti sala ni. Ye oko, azo so aga ayeke na bê ti kiri singila teti lekengo ye so. Na peko ti hunzingo ti akota bungbi so, azo mingi aye ti gue hio pëpe, me ti ngbâ ti lë songo na aChrétien na ti kiri ti sala lisoro na ndo pendere kobe ti yingo so a mû. A yeke polele so salango kusala na groupe so ayeke nde ayeke na akpale ti lo. Ye oko, adeba nzoni ni na lege ti yingo alingbi na ni.

[Foto na lembeti 10]

Akasete vidéo na yanga ti awambongi so a sala na kodoro ti Corée: “Ye Wa Nzapa Ahunda na E?”, “E Bâ na Nene ni Ye ti Yingo so E Wara Tongana Ye ti Héritier”, “Atapande ti Gbotongo Mê teti Ngoi ti E”, na “Yekia Ngangu ti Komande ti Jéhovah”

[Afoto na lembeti 10]

A to nda ni na gbe ni ti gue na nduzu na mbage ti koti: Akasete vidéo na yanga ti awambongi so ayeke leke ni na filiale ti Corée; mandango peko ti yanga ti awambongi teti atënë so andu Royaume; bungbi ti azo ti kiringo peko ti atënë na yanga ti awambongi; mungo maboko na zo so atene yanga ti awambongi na ngoi ti sigingo na mbeni kasete vidéo