Tondo ti awafango tënë ti Royaume
A mû maboko ti ngbâ ti bâ mênë na nene ni
NA NDO sese kue, awakua ti Jéhovah afa na gigi dutingo be-biani na Nzapa na ndo bango mênë na nene ni (Kusala 15:28, 29). Bungbi ti ngbâa be-ta-zo na ti ndara amû maboko na songo ti aita Chrétien (Matthieu 24:45-47). Zia e bâ peko ti ye so asi na kodoro ti Philippines.
Filiale ti Philippines atene: “Na ngu 1990, a fa na e so awatokua so alondo na Béthel ti Brooklyn ayeke ga ande ti sala mbeni bungbi ge na Philippines. A tisa aita-koli ti ambeni filiale oko oko ti Asie tongana filiale ti Corée, ti Taiwan, na ti Hong Kong ti ga na bungbi so. Nda ti bungbi ni ayeke lani ti mû maboko na ala ti zia na yâ afiliale ti ala Ndokua ti sango na ndo ada-nganga na ti zia nga na sese aKomite so abâ lege ti songo na ada-nganga. Na Philippines, a zia lani kozoni na sese akomite ni na yâ ti akota gbata osio.” A lingbi akomite ni asala ngangu ti wara adocteur so ayeke ndulu ti sala kusala maboko na maboko na e na ndo bango ndo ti Chrétien na ndo mênë. Ala lingbi nga ti mû maboko na aita na ngoi so akpale ti mênë alondo.
A soro lani Remegio ti sala kusala na yâ Komite so abâ lege ti songo na ada-nganga ti Baguio. Tongana ngoi ayeke hon, adocteur ni ato nda ti bâ anzoni ye ti kusala ti komite ni. Remegio adabe ti lo so, na mbeni ngoi, mbeni wungo ti adocteur so asala bungbi na Komite so abâ lege ti songo na ada-nganga aye ti hinga lege ti sava aTémoin so ake ti mû mênë. Remegio atene: “Adocteur ni ato nda ti hunda lani ahundango tënë. Ye oko li ti mbi amû wâ ngbanga ti so ahundango tënë ni andu mingi akode ti kaïngo kobela.” Lo sambela lani Jéhovah ti wara mungo maboko ti hon ndo ti kpale so. Remegio akiri atene: “Na peko ti hundango tënë oko oko, ambeni docteur ni ayä maboko ti ala na nduzu na ala fa tongana nyen ala hon lani ndo ti mara kpale tongaso.” Remegio ayeke lani na ngia ndali ti mungo maboko so, mbilimbili teti so ngoi ti ahundango tënë na akiringo tënë aninga teti angbonga use.
Fadeso a yeke wara akomite 21 na yâ kodoro ni kue nga na wungo ti aita 77 so asala kusala na yâ ni. Danilo, mbeni Témoin so ayeke docteur atene: “Adocteur ni abâ so aTémoin so tele ti ala aso awara mungo maboko ti mbeni bungbi so abâ ndo na ndo ti ala na lege ti ndoye.” Mbeni docteur aye lani pëpe ti opéré mbeni ita-koli teti so ita ni aye ti mû mênë pëpe. Ye oko, ita ni angbâ lakue ti ke. A opéré ita ni na a tambela nzoni. Ndokua ti sango na ndo ada-nganga atene: “Bê ti docteur ni adö mingi ti bâ so ita ni awara nzoni seni. Lo tene: ‘Na ndo ti ye so asi ge, tongana ambeni zo ti ala aye ti tene a opéré ala tongaso, so a hunda ti mû mênë pëpe, fade bê ti mbi ayeke na ngia ti sala ni.’ ”