Mbeni fango tënë so zo alingbi biani ti girisa ni pëpe

“Lâ ayeke sû tâ ngangu. Kete lege so e mû na popo ti ahoto ayeke hon gi hongo mo bâ mo tene ayeke hunzi lâ oko pëpe. Na pekoni so e hon gbâ ti aye so alingbi fade ti kanga lege na e, na nda ni, e si na ndo so e ye fade ti si dä: a yeke kete kodoro so ayo na gbata ni ahon tanga ti akete kodoro ni kue. Atâa so e nze kue, e wara tâ ngia tongana e pika kozo yanga-da ni na a yamba e nzoni. Na nda ti lango ni, e kangbi ambeti so kue e ga na ni, na e to nda ti manda Bible na azo mingi. Azo ni ayeke ndulu ti manda ye. Fadeso, ngbonga ni alingbi awe ti tene e kiri na ndo ti e, me e mû zendo so fade e yeke kiri ti ga ti peko.”

MARA ti atapande tongaso asi fani mingi na mbeni bungbi ti apionnier ti Mexique. Apionnier so aye ti sala kue ti mû mbage ti ala na gango tâ tënë ti tokua so Jésus Christ amû na adisciple ti lo: “Fade i ga atémoin ti Mbi . . . juska na nda ti sese kue.” (Kusala 1:8). Na Mexique, a leke ambeni kapa ti fango tënë so ayeke nde, na so a hiri ni kapa ti fango tënë ti apionnier, ti mû lege ti fa tënë na yâ aterritoire wala ando so a mû ni pëpe na mbeni kongregation, na so a yeke fa tënë ti Royaume ti Nzapa dä lakue lakue pëpe. Mingi ni, a yeke ando so ayo mingi wala so a yeke ngangu ti si dä. A leke nga ti mû maboko na akongregation so ayeke gi ala oko na ambeni ndo yongoro, na so territoire ti ala akono mingi.

Ti mû lege ti hinga aterritoire wa ti kodoro ni a yeke fa tënë dä na ngoi ti akapa ti fango tënë ti apionnier ni, filiale ti aTémoin ti Jéhovah ti Mexique ayeke bâ aye so atia azo ti yâ ti territoire ni wala aye so a lingbi azo ti territoire ni awara.a Tongana a bâ aye so kue awe, a yeke tokua ambeni bungbi ti apionnier spéciaux ti fa tënë dä. A yeke mû na ala akutukutu so alingbi mbilimbili na alege so abuba mingi na so a leke ni pëpe. Na yâ akutukutu ni, a yeke wara ando ti ziango ambeti dä nga na ambeni kete ndo ti lango tongana mbeni ndo nde ti lango ayeke dä pëpe.

Ala duti ndulu ti yeda ti gue

Ti londo na nze ti octobre ngu 1996, a mû atisango ndo na ambeni wafango nzo tënë nde ti ga ti mû mbage na kusala so na tele ti apionnier spéciaux. Awafango tënë ti Royaume nga na apionnier so aye ti sala na ando so a hunda awakua dä mingi, aga na angoi nde nde ti mû mbage ti ala na kapa ti fango tënë so. A tokua ambeni na yâ akongregation so ayeke na tele ti lege so apionnier amû, ti fa tënë na yâ territoire ni na ti kiri ti bâ azo so asala nzara ti tënë ni. Awafango tënë na apionnier mingi so ade maseka ayeda na atisango ndo so, na ala wara aye ti nzoni mingi na pekoni.

Na tapande, Abimael, mbeni maseka Chrétien so asala kozo mbeni kota kua ti nginza na yâ mbeni ndokua ti téléphone ti maboko, ayeda ti mû nga mbage ti lo na kusala ti fango tënë na yâ ayongoro ndo so. Tongana apatron ti lo abâ so lo yeke leke tele ti lo ti zia kua ni, ala ye ti kono kamba ti lo nga na nginza ti lo na place ti kua ni. Ala so ayeke sala kua na tele ti lo awa lo na ngangu ti yeda na ni; ala luti mingi ti tene so, a yeke mbeni lege so a lingbi lo zia ni ahon pëpe, na gi zo so ye asala li ti lo si alingbi ti zia mara ti ye tongaso ahon. Me Abimael aleke na bê ti lo awe ti mû mbage ti lo na kapa ti fango tënë ti apionnier so teti anze ota. Tongana lo mû mbage ti lo na ngia na kusala so awe, Abimael asoro ti ngbâ biaku na yâ mbeni kongregation kâ so a hunda ti duti na awafango tënë ti Royaume dä mingi. Fadeso, lo yeke na mbeni kete kua ti nginza na lo manda ti zia pëpe si fini ti lo asi na aye mingi.

Na yâ mbeni tapande ni nde, a hunda na mbage ti Julissa ti mû bus teti angbonga 22 kozoni ti si na territoire so a tokua lo dä. A si na tanga ti mbage ti tambela ti lo, ndangba bus ti lango ni so alingbi fade ti gue na lo ahon awe. Ye oko, mbeni kutukutu ayeke dä so ayeke yô ambeni zo ti kua. Julissa asala kue ti tomba mbito so ayeke na bê ti lo, na lo hunda ala ti tene ala gue na lo. A yeke na lege ni so lo sala mbito kete teti lo yeke gi oko wali na popo ti gbâ ti akoli so. Tongana lo to nda ti fa tënë na mbeni maseka-koli, lo bâ so a yeke mbeni Témoin ti Jéhovah la! Julissa adabe lo, na lo tene: “Na ndo ni, koli so ayeke kpe na kutukutu ni ayeke mbeni ancien na yâ kongregation so a tokua mbi dä!”

Ambakoro kue amû mbage dä

Ye oko, kusala so ayeke gi pëpe teti apendere. Adela, mbeni ita-wali mbakoro, aye lani lakue ti mû ngoi ti lo mingi teti kusala ti fango tënë. Lege azi na lo tongana lo wara tisango ndo ti mû mbage na kusala ti fango tënë ti apionnier so. Lo tene: “Mbi wara ngia mingi na yâ kusala ti mbi, a sala si mbi hunda na a-ancien ti kongregation ni ti ngbâ ge lakue. Mbi wara ngia mingi teti atâa so mbi ga mbakoro awe, Jéhovah alingbi lakue ti sala kusala na mbi.”

A yeke nga ye so asi na Martha, mbeni wali ti ngu 60. Yekiango ndo ti lo teti Jéhovah nga ndoye ti lo teti amba ti lo apusu lo ti yeda ti mû mbage na kapa ti fango tënë so. Tongana lo bâ so yongo ti lege ni nga kpale ti alege ti territoire ni akanga lege na abungbi ti awafango tënë so lo yeke na yâ ni ti ndu azo ni kue, lo vo mbeni kutukutu ti tene apionnier ni asala na kusala. Ye so ita-wali so asala amû lege ti fa tënë na yâ ando mingi, na ti kangbi tâ tënë ti Bible na azo mingi ahon ti kozo.

A nzere mingi na azo ni ti mä tënë

Ye so ala so amû mbage na akapa ti fango tënë so agi ti sala ayeke ti ‘sala si azo aga adisciple’. Na ndo tënë so, aye ti nzoni mingi ayeke ga na pekoni. Azo so alango yongoro awara lege ti mä atâ tënë ti Bible so abata zo na fini (Matthieu 28:19, 20). A to nda ti mandango Bible na azo mingi. A yeke awafango tënë so alango na ndo ni so, wala ala so ayeda ti ngbâ na yâ territoire ni si angbâ ti manda Bible na azo so. Na ambeni ndo ni, a zia na sese ambeni groupe ti awafango tënë; na ti ambeni ndo ni nde, a zia na sese akete kongregation.

Magdaleno na aita so ague oko na lo na fango tënë ni afuta mbeni kutukutu ti gue na ala juska na yongoro ndo so a tokua ala dä. Na lege, ala gbu ngoi ni ti fa tënë na koli so ayeke kpe na kutukutu ni. “Koli so atene na e so na yenga so ahon, ambeni Témoin ni asi na lo na yanga-da na ngoi so lo yeke dä pëpe. Tongana lo kiri na yanga-da, sewa ti lo afa na lo peko ti tënë so ala mä. E tene na lo so e lango ndulu ge pëpe, me e londo na ambage nde nde ti kodoro ni ti ga ti mû maboko na kpengba kapa ti fango tënë so, na e tene so a yeke na nginza ti e mveni si e futa lege ni ti ga. Ye so adö bê ti lo, na lo tene so fade lo yeke to nda ti manda Bible, lo nga na sewa ti lo, na yâ oko yenga ni so. Lo mû même mbage ti lo na kusala ni na lege so lo hunda e pëpe ti futa nginza ti lege ni.”

Bê ti Magdaleno adö nga mingi na lege so azo so alango na yâ ahoto ti Chiapas ayamba tënë ni. Lo tene: “Mbi na wali ti mbi e wara lege ti fa tënë ti Royaume na mbeni bungbi ti amaseka 26 so ayeke gue lani na Église Presbytérienne. Ala kue adengi mê nzoni na tënë ni teti apenze-ngbonga 30. Ala sigigi na aBible ti ala, na e wara lege ti fa tënë na ala nzoni na ndo aye so Jéhovah aleke ti sala. Mingi ti azo ni ayeke na Bible ti ala mveni na yanga ti Tzeltal.” A to nda ti mandango Bible na ambeni zo so ayeke gue na li ni na lege ti yingo.

A gi ti kanga lege pëpe tongana ti kozo

Teti angu use na ndo ni, a fa tënë ti Nzapa pëpe na yâ mbeni kete kodoro na Chiapas ngbanga ti so ambeni zo agi ti kanga lege na tënë ni. Teresa, mbeni wafango tënë ti ngoi kue, abâ so ambeni Témoin asala mbito ti gue ti fa tënë na yâ kete kodoro so. Lo tene: “Ye so adö bê ti e kue ayeke so azo ni ayeke lani ndulu ti mä tënë. Tongana e hunzi fango tënë ni, ngu ato nda ti pika ngangu. Tongana e yeke gi mbeni ndo ti batango tele, e tï na ndo da ti mbeni koli so ayamba e nzoni; iri ti lo ayeke Sebastián na lo yeda na e ti lï na yâ da ni na ti ngbâ dä si ngu apika e pëpe. Tongana mbi yeke na yâ ti da ni, mbi hunda na lo wala a sala vizite na lo awe. Lo tene so a de, na mbi to nda ti fa tënë na lo na ti manda Bible na lo na lege ti buku Hingango Ye So Ague na Fini ti Lakue Lakue.b Tongana e hunzi fango tënë ni, Sebastián atoto na e na ngu ti lê ti kiri ti ga ti manda ye na lo.”

Mbeni bungbi ti apionnier ni nde so afa tënë na Chiapas amû tondo so: “Jéhovah asala si e wara lani aye ti nzoni mingi. Na yâ kozo yenga ni, e to nda ti manda Bible na azo 27 wala ahon so; na use yenga ni, e tisa azo ti ga ti bâ kasete vidéo La Bible: une force dans votre vie. Azo 60 aga ti bâ ni. Kasete ni anzere na azo kue. Na hunzingo ni, e hunda ti manda Bible na ambeni zo legeoko. Ye ti dongo bê mingi ayeke so e to nda ti manda ye na bungbi use ti azo na yâ kete kodoro so.

“Na pekoni so e hunzi kusala ti e na yâ aterritoire so a mû na e, e kiri na kete kodoro ni ti kpengba ala so asala nzara ti tënë ni, na ti bâ tongana nyen si abungbi ti mandango Bible so a zia na sese ayeke tambela. E tisa ala ti ga na mbeni kota bungbi ti mä diskur nga na bungbi ti Mandango Tour ti Ba Ndo. Ye oko, place ni alingbi lani azo ni kue pëpe. Lo so azia da ti lo na e teti mandango ye ni afa ndo na gigi na lo tene: ‘A lingbi ti sala bungbi ni na gigi na yâ ti gbagba ni.’ ”.

Na nda-yenga ni so, apionnier so aga na ndo ni, nga na ala so asala nzara ti tënë ni amû mbage na ngia mingi ti leke yâ ti gbagba ni si a lingbi ti sala abungbi dä. A yeke azo 103 si aga lani na kozo bungbi so. Laso, a yeke manda Bible na azo 40 wala ahon so na yâ kete kodoro so.

“Mbeni ngoi ti pendere mingi”

Nde na aye ti nzoni mingi so asi na peko ti kusala ti fango tënë ni, ala so amû mbage na kusala so awara aye ti nzoni dä mingi. María, mbeni maseka pionnier so amû mbage ti lo na mbeni oko ti akapa ti fango tënë so, afa atënë ti bê ti lo tongaso: “Anda ti tënë use asala si a duti lani mbeni ngoi ti pendere mingi teti mbi. A yeke so, ngia ti mbi na yâ kusala ti fango tënë akono, nga songo ti mbi na Jéhovah akiri akpengba ahon ti kozo. Mbeni lâ, tongana e yeke ma mbeni hoto, e bâ so e nze kue. Na pekoni so e hunda mungo maboko ti Jéhovah, e bâ na ndo e gango tâ tënë ti Esaïe 40:29-31 so atene: ‘Ala so azia beku ti ala na Jéhovah, fade ala kiri awara ngangu.’ Tongaso, e si juska na ndo ni, na e manda Bible na azo so ayamba e nzoni mingi.”

Mbeni maseka pionnier ni nde ti ngu 17 so iri ti lo ayeke Claudia atene na e: “Mbi wara ye ti nzoni mingi dä. Mbi manda ti duti na akode mingi na yâ fango tënë. Ye so amû ngia na mbi mingi na a sala si mbi zia na gbele mbi ambeni ye ti yingo ti salango ni. Mbi maï nga na lege ti yingo. Na yanga-da, mama ti mbi ayeke sala lani aye kue teti mbi. Fadeso, teti mbi manda aye mingi na yâ fini, mbi lingbi ti sala aye mingi gi mbi mveni. Na tapande, mbi ye lani mingi ti soro yâ ti akobe so mbi yeke te. Me fadeso, teti so mbi sala ngangu ti manda ti duti alingbi na aye nde nde so asi, mbi zia ti dema awe ngbanga ti tënë ti kobe. Kusala so amû maboko na mbi ti wara anzoni kamarade mingi. Ye kue so e yeke na ni, e tara ti kangbi ni na popo ti e na ti mû maboko na mba.”

Mbeni kongo le-kobe so aga na ngia mingi

Ye ti peko ti angangu so a mû ti sala na kota kusala so ayeke so wa? Na tongo nda ti ngu 2002, ambeni pionnier 28 300 amû mbage ti ala na yâ akapa ti fango tënë ti apionnier so. Ala manda Bible na azo ahon 140 000 na ala mû angbonga so ahon kutu use teti kusala ti fango tënë. Ti mû maboko na azo ti manda tâ tënë ti Mbeti ti Nzapa, ala kangbi abuku ndulu na 121 000, na apériodique ndulu na 730 000. A yeke si ka na ambeni pionnier ti manda Bible na azo 20 wala ahon ni.

Azo so a fa nzobe so na mbage ti ala akiri singila ngangu mingi teti angangu so a mû ti fa tënë ti Nzapa na ala. Atâa so ala yeke na yâ nzinga, mingi ti ala aye gi ti tene awafango tënë ni ayeda na a-offrande so ala mû teti kusala ni. Mbeni mbakoro-wali ti ngu 70 so ayeke na yâ nzinga ayeke mû ka lakue mbeni ye teti apionnier so ayeke ga ti bâ lo. Tongana ala ye ti ke, lo tï na toto. Mbeni sewa so ayeke na mosoro mingi pëpe atene na apionnier ni so kondo ti lo adü ambeni para mbilimbili teti ala, na lo wa ala ti mû apara ni.

Ye ti nzoni mingi ahon so ayeke so azo ti nzoni bê so afa tâ yekiango ndo ti ala teti aye ti yingo. Na tapande, mbeni maseka-wali atambela na gere, gi lo oko, teti angbonga ota na ndambo ti ga na abungbi ti aChrétien na lo manke bungbi oko pëpe. Mbeni mbakoro-wali nde so asala nzara ti tënë ni atambela angbonga use ti ga ti mä fango ye na ndo Bible na ngoi ti vizite ti surveillant so ayeke gue na ndo nde nde; wali ni asala tongaso atâa so lo yeke na akpale na likuni ti lo. Ambeni zo ni so ahinga ti diko mbeti pëpe amanda ti diko na ti sû mbeti ti wara lege ti manda ye mingi na ndo fango ye ti Bible so a yeke mû. Angangu so ala mû aga na aye ti nzoni mingi na pekoni.

Na yâ mbeti ti Kusala ti aBazengele, Luc afa peko ti mbeni ye tongana suma so bazengele Paul abâ; lo tene: “Zo ti Macédoine ayeke luti, lo hunda lo mingi, lo tene, Ga na Macédoine, mo sala na e.” Paul ayeda na bê ti lo kue ti sala tongana ti so suma ni afa. Laso, na yâ ayongoro ndo ti Mexique, azo mingi ayeda ti duti na oko bibe so, na ala yeda ti gue ti fa nzo tënë “juska na nda ti sese kue.”​—Kusala 1:8; 16:9, 10.

[Akete tënë na gbe ni]

[Foto na lembeti 9]

A-Témoin ti Mexique mingi amû mbage na akapa ti fango tënë so a zia ni nde