Salango ye na bê kue ayeke nzoni, me a lingbi?
SALANGO ye na bê kue ayeke biani nzoni na yâ fini ti e ti lâ oko oko? Mbeni bakari afa so “salango ye na bê kue” ayeke “salango ye so ague nde pëpe na tënë ti yanga ti zo ni; salango ye na lege ni, mbilimbili, nga na tâ bê kue.” Biani, lengo so ayeke mû maboko ti maï mbeni nzoni songo na azo. Bazengele Paul amû wango so: “I mä tënë kue ti ala so ayeke amveni ti i na lege ti mitele; i sala teti lê ti ala pëpe, gi ti mû ngia na azo, me i sala na bê ti i kue, teti i kpe mbito ti Seigneur.” (aColossien 3:22). Zo so ayeke na mara ti zo tongaso na gbe ti lo, so asala kua na bê kue, bê ti lo ayeke duti na ngia pëpe? Laso, azo so ayeke sala ye na bê kue alingbi ti wara kua hio na ti bata ni.
Me ye so asala si salango ye na bê kue ayeke nzoni mingi ayeke ngangu so lo sala na ndo songo ti e na Nzapa. Lani, tongana azo ti Israël ti giriri agi ti bata andia nga ti sala amatanga tongana ti so a hunda na ala, Nzapa ayeke hiri deba nzoni na ndo ala. Na ndembe so lo yeke fa so a lingbi kongregation aduti nzoni-kue, Paul awa aChrétien na ngangu tongaso: ‘Ayeke nzoni e sala matanga ti Pâques ti e ni na mapa so a sala ni na ngbele mama ti mapa so ayeke mama ti mapa ti siokpari na aye ti kamene so pëpe. Me ayeke nzoni i sala matanga ti Pâque ti e na mapa so a sala na mama ni pëpe, so ti tene e sala ni na vulu bê, na tenengo tâ tënë.’ (1 aCorinthien 5:8, Buku ti Nzapa, Fini Mbuki, 1995). Ti tene Nzapa ayeda na vorongo ti e, a yeke nzoni, na a yeke nga kota ye ti tene e sala ni na bê kue. Me, bâ so salango ye na bê kue, tongana lo yeke gi lo oko, alingbi pëpe. A lingbi a gue oko na tâ tënë.
Giriri, azo so aleke Titanic, nga na azo so asala voyage na ni alingbi ti pensé na bê kue so kota mangboko so ayeke lï ngu lâ oko pëpe. Me na kozo voyage ti lo na ngu 1912, lo gu mbeni ngbongboro ye na lê ti ngu si azo 1 517 awara kuâ dä. Ambeni Juif ti kozo siècle alingbi lani ti pensé na bê kue so vorongo so ala yeke mû na Nzapa ayeke tâ na lege ni. Me wâ ti ala ni ayeke na “lege ti tâ hingango ye pëpe”. (aRomain 10:2, NW). Tongaso, tongana e ye si Nzapa ayeda na e, a lingbi e gi mbilimbili nda ti atënë so e mä na bê dä na bê kue. A-Témoin ti Jéhovah so ayeke na yâ vaka ti mo ayeke duti ande na ngia ti mû maboko na mo ti gi ti hinga ye so Nzapa ahunda na zo ti sala na lo na bê kue nga na tâ tënë.