‘Nzapa, teti nyen mo zia si ye so asi?’
RICARDO angbâ lakue ti dabe ti lo na ngoi so lo na wali ti lo, Maria, aduti lani ti ku docteur ti ala.a Zo oko na popo ti ala awara nga ngangu pëpe ti diko afini tënë so a wara na ndo songo tele ti Maria. Na pekoni, Ricardo azi yâ ti enveloppe ni, na ala bi lê hio na ndo mbeti ni. Ala bâ tënë “cancer” na yâ ni, na ala use kue atï na toto teti so ala hinga ye so ayeke ku ala.
Ricardo atene: “Docteur ni ayeke lani na nzobe mingi, me lo bâ biani so ye ni ayeke ngangu teti so lo yeke tene lakue na e ti zia bê ti e kue na Nzapa.”
Kozoni si a to nda ti kaï kobela ti Maria na lege ti mbeni ngangu yorö, docteur ti lo abâ so gere ti lo ti koli ayeke yengi gi na bê ti lo. Tongana a kiri a gi nda ni, a bâ so cancer ni amû yâ ti li ti lo kue. Gi na peko ti yenga oko senge, a zia ti kaï kobela ti lo ni na lege ti yorö ni so. Maria alï na yâ ti koma na lo kui nze use na pekoni. Ricardo atene: “Ti hinga so pasi ti lo ahunzi adë bê ti mbi. Me teti so lo manke mbi mingi, mbi nga kue mbi ye lani ti kui na peko ti lo. Mingi ni, mbi yeke tene na Nzapa na kongo: ‘Teti nyen mo zia si ye so asi?’ ”
Tongana kpale atï, atënë mingi ayeke londo
Legeoko tongana Ricardo, gbâ ti azo na ndo sese mobimba ayeke tingbi lê na lê na ye so pasi aga na ni. Mingi ni a yeke gi asenge zo si ayeke bâ pasi. Pensé kete na ye ti vundu mingi so abira so ahunzi pëpe angbâ lakue ti ga na ni na ndo azo. Wala bâ vundu so bungbingo na awali na ngangu, salango ngangu na amolenge nga na yâ ti sewa, na ambeni ye ti sioni so azo asala ni, ayeke sala na ndo azo. Ngbele ye so zo abâ gigi, a bâ a tene katikati ayeke dä pëpe na tele ti sioni nga na pasi so akoli na awali ayeke ndulu ti sala na tele ti mba (Zo-ti-fa-tene 4:1-3). A bâ nga vundu so asala azo so mbeni ye ti ngangu ti ndagigi asi na ala, wala so tele ti ala aso, so kobela ti li wala ti bibe asala ala. A yeke nga ye ti dongo bê pëpe so azo mingi ayeke hunda ka, “Teti nyen Nzapa azia lege na mara ti apasi tongaso?”
Même ti ala so amä na bê na Nzapa, a yeke ngangu lakue ti hon ndo ti pasi. Mo nga kue mo yeke hunda peut-être tele ti mo ngbanga ti nyen Nzapa, so ayeke na ndoye nga na ngangu na ndo ye kue, alingbi ti zia si azo abâ pasi tongaso. Tongana e wara mbeni kiringo tënë so atene tâ tënë nga so adë bê na kpengba hundango tënë so, a yeke nzoni mingi ndali ti siriri ti bibe ti e nga ndali ti songo so e lë na Nzapa. Bible amû mara ti kiringo tënë tongaso. E hunda mo ti bâ tënë so Bible atene na ndo ni na yâ article ti peko.
[Kete tënë na gbe ni]
a A changé a-iri ni.
[Afoto na lembeti 3]
Lani docteur ni ayeke tene lakue na e ti zia bê ti e kue na Nzapa