A sala ye oko pëpe?

TI MINGI ti azo, a yeke peut-être gondango ala tongana a bâ ala tongana azo so tënë ayeke so ala pëpe, so ti tene azo so ayeke gi kpô, azo so akanga lê na ndo ti aye. Me dutingo zo so tënë ayeke so lo pëpe alingbi ti ndu mbeni tënë nde. Bible atene: “Tënë so aso awabuba pëpe alingbi ti gue na ala na kuâ.” (aProverbe 1:32, NW). A ye ti tene nyen?

Ambeni Bible nde akiri peko ti tënë so na yanga ti Hébreu na atënë tongana “zo so abâ tele ti lo, lo lingbi kue” (Fini Bible ti Amerika [Angl.]) nga na “zo so atene lo hinga ye kue” (Fini Bible ti Anglais [Angl.]). Ge, a zia kamba na popo ti zo so tënë ayeke so lo pëpe na zo ti goigoi, zo so abâ ye na nene ni pëpe, zo so li ti lo ayeke dä pëpe wala wabuba.

Na kozo siècle, aChrétien ti kongregation ti Laodicée abâ lani pëpe so ala woko na lege ti yingo, wala wokongo ti ala ni asala ye oko na ala pëpe. Na baba, ala pika kate so ‘ye amanke ala [lani] pëpe’. Jésus Christ azingo na ala, lo hunda ala ti tene ala kiri awara wâ ti ala ti Chrétien ti kozoni.​—Apocalypse 3:14-19.

Giriri, azo ti ngoi ti Noé afa nga so tënë aso ala pëpe. Ala bi bê ti ala mingi na asenge ye ti fini, “ala te, ala nyon, akoli akamata wali, na awali akamata koli, . . . na ala hinga tënë ni pëpe juska moa aga akamata ala kue”. Na pekoni Jésus atene: “Fade singo ti Molenge Ti Zo ayeke tongaso.”​—Matthieu 24:37-39.

Aprophétie ti Bible so aga tâ tënë awe afa so e yeke fadeso na lâ ti “singo ti Molenge Ti Zo”, Jésus Christ. Tongaso, zia e ga lâ oko pëpe azo so tënë ayeke so ala pëpe, so ti tene azo so atene ala hinga ye kue, azo so abâ ye na nene ni pëpe nga azo so abâ tele ti ala, ala lingbi kue.​—Luc 21:29-36.