Mo dabe mo na ni?

Mo yekia mingi dikongo a-article ti Tour ti Ba Ndo so asigigi ade ti ninga pëpe? Tongaso, bâ wala mo lingbi ti kiri tënë na ahundango tënë so ge:

• Bango mawa ayeke nyen? Na ngbanga ti nyen a hunda na aChrétien ti lë ni?

A yeke ngangu ti zia tele na place ti mbeni zo, na tapande ti zia si vundu ti mbeni zo agbu bê ti e. A wa aChrétien ti ‘sala be-nzoni na popo ti ala, ti ndoye tele tongana aita na ti duti na be-ti-ndoye.’ (1 Pierre 3:8). Jéhovah azia na e tapande ti mû pekoni tongana e ye ti fa so e bâ mawa ti azo (Psaume 103:14; Zacharie 2:8). E lingbi ti maï ngangu ti bingo bê ti e na lege so na mango ndo, na bango ndo, nga na ziango tele ti e na place ti azo.​—15/4, alembeti 24-26.

• Ti wara tâ ngia, ngbanga ti nyen a lingbi sava na lege ti yingo aga kozoni si a sava biaku ambage ti tele so abuba na lege ti mitele?

Azo mingi so ayeke na nzoni seni ala yeke na ngia pëpe na akpale ahon ndo ti ala. Na mbeni mbage nde, aChrétien mingi so laso mbeni mbage ti tele ti ala abuba ayeke na kota ngia ti sala na Jéhovah. Ala so awara sava na lege ti yingo ayeke ndulu ti wara sava kue na lege ti mitele na yâ fini sese.​—1/5, alembeti 6-7.

• Ngbanga ti nyen na aHébreu 12:16, Paul ahaka aye so Esaü asala na ye ti pitan?

Tondo ti Bible ni afa so Esaü alë bibe ti zo so aye ti wara aye hio na lo bâ na nene ni oko pëpe aye ti Nzapa. Tongana mbeni zo laso azia mara ti bibe tongaso amaï na yâ lo, a lingbi ti pusu lo ti tï na yâ kota siokpari, tongana pitan.​—1/5, alembeti 10, 11.

• Tertullien ayeke lani zo wa? Na a hinga lo mingi na kusala wa?

Lo yeke lani mbeni wasungo mbeti na wandara ti lege ti vorongo na siècle use na ota ti ngoi ti e. A hinga lo mingi teti kusala so lo sala ti sigigi na abuku mingi so amû mbage ti lege ti vorongo ti aChrétien ti yanga. Na yâ atënë ti lo, lo yôro abibe na atënë ti senda-ndara so aleke gunda ti atënë ti mabe ti wataka, tongana tënë ti Nzapa ti li ota.​—15/5, alembeti 29-31.

• Ngbanga ti nyen gunda ti akobela, salango ye, na kui ti zo ayeke pëpe gi na yâ mênë ti zo?

Awasenda-ye atene so a yeke na yâ mênë si a lingbi ti wara gunda ti akobela nde nde ti zo, na ambeni amä na bê so gunda ti salango ye ti zo ayeke nga na yâ mênë ti lo. Ye oko, Bible afa tongana nyen si azo abâ gigi, nga tongana nyen si zo atï na yâ siokpari na agirisa dutingo ti lo ti mbilimbili-kue. Atâa so aye na yâ mênë ti zo alingbi ti sala ngangu na ndo alengo so e yeke lë, dutingo ti e mbilimbili-kue pëpe nga na aye so angoro e ayeke sala nga kota ngangu na ndo e.​—1/6, alembeti 9-11.

• Na lege wa mbeni kete kugbe-mbeti ti papyrus so a wara na yâ gbata ti Oxyrhynchos, na Égypte, afa tongana nyen a sala giriri kusala na iri ti Nzapa?

Na yâ kete kugbe-mbeti ti Bible ti Septante so asala na yanga ti Grec, na Job 42:11, 12 a yeke wara agere ti mbeti osio na yanga ti Hébreu so a sû na iri ti Nzapa. Ye so ayeke nga mbeni fä nde so amû lege ti hinga so a sala lani kusala na iri ti Nzapa na yanga ti Hébreu na yâ Bible ti Septante, so fani mingi aChrétien so asû Mbeti ti Nzapa na yanga ti Grec agboto aversê dä.​—1/6, lembeti 30.

• A lingbi ti haka angangu tiri so ague asi na kuâ, so ayeke tambela giriri na yâ Kodoro-togbia ti Rome, na aye ti wanguru wa ti ngoi ti laso?

Ade ti ninga pëpe, a fa ambeni ye na yâ Colisée, kota lando ti salango ngia giriri ti gbata ti Rome na Italie. Aye so azia kamba na popo ti ambeni salango ngia ti laso so afa na lege ti akasete vidéo azo so ayeke tiri na akoli-bagara, kpongo gobo teti nginza, mandako ti kpengo loro ti akutukutu na ti amoto, nga sioni tiri na popo ti azo so aga ti bâ awanguru na ndembe ti ambeni ye ti wanguru ti laso. Akozo Chrétien ahinga so Jéhovah andoye pëpe salango ngangu nga azo ti salango ngangu; a lingbi aChrétien ti laso aduti nga na oko bango ndo so (Psaume 11:6).​—15/6, lembeti 29.

• Tongana e yeke sala ngangu ti tene fango ye ti e aga na nzoni ye, ye nyen e lingbi ti manda na lege ti tapande ti Esdras?

Esdras 7:10 agboto lê na ndo aye osio so Esdras asala, na so e lingbi ti sala kue ti mû pekoni. Versê ni atene so ‘Esdras (1) aleke bê ti lo (2) ti gi Ndia ti Jéhovah, (3) ti bata Ndia ni, na (4) ti fa na azo ti Israël kpengba-ndia na kpengba-tene.’​—1/7, lembeti 20.

• Na yâ angoi use wa na yâ kusala ti yingo a yeke na lege ni teti mbeni wali Chrétien ti kanga ye na li ti lo?

Oko ngoi ni andu aye ti yingo so wali ni ayeke sala na yâ sewa ti lo. Tongana lo kanga ye na li ti lo na ngoi ni so, lo yeke fa so a yeke koli ti lo si ayeke fade na kungba ti sambela na ti fa lege na sewa ni na ndo Bible. Use ngoi ni andu akusala so wali ni ayeke sala na yâ ti kongregation; na ndo so, lo yeke fa so a yeke na akoli so awara batême awe si Mbeti ti Nzapa ahunda na ala ti fa ye na ti fa lege (1 aCorinthien 11:3-10).​—15/7, alembeti 26-27.

• Ngbanga ti nyen aChrétien abâ so yoga andu ye mingi ahon gi senge tarango tele, na a lingbi ti ga na ye ti sioni?

Nda ti yoga so a yeke fa ayeke ti gue na mbeni zo si lo bungbi oko na mbeni yingo ti kota ahon. Nde na ye so Nzapa ahunda, yoga ahunda na zo ti kaï ngangu ti gbungo li ti lo (aRomain 12:1, 2). Yoga alingbi ti sala si zo atï na yâ asioni salango ye ti ayingo sioni nga na ti atoro (Deutéronome 18:10, 11).​—1/8, alembeti 20-22.