Tondo so alondo na awafango tënë ti Royaume
“Tënë ti Nzapa ayeke na ngangu ti sala ye”
NA ZOA ti Jamaïque, mbeni kodoro so lâ asû dä pendere na Antilles, azo mingi ahinga Bible. Biani, a lingbi ti wara ndulu na yâ da ti azo kue Bible na yanga ti Anglais King James Version, na ambeni zo abâ na lê ti ala awe so “Tënë ti Nzapa ayeke na fini, na a yeke na ngangu ti sala ye”. (aHébreu 4:12). Ngangu so alingbi ti changé fini ti azo, tongana ti so tapande so ge ayeke fa.
Mbeni koli ayeke dä so iri ti lo ayeke Cleveland. Lo londo na kua na lo kiri na yanga-da, na fade fade mbeni Témoin ti Jéhovah asi na lo. Na peko ti so lo fa na Cleveland ambeni tënë na yâ Mbeti ti Nzapa, Témoin ni azia na tïtî lo buku Hingango Ye So Ague na Fini ti Lakue Lakue. Cleveland ahinga lani pëpe so Tënë ti Nzapa ayeke sala ande ngangu mingi na yâ fini ti lo.
Cleveland ayeke sambela ka fani ota na yâ lango oko. Lo yeke hunda na Nzapa ti mû maboko na lo ti wara nzoni lege ti voro Lo. Na bê ti lo, Cleveland ahinga biani so babâ na mama ti lo avoro Nzapa na lege ni pëpe, me na peko ti so lo gi ti hinga nda ti ambeni lege ti vorongo nde, lo wara ye ti nzoni dä oko pëpe. Atâa so lo mä tënë na ndo ti aTémoin ti Jéhovah kozoni awe, lo yeke gi bê ti lo wala ala yeke na tâ tënë. Atâa akite so lo yeke na ni, Cleveland ayeda ti manda Bible na Témoin so aga na yanga-da ti lo. Ngbanga ti nyen tongaso? Ngbanga ti so lo ye ti fa so aTémoin ayeke fa tâ tënë pëpe!
Kete na pekoni, Cleveland, so ayeke na andeko use, amanda so dutingo ti lo ni anzere na Nzapa pëpe (1 aCorinthien 6:9, 10). Tongaso, gi na peko ti use mandango ye ni, lo kanga bê lo kangbi na andeko ti lo use kue. Lo to nda ti gue nga na abungbi ti aChrétien na Da ti Royaume. Me ye so aga na lo na mbeni tara nde.
Cleveland ayeke ândö mbeni ngangu zo na yâ bungbi ti pikango ndembo ti gere ti azo ti kodoro ti lo, na alango ti ndembo ni ayeke kanga lege na lo ti gue na abungbi. Fade lo yeke sala nyen? Atâa so amba ti lo ti pikango ndembo ti gere ni, wafango ndembo ti lo, na akamarade ti lo asala ngangu na ndo lo, Cleveland asigigi na yâ bungbi ni. Biani, Tënë ti Nzapa ato nda ti sala ngangu na ndo lo teti nzoni ti lo!
E kiri e bâ ngangu ti Tënë ti Nzapa tongana Cleveland ato nda ti kangbi ye so lo hinga na ndo Bible na azo (Kusala 1:8). Ye so asala si angbele kamarade ti lo use ti yâ ti bungbi ti pikango ndembo ti gere ni ato nda ti gue na abungbi ti aTémoin ti Jéhovah. Na peko ti so a yeda na Cleveland ti ga mbeni wafango nzo tënë, na mungo maboko na azo na lege ti Tënë ti Nzapa, lo wara ngia mingi na yâ kusala ni.
Teti so Tënë ti Nzapa angbâ lakue ti sala ngangu na ndo lo, Cleveland awara batême ti fa mungo tele ti lo na Jéhovah na lo wara matabisi ti ga mbeni wakua ti ngoi kue nga na serviteur ti mungo maboko na yâ ti kongregation.
Na Jamaïque nga na ndo sese kue, azo saki mingi awara lege ti bâ so Tënë ti Nzapa “ayeke na fini na a yeke na ngangu ti sala ye”.
[Carte/Foto na lembeti 8]
JAMAÏQUE
[Lingu ti foto]
Carte ni nga na sese: Mountain High Maps® Copyright © 1997 Digital Wisdom, Inc.