Ambeni ye so asala ngangu na ndo azo

MO YEKE sigigi na da ti mo na mo tingbi lê na lê na mbeni zo. Mo ko gere ti mo na mbeni tênë. Mbeni mara ti ndeke tongaso adekongo na bï. Mo yeke bâ oko bango li lege mingi. Ti azo mingi, aye so kue ayeke gi asenge ye so asala sioni na zo pëpe. Me ti ambeni zo na Afrika ti Do, ala lingbi ti bâ ni tongana afä, atënë so alondo na ayingo. Tongana fä ni ayeke nzoni, pasa si ayeke ga, me tongana fä ni ayeke sioni, ye ti vundu si ayeke si.

A yeke gi na Afrika pëpe si azo amä na bê na mara ti aye tongaso, me na ambeni kodoro nde nga. Atâa so ala duti teti angu mingi na yâ kodoro so azo ni atene ala mä na bê na Nzapa pëpe, gbâ ti aChinois na azo ti ngbele Union Soviétique angbâ ti mä na bê na aye tongaso. Na Poto, azo mingi ayeke diko horoscope ti ala (wala ye so alingbi ti si na ala na yâ lango ni so); mbito ti vendredi so atï na lango 13 ti nze ni agbu ala, na ala kpe avuko nyau. Ambeni zo so ayeke yongoro kâ na Banga ti sese abâ apendere lumière so asuru lê ti nduzu na mbeni ngoi tongana fä ti bira wala ti kobela ti futi kodoro. Na Inde, azo ti gbotongo akota kutukutu ayeke kangbi SIDA kirikiri. Ti ala, tongana ala bungbi na awali, tele ti ala ayeke dë na angoi so ndowa asala mingi. Na Japon, azo so akoro alege na gbe ti sese atene so tongana mbeni wali alï na yâ ni kozoni si a hunzi ti leke ni, a yeke ga na ye ti sioni. Mara ti abibe tongaso amû nga yâ ti abungbi ti awanguru. Na tapande, teti so bungbi ti lo asö benda na peko ti tele, mbeni wanguru ti volleyball atene so a yeke gi ngbanga ti so lo yü avuko chaussette ahon ti tene a duti avulu ni. Biani, atapande ni ayeke mingi mingi.

Me mo tene ti mo nyen? Na bê ti mo, mo sala peut-être mbito ti mbeni ye so mo hinga nda ni pëpe? Mbeni “tënë so azo mingi ayeda na ni wala mbeni salango ye so a bâ so gere ni aluti nzoni pëpe” ayeke sala ngangu na ndo mo? Kiringo tënë ti mo alingbi ti fa wala a yeke tongaso, teti a yeke na lege so si a fa nda ti mara ti aye so.

Zo so azia si ambeni ye tongaso asala ngangu na ndo adesizion so lo yeke mû nga na ndo akusala ti lo ti lâ oko oko, lo yeke mû lege na mbeni ye so lo hinga nda ni nzoni pëpe ti komande lo. A yeke biani na lege ti ndara? A lingbi e zia tele ti e na gbe ti mara ti aye tongaso, so ayeke polele pëpe na so alingbi ti sala sioni na e? Aye ni so ayeke mbeni salango ye so ayeke gi senge senge wala so alingbi ti ga na tâ ye ti sioni?