Ti tambela na ndo lege ti Jéhovah aga na aye ti nzoni mingi

MO WARA lege ti gue na yongoro fono na yâ ahoto awe? Tongana mo sala ni awe, peut-être na ngoi ni so, mo bâ tele ti mo tongana mo yeke na ndo ti sese kâ na nduzu. A yeke tâ nzerengo ye ti hu pendere pupu, ti bâ aye so aluti yongoro kâ, na ti bâ pendere ti ndagigi! Peut-être akpale so mo wara na da ti mo aga lani ye so ayeke kota mingi mbeni pëpe.

Ti azo mingi, amara ti fono ti ngia tongaso ayeke si ka lakue lakue pëpe, me tongana mo yeke mbeni Chrétien so amû tele ti lo na Nzapa, peut-être na lege ti yingo, mo yeke tambela teti ambeni ngoi so aninga awe na yâ ahoto. Legeoko na wasungo psaume ti giriri, kite ayeke pëpe so mo yeke sambela tongaso: “O L’Eternel, fa na mbi lege ti Mo; fa nda ti lege ti Mo na mbi.” (Psaume 25:4). Mo dabe mo na bibe so mo wara lani tongana mo ma ti fani oko ni na ndo hoto ti da ti Jéhovah, na mo to nda ti tambela na ando ni so ayo na nduzu? (Michée 4:2; Habakuk 3:19). Kite ayeke pëpe so mo bâ hio so tambelango na ndo lege ti tâ vorongo so ayeke na nduzu mingi, abata mo na amû ngia na mo. Mo to nda ti wara oko bibe ti wasungo psaume so: “Ngia ayeke na azo so ahinga nda ti tënë ti hurungo trompette. Ala tambela na lumière ti lê ti Mo, O L’Eternel.”​—Psaume 89:16.

Ye oko, ngoi na ngoi, ala so ayeke gue ti tambela yongoro na yâ ahoto ayeke te pembe ngangu ti ma na ndo hoto so. Agere ti ala ato nda ti so, na ala nze. E kue e lingbi ti wara akpale tongaso na yâ kusala so e yeke sala na Nzapa. Peut-être na yâ angoi so ahon a ninga mingi pëpe, atambela ti e aga ngangu na e. Ye nyen e lingbi ti sala ti kiri ti wara ngangu nga na ngia ti e? Kozo ye ti sala ayeke ti hinga so alege ti Jéhovah ayeke kota ahon tanga ti alege kue.

Andia ti Jéhovah ayeke na nduzu mingi

Alege ti Jéhovah ayeke ‘na nduzu ahon alege ti zo’, na ‘a yä’ vorongo ti lo ‘na nduzu ahon ahoto kue’. (Esaïe 55:9; Michée 4:1). Ndara ti Jéhovah ayeke “ndara so alondo na nduzu”. (Jacques 3:17). Andia ti lo ayeke na nduzu ahon tanga ti andia kue. Na tapande, na ngoi so azo ti Canaan abi tele ti ala lani na yâ mbeni sioni salango ye so andu mungo amolenge ti ala na sandaga, Jéhovah amû na azo ti Israël andia so ayeke na nduzu na lege ti nzoni salango ye, na so a hunda na zo ti fa be-nzoni. Lo tene na ala: “Mo yekia wanzinga teti lê ti lo pëpe, na mo yekia kota zo teti lê ti lo pëpe . . . A lingbi wande . . . aga tongana molenge ti kodoro na lê ti i, na mo ndoye lo tongana mo ndoye mo mveni”.​—Lévitique 19:15, 34.

Asiècle bale-oko na oku na pekoni, Jésus amû atapande mingi ahon, so andu “Ndia” ti Jéhovah so ‘awara gloire mingi.’ (Esaïe 42:21). Na yâ Fango ye ti lo na ndo Hoto, lo tene na adisciple ti lo: “I ndoye awato ti i, na i sambela teti azo so asala ngangu na i, si i ga amolenge ti Babâ ti i so ayeke na yayu”. (Matthieu 5:44, 45). Lo tene na pekoni: “Tongaso ye kue so i ye azo asala na i, i sala na ala tongaso nga; teti so ayeke tënë ti Ndia na aProphète.”​—Matthieu 7:12.

Andia so ayeke na nduzu ayeke sala ngangu na ndo bê ti ala so ayeke sala ye alingbi na ni; a yeke pusu ala ti mû tapande ti Nzapa so ala yeke voro (aEphésien 5:1; 1 aThessalonicien 2:13). Bi bê na gbiango ye so asi na yâ fini ti Paul. Na ngoi so Bible asala tënë ti lo ti fani oko ni, lo yeke ‘yeda na azo so afâ Etienne’ na lo yeke ‘futi kongregation’. Gi angu kete na pekoni, e wara lo na salango ye na nzobe na mbage ti aChrétien ti Thessalonique, legeoko tongana mbeni “mama [so] abata amolenge ti lo mveni na nzobe”. Paul ayeke lani mbeni zo so asala ngangu mingi na kongregation; me fango ye so lo wara na mbage ti Nzapa asala si lo gbian na lo ga mbeni Chrétien so asala ye na nzobe (Kusala 8:1, 3; 1 aThessalonicien 2:7). Biani, Paul akiri singila mingi so fango ye ti Christ agbian asalango ye ti lo (1 Timothée 1:12, 13). Tongana nyen mara ti kiringo singila tongaso alingbi ti mû maboko na e ti ngbâ ti tambela na ndo lege ti Nzapa so ayeke na nduzu?

Tambela na bê ti kiri singila

Ala so ayeke gue na yongoro tambela na yâ ahoto ayeke na ngia ti bâ apendere ndo ti ndagigi so ahoto amû lege na ala ti bâ. Ala manda nga ti mû ngoi ti bâ mbilimbili anzene nzene ye so ayeke na tele ti akete lege ti ahoto, na tapande mbeni tênë so tele ni ayeke nde mingi, mbeni pendere kongo, wala mbeni nyama ti ngonda. Na lege ti yingo, a yeke ti e ti duti ndulu ti hinga anzoni ye kue, atâa a yeke kete wala kota, so aga na lege ti tambelango na Nzapa. Tongana e hinga ye so, a lingbi ti mû ngangu na e, na ti sala si mbeni tambela so alingbi fade ti ne nengo aga mbeni tambela so ayapu. Bibe ti e ayeke gue ande oko na ti David so atene: “Sala si mbi mä tënë ti nzobe ti Mo na ndapelele, teti mbi zia bê ti mbi na Mo. Sala si mbi hinga lege so alingbi mbi tambela dä”.​—Psaume 143:8.

Mary, so atambela teti angu mingi na ndo lege ti Jéhovah, atene: “Tongana mbi bâ aye so maboko ti Jéhovah aleke, mbi bâ gi pëpe kpengba lege so a sala na ala, me nga anzoni lengo ti Nzapa so ayeke na pekoni. Atâa a yeke mbeni nyama, mbeni ndeke, wala mbeni kete nyama, ala kue ayeke na aye mingi ti fa na zo, na aye so kue apika bê. Zo alingbi ti wara mara ti ngia so na lege ti atâ tënë na lege ti yingo, so ayeke ga polele mingi ahon tongana angu ayeke hon.”

Tongana nyen e lingbi ti kono bê ti kiri singila ti e? Mbeni oko ye ni ayeke ti bâ tongana senge ye pëpe ye so Jéhovah asala teti e. Paul asû na mbeti: “I zia ti sambela pëpe; i mû merci na yâ ye kue”.​—1 aThessalonicien 5:17, 18; Psaume 119:62.

Tongana zo amanda ye lo mveni, a yeke mû maboko na lo ti duti na bê ti kiri singila. Paul awa aChrétien ti Colosses: “I tambela tongaso na yâ Lo [Christ Jésus], . . . na i wu na tënë ti singila.” (aColossien 2:6, 7). Ti diko Bible na ti gbu li na ndo ye so e diko ayeke kpengba mabe ti e, na a yeke sala si e ga ndulu mingi ahon na Mveni ti Bible. Na yâ alembeti ti Bible, a yeke wara amosoro so alingbi ti pusu e ti “wu na tënë ti singila”.

Ti sala na Jéhovah na tele ti aita ti e ayeke sala nga si lege ni akpengba mingi ahon pëpe. Wasungo psaume atene na ndo lo mveni: “Mbi yeke fon ala kue so akpe mbito ti Mo”. (Psaume 119:63). Ambeni ngoi so amû ngia na e mingi ahon atanga ni kue ayeke angoi so e yeke na akota bungbi ti aChrétien wala ambeni ngoi nde so e yeke sala na tele ti aita ti e. E hinga so tongana sewa ti e ti aChrétien so ayeke na ngele mingi angbâ ti tambela, a yeke ndali ti Jéhovah nga na lege ti lo so ayeke na nduzu.​—Psaume 144:15b.

Na ndo dutingo na bê ti kiri singila, tongana e yô kungba ti e na lege ni, fade a yeke kpengba e ti ngbâ lakue ti tambela na ndo lege ti Jéhovah so ayeke na nduzu.

E yô kungba ti e na lege ni tongana e tambela

Ala so ayeke na bibe ti yongo kungba na lege ni tongana ala gue na yongoro tambela ahinga so a yeke kungba ti ala ti tambela na hange tongana ala ye pëpe ti girisa lege wala ti ga ndulu na mbeni sioni ndo so zo alingbi ti tï dä. Teti so e yeke azo so alingbi ti soro ye so ala ye, Jéhovah amû na e mbeni liberté ti sala aye, nga ngangu ti londo ti sala ni. Me mara ti liberté tongaso ahunda e ti duti na ndara tongana e yeke sala kusala so a hunda na aChrétien ti sala.

Na tapande, Jéhovah ahunda na awakua ti lo ti sala kusala ti ala na bango ni na nene ni. Lo fa pëpe konongo ti ngangu wala ti ngoi so a lingbi e mû teti akusala ti Chrétien, nga nginza oke wala aye nde wa a lingbi e mû. Nde na so, atënë ti Paul na azo ti Corinthe alingbi na e kue: “Zia azo oko oko kue amû ye tongana bê ti ala aye”.​—2 aCorinthien 9:7; aHébreu 13:15, 16.

Chrétien so aye ti yô kungba ti lo na lege ni na ndo tënë ti mungo ye ayeke gi nga ti kangbi nzo tënë na ambeni zo. E fa nga so e yeke bâ kusala ti e na nene ni na mungo a-offrande teti kusala ti Royaume na ndo sese kue. Gerhardt, mbeni ancien, afa so lo na wali ti lo amû lani offrande so akono mingi na pekoni so ala gue na mbeni kota bungbi na Poto ti Tö. Lo tene: “E bâ so aita ti e na ndo so ayeke na ye mingi pëpe na lege ti mitele. Ye oko, ala yekia mingi ambeti na ndo Bible; tongaso, e mû desizion ti mû ye kue so alingbi na ngangu ti e na aita ti e so ayeke na yâ ti bezoin na yâ ambeni kodoro nde.”

E kono yâ ti gbungo ngangu ti e

Tongana mbeni zo ayeke tambela na yâ hoto, lo yeke na bezoin ti wara ngangu mingi si lo nze na tambela ni pëpe. Ala so aye ti gue na yongoro fono ayeke tara tele ti ala na ngoi kue so ala lingbi ti sala ni, na mingi ti ala ayeke gue na akete tambela ti leke tele ti ala teti ayongoro tambela. Legeoko nga, Paul awa e ti duti na kusala mingi ti sala teti Nzapa, si e ngbâ ti kpengba na lege ti yingo. Na lege ti tënë ti Paul, a lingbi ala so aye ti “tambela na lege so alingbi na Seigneur” na ti “kpengba na lege ti ngangu kue” agi ti “lë na kusala ti nzoni kue”.​—aColossien 1:10, 11.

Mbeni ye so amû lege na zo so ayeke gue na yongoro tambela ti ngbâ na ngangu, ayeke bibe so apusu lo ti sala ni. Tongana nyen? Tongana lo zia lê gi na ndo mbeni ye so lo ye ti si dä, na tapande mbeni hoto so angbâ yongoro na gbele lo, a yeke mû ngangu mingi na lo. Nga, tongana lo si na ambeni ndo na lege, lo lingbi ti bâ guengo na li ni ti lo ti si na ndangba ndo so lo zia na gbele lo. Tongana lo yeke bi lê na peko ti bâ yongo ti lege so lo hon ni awe, bê ti lo ayeke nzere.

Legeoko nga, beku ti e ti fini ti lakue lakue akpengba e na apusu e ti gue na li ni (aRomain 12:12). Na oko ngoi ni, tongana e yeke tambela na ndo alege ti Jéhovah, e yeke wara ye ti nzoni tongana e leke, nga na pekoni, tongana e si na aye so e zia na gbele e tongana aChrétien. Nga e yeke wara ngia mingi tongana e bi lê na peko ti bâ angu mingi ti kusala so e sala na be-biani, wala ti bâ gbiango ye so e sala na yâ salango ye ti e!​—Psaume 16:11.

Ti gue na ayongoro ndo, na ti bata ngangu ti ala, azo so ague na fono ayeke mû mbeni loro so alingbi na ni. Legeoko nga, mbeni nzoni programme so andu guengo na abungbi lakue, nga na fango tënë lakue ayeke mû ande lege na e ti gue na li ni juska ti si na ndo so e zia na gbele e. Ni la si Paul amû wango so na afon lo Chrétien: “Na ndo so e si dä, a lingbi e tambela dä”.​—aPhilippien 3:16.

Biani, e yeke tambela gi e oko pëpe na ndo lege ti Jéhovah. Paul asû na mbeti: “A lingbi e bi bê ti e na ambeni zo na popo ti e ti wa ala si ala ndoye azo, na ala sala kusala nzoni”. (aHébreu 10:24). Dutingo na anzoni kamarade na lege ti yingo ayeke sala ande si tambela ti e ane na ndo e mingi pëpe na ngoi so e yeke tambela na loro legeoko na afon e na yâ vorongo.​—aProverbe 13:20.

Ti hunzi na ni, na kota ye ni ahon, ayeke ti tene e girisa lâ oko pëpe ngangu so Jéhovah amû. Fade ala so ngangu ti ala ayeke na yâ Jéhovah ayeke “wara ngangu na ndo ngangu”. (Psaume 84:6, 8). Atâa so ngoi na ngoi, a hunda e ti hon na yâ aye ti ngangu, e lingbi ti sala ni na lege ti mungo maboko ti Jéhovah.