Atënë so azo ahunda

Tongana mbeni zo aye ti wara batême, me mbage ti tele ti lo abuba, wala lo yeke na mbeni ngangu kobela; tongana aye so asala si a yeke ngangu ti yôro lo kue na ngu, fade a yeke batize lo tongana ti so a hunda?

Tënë “batize” alondo na mbeni tënë ti yanga ti Grec so a tene baʹpto, na so nda ni ayeke: “yôro na yâ”. (Jean 13:26). Na yâ Bible, tënë “batize” ague legeoko na tënë “yôro kue na yâ ngu.” Na ndo batême so Philippe asala na eunuque ti Éthiopie, Bible (The Emphasised Bible) ti Rotherham atene: “Philippe na eunuque ni use kue ala zu na yâ ngu ni, na lo [Philippe a] yôro lo [eunuque ni] kue na yâ ngu.” (Kusala 8:38). Na lege so, a yôro zo ni kue biani na yâ ngu.​—Matthieu 3:16; Marc 1:10.

Jésus atene na adisciple ti lo: “I gue, i fa tënë na amara kue si ala ga adisciple, i batize ala”. (Matthieu 28:19, 20). Ti sala ye alingbi na komandema so, aTémoin ti Jéhovah aleke ti batize azo na yâ apiscine, akota ngu, angu so asua, wala ambeni place nde so gbâ ti ngu ayeke dä. Teti so a yeke Mbeti ti Nzapa si ahunda ti tene a yôro zo ni kue na yâ ngu tongana a batize lo, azo ayeke na ngangu oko pëpe ti gue nde na komandema so teti ambeni zo. Tongaso, a lingbi a batize zo na yorongo lo kue na yâ ngu, même tongana a hunda ti leke ambeni ye so ayeke nde kozoni ngbanga ti seni ti zo ni. Na tapande, ti batize ambeni zo so aga mbakoro mingi wala so awara ngangu kpale ti seni, a leke ambeni kete piscine teti ala. A lingbi ti zia ngu ti wâ na yâ ni kete, na a zia zo ni yeke yeke na yâ ni. Tongana lo duti nzoni na yâ ngu ni awe, a lingbi ti batize lo biani.

Même azo so mbage ti tele ti ala abuba mingi awara batême. Na tapande, a mû batême ti yorongo zo kue na yâ ngu na ambeni zo so kobela ti go asala si ala yeke na mbeni dû na lege ti go ti ala, wala so ayeke na bezoin ti mbeni masini ti hu nzoni. Biani, ti tene abatême so kue atambela nzoni, a hunda lani na azo ni ti leke aye nzoni kozoni. A yeke lege ti ndara ti duti na mbeni wanganga so ahinga kua ti lo nzoni ndulu ndulu, wala mbeni docteur tongana mbeni ayeke dä. Ye oko, tongana a leke aye nzoni, na yâ aye mingi, a lingbi ti batize mara ti azo tongaso. Ni la, a lingbi a sala ngangu kue ti batize mbeni zo na yâ ngu tongana a yeke tâ nzala ti bê ti zo ni nga tongana lo yeda ti sala ni atâa kpale so alingbi ti si na pekoni.