Na Ngoi Wa A Yeke Nzoni ti Kpe?

BIBE ti azo laso ayeke ti tara ti fa so ye oko azia mbito na bê ti ala pëpe. Ala yeke nga ndulu ti gi tënë wala ti handa azo ti sala sioni. Mingi ni a yeke bâ zo so akpe mbeni ye tongana dogbo zo wala zo ti mbito. Lo lingbi même ti ga ye ti he na lê ti azo.

Ye oko, Bible afa polele so ambeni ngoi ayeke dä so ti kpe ayeke fango na gigi ndara nga na kpengba-be. Na yengo dä na tâ tënë so, Jésus Christ atene na adisciple ti lo kozoni si lo to ala na kusala: “Tongana ala sala ngangu na i na mbeni kodoro, i kpe i gue na mbeni.” (Matthieu 10:23) Biani, a lingbi adisciple ti Jésus akpe yongoro na azo so asala ngangu na ala. A yeke ti ala ti sala bira pëpe na azo na gbungo ala na ngangu ti yeda na tënë ti vorongo ti ala. Nde na so ala yeke na tokua ti siriri. (Matthieu 10:11-14; Kusala 10:34-37) Tongaso, ahon ti sala ngonzo, a lingbi aChrétien akpe yongoro na ye so aga na tënë. Na salango tongaso, ala yeke bata mbeni nzo yingo-ti-hinga nga songo ti ala ti ngele ngangu na Jéhovah.​—2 aCorinthien 4:1, 2.

Na yâ mbeti ti aProverbe, e wara mbeni tapande so ague nde mingi na ni. A sala tënë ti mbeni maseka-koli so, ahon ti kpe na gbele tara, amû peko ti mbeni wali-pitan “tongana bagara so azo ague na lo na ndo ti fâ lo.” Nyen si asi na pekoni? Ye ti vundu teti so lo tï na yâ tara so andu tâ fini ti lo mveni.​—aProverbe 7:5-8, 21-23.

Ye ni ayeke duti tongana nyen tongana mo yeke na gbele mbeni tara ti sala pitan wala mbeni ye ti sioni? Fade mo yeke sala nyen? Mbeti ti Nzapa afa so a yeke peut-être nzoni ti kpe yongoro na ye ni fade fade.​—aProverbe 4:14, 15; 1 aCorinthien 6:18; 2 Timothée 2:22.