Atënë So Azo Ahunda

Tongana mo sambela Nzapa, me na hunzingo ni mo tene pëpe “na iri ti Jésus,” a yeke na lege ni?

Bible afa so tongana aChrétien aye ti ga ndulu na Nzapa na lege ti sambela, a lingbi ala sala ni na iri ti Jésus. Jésus atene na adisciple ti lo: “Mbeni zo aga na Babâ pëpe, gi na lege ti Mbi.” Lo tene nga na pekoni: “Na ye so i hunda na iri ti Mbi, fade Mbi sala ye so, si Babâ alingbi wara gloire na yâ Molenge ni. Tongana i hunda mbeni ye na iri ti Mbi, fade Mbi sala ye so.”​—Jean 14:6, 13, 14.

Mbeni kota bakari (Cyclopedia of Biblical, Theological, and Ecclesiastical Literature) asala tënë ti ndo ti Jésus so gi lo oko ayeke na ni, a tene: “A yeke sambela gi Nzapa lo oko, na a yeke mû sambela ni na lege ti Jésus Christ so asala kusala tongana Wasalango-songo. Tongaso, asambela kue so a sala na asaint, wala na a-ange ayeke gi ye senge pëpe, me tâ ye ti zonga. Vorongo kue so a mû na mbeni créature, atâa lege so a yä na créature so na nduzu, ayeke vorongo yanda. Ndia ti Nzapa, so ayeke nzoni-kue, ake ni na ngangu.”

Mbeni zo alingbi ti tene: “Singila na Mo, Jéhovah,” na peko ti mbeni ye ti nzoni so a si na lo. Me tongana lo tene pëpe na pekoni, “na iri ti Jésus,” fade a yeke duti na lege ni pëpe? A yeke lakue tongaso pëpe. Na tapande, tongana mbeni Chrétien atingbi na mbeni kpale fade fadeso, lo lingbi ti dekongo: “Aï, Jéhovah!” A yeke duti ande ngangu na Nzapa ti ke ti mû maboko na wakua ti lo so ngbanga ti so lo tene pëpe “na iri ti Jésus.”

Ye oko, a lingbi e hinga so gi ti sala tënë na kota go même na Nzapa aye ti tene pëpe so zo ni ayeke sambela lo. Na tapande, na pekoni so Jéhovah afâ ngbanga na ndo lo teti so lo fâ ita ti lo Abel, Caïn atene: “Sioye ti mbi ayeke kota, a hon ndo ti mbi awe. Bâ! laso Mo tomba mbi na lê ti sese so; na fade a honde mbi si lê ti Mo abâ mbi pëpe; mbi ga zo ti kpe ngbanga na zo ti fono na ndo sese. Fade tënë asi tongaso, zo so awara mbi, fade lo fâ mbi.” (Genèse 4:13, 14) Atâa so Caïn ayeke sala tënë lani na Jéhovah, atënë ti bibe ti lo ayeke lani gi mbeni demango tele na ndo ye ti sioni so aga na peko ti siokpari ti lo.

Bible atene na e: “Nzapa ake azo ti kpengba-li, me Lo mû grâce na azo so ayeke na tâ be-ti-molenge.” Ti sala tënë gi tongaso na Lo Ti Nduzu Ahon Kue, mo bâ mo tene lo yeke gi mbeni senge zo tongana e, ayeke fä ti tâ be-ti-molenge pëpe. (Jacques 4:6; Psaume 47:3; Apocalypse 14:7) A yeke duti nga fä ti yekiango ndo pëpe tongana e hinga ye so Mbeti ti Nzapa afa na ndo kusala ti Jésus Christ, me atâa so kue, e ke ti sambela na iri ti lo.​—Luc 1:32, 33.

A ye ti tene pëpe so Jéhovah ayeke ku na mbage ti e ti mû mbeni sambela so a leke atënë ni lekengo kozoni. Kota ye ayeke bê ti zo ni. (1 Samuel 16:7) Na kozo siècle ti N.E., mbeni turugu ti Rome ayeke dä so iri ti lo ayeke Corneille. Lo yeke “sambela Nzapa lakue.” Corneille, mbeni Gentil so a fâ ganza pëpe, ade lani ti mû tele ti lo na Nzapa pëpe. Atâa so ye oko afa pëpe so lo yeke sambela lani na iri ti Jésus, asambela ti lo “asi na nduzu na gbele Nzapa tongana ye ti dabe Lo.” Ngbanga ti nyen? Ngbanga ti so Jéhovah, so ayeke ‘tara bê ti zo,’ abâ so Corneille ayeke lani “zo so abata tënë ti Nzapa,” na zo so “akpe mbito ti Nzapa.” (Kusala 10:2, 4; aProverbe 17:3) Tongana a mû na lo hingango ye na ndo “Jésus Ti Nazareth” awe, Corneille awara yingo ti nzoni-kue na lo wara batême tongana disciple ti Jésus.​—Kusala 10:30-48.

Ti ko nda ni, a yeke pëpe ti azo ti fa mara ti asambela wa Nzapa ayeke mä ni. A lingbi ti si so mbeni Chrétien asala mbeni tënë na Nzapa, me lo glisa ti tene “na iri ti Jésus,” wala mbeni tënë tongaso, na hunzingo ni; tongana a yeke tongaso, a lingbi lo gi bê ti lo ahon ndo ni pëpe. Jéhovah ahinga akatikati ti e nzoni, na lo yeke na nzala ti mû maboko na e. (Psaume 103:12-14) E lingbi ti hinga biani na yâ bê ti e so tongana e mä na bê na ‘Molenge ti Nzapa . . . , tongana e hunda ye na lege ti ye so Nzapa aye, Nzapa ayeke mä e.’ (1 Jean 5:13, 14) Ye oko, tongana a yeke ti sambela na gbele ambeni zo, atâ Chrétien ayeke fa na yâ sambela ti ala so ala yeda na kusala ti Jésus na yâ ye so Jéhovah aleke, na so Mbeti ti Nzapa afa. Na mango yanga, ala yeke sala kue ti yekia Jésus na sambelango Nzapa na lege ti lo.