Nzoni Duti ti Mo Aga na Lege ti Nyen?

Na yâ mbeni kete kodoro na Afrika ti Do, maseka-koli Josué ayeke bala sewa ti lo nga na akamarade ti lo.a Na pekoni lo gue na kota gbata ti gi nginza. Ye oko, kete na peko ti so lo si na yâ gbata ni, beku ti lo atï kue tongana lo bâ so kâ a yeke ko nginza pëpe tongana kugbe ti mango.

BÊ TI Josué anze kue tongana lo gi ti leke dutingo ti lo ti tene a lingbi na gbata ni. Kota gbata ni ayeke biani nde mingi na ye so lo bi bê dä. Na oko ngoi ni, na yâ bê ti lo, Josué aye mingi ti kiri na tele ti sewa ti lo nga na akamarade ti lo na yâ kete kodoro so lo zia. Me mbito ti tene azo ti kodoro ni ahe lo asala lo mingi. Lo gi bê ti lo: “Ala yeke tene ande so mbi yeke buba zo ngbanga ti so aye akui na mbi na yâ gbata ni.”

Ye so akiri aso lo mingi ahon ayeke vundu so babâ na mama ti lo alingbi ti wara. Ala zia bê ti ala kue na ndo ti lo ti tokua nginza na ala. Na ngoi so lo yeke gi lege ti hon ndo ti songo ti bê ti lo, lo sala mbeni kua so akiri zo na peko teti l’heure mingi. Me atâa so kue, lo wara gi kete mbage ti ye so lo bi bê ti lo dä. Lo nze kue na peko ti ngangu kua so lo sala. Nga yenga na yenga, angoi so angbâ teti akusala ti Chrétien, so lo bâ ni na nene ni mingi, ayeke kiri gi na peko. Teti so lo yo mingi na songo ti sewa ti lo na ti angbele kamarade ti lo, vundu asala lo na lo bâ so lo yeke gi lo oko. Gbata ni amû na lo pëpe nzoni duti so agbu bê ti lo ngangu.

Atâa so a-iri nga na akodoro ni ayeke nde nde, ngangu ye so asi na Josué asi na azo fani mingi. A yeke pëpe bibe ti kion si apusu Josué ti gue na gbata ni, me nzala ti gi tâ nzoni duti. Ti lo, a yeke gi na yâ kota gbata si lo lingbi ti wara ni, pëpe na yâ kete kodoro. Biani, na ambeni ngoi mbeni zo alingbi ti wara mosoro, me a ye ti tene pëpe so lo wara tâ nzoni duti awe. A yeke biani tongaso pëpe teti Josué na a yeke duti ande nga tongaso pëpe teti azo mingi so atara ti sala oko ye so. Ye so apusu e ti hunda, ‘Nzoni duti ayeke nyen?’

Bango ndo ti azo na ndo nzoni duti ayeke nde nde. Mbeni bakari atene so nzoni duti ayeke “ndo so sioni ayeke dä pëpe” wala “ndo so mbito wala gingo bê ayeke dä pëpe.” Fadeso azo mingi abâ awe so a lingbi pëpe ti wara laso mbeni “ndo so sioni ayeke dä pëpe.” Ala yeke na ngia gi tongana ala bâ so ye agi bê ti ala pëpe, atâa ambeni ye so amû mbito angoro ala.

Mo tene ti mo nyen? Mo yeke gi nzoni duti na ndo wa? A yeke na yâ ti gbata? pëpe na yâ kete kodoro tongana ti so Josué atene na bê ti lo? Wala a yeke na yâ ti nginza? atâa ndo so wala lege so mo lingbi ti wara na ni. Peut-être a yeke na warango mbeni kota kamba? Atâa bibe ti mo ayeke tongana nyen na ndo so mo lingbi ti wara nzoni duti dä, a yeke ngbâ lango oke teti mo nga teti sewa ti mo?

Zia e bâ alege ota so azo mingi ayeke gi nzoni duti dä: guengo na mbeni kodoro; warango nginza; warango kota ndo. Na pekoni e yeke bâ ndo so e lingbi ti wara tâ nzoni duti so angbâ lakue lakue.

[Kete Tene na Gbe Ni]