Anzo Kusala Amû Gonda na Nzapa

NA LEGE ti nzo tambela ti ala nga na apendere kusala ti ala, atâ Chrétien amû gonda na Nzapa. (1 Pierre 2:12) A lingbi ti bâ ni na lege ti ye so asi na Italie na yâ angu so ahon ade ti ninga pëpe.

Na septembre ngu 1997, sese ayengi ngangu na ambage nde nde ti akodoro ti Marches na Ombrie, na a buba ada ndulu na 90 000. Fade fade abungbi ti aTémoin ti Jéhovah amû maboko na afon ala awamabe nga na ambeni zo nde. Ala mû a-caravane, aye ti lango na ndo ni, a-réchaud, a-groupe, na ambeni gbakuru nde so ayeke na bezoin ni. Amungo maboko so ahon tongaso pëpe na lê ti azo.

Mbeti-sango Il Centro atene: “Akozo zo ti si na aye ti mungo maboko na ando so sese ayengi dä ayeke aTémoin ti Jéhovah ti Roseto [mbeni kete kodoro ti Teramo] . . . Nde na so ala yeke bungbi tele ngoi na ngoi ti sambela, awakua be-ta-zo so ti Jéhovah asala kusala na mbeni lege so ayeke nzoni, ala mû maboko na azo so ahu pono, na gingo pëpe ti hinga lege ti vorongo ti ala.”

Mokonzi-gbata ti Nocera Umbra, mbeni oko ti agbata so sese ayengi dä mingi, asû na aTémoin: “Na iri ti mbi mveni, mbi kiri singila na i na bê kue teti maboko so i mû na azo ti kodoro ti Nocera. Mbi bi bê biani so mbi fa na gigi atënë ti bê ti azo ti gbata ni kue.” Nga, gbenyongbia so abâ tënë ti yâ ti kodoro ni amû na Congregazione Cristiana dei Testimoni di Geova (Kongregation Chrétien ti aTémoin ti Jéhovah) mbeni mbeti ti yekiango ndo nga na mbeni palata “ti duti fä ti kua nga na ngangu so ala sala na yâ akusala so andu kpale so asi na akodoro ti Ombrie na ti Marches.”

Na octobre, ngu 2000, mbeni moa so afuti ye amû yâ ti kodoro ti Piémont na banga ti Italie. Na ndo so nga, aTémoin asala ambeni ye hio ti mû maboko. Anzo kusala so nga ahon tongaso pëpe na lê ti azo. Kodoro ti Piémont amû na ala tongana matabisi mbeni lê ti wen so a sû mbeti na ndo ni teti “pendere kusala so ala sala na nzobe ti mû maboko na azo ti Piémont so moa amû yâ ti kodoro ni.”

Jésus Christ afa na adisciple ti lo: “I zia lumière ti i aza na gbele azo, si ala lingbi bâ nzo kusala ti i, na ala mû gloire na Babâ ti i so ayeke na yayu.” (Matthieu 5:16) Na ngia aTémoin ti Jéhovah amû gonda na Nzapa, pëpe na ala mveni, na salango “anzo kusala” so amû maboko na lege ti yingo na azo so ayeke ndulu na ala nga na ambeni lege nde.