E Sala Ye Kue So E Lingbi Sala!

“SALA ye kue so mo lingbi sala.” Tene so ayeke la ni mbeni wango ti mu maboko na zo, so mbeni oko ti Wabatango Bungbi ti aTémoin ti Jéhovah atene na mbeni missionnaire. Me ngbanga ti nyen ti mu mara ti senge wango so na mbeni wakua so ahinga ye mingi awe na yâ fini? Mingi ti amissionnaire ayeke pepe azo ti ngangu so lâ na lâ ayeke luti na gbele akete nyama, angbo, ndowâ, kobela, na akpale nde nde?

Ti tâ tene ni, amissionnaire Témoin ti Jéhovah ayeke akoli na awali so ayeke tongana tanga ti azo kue, aChrétien so kota ndoye ti ala teti Jéhovah na ti afon ala apusu ala ti gue ti sala kusala na yâ ti ambeni kodoro wande. Ala yeke sala na Jéhovah na ngangu ti ala kue, na bango ndo na mbage ti lo ti wara ngangu.​—aEphésien 6:10.

Ti manda tene mingi ahon na ndo kusala ti missionnaire, zia e ba so e yeke mu mbeni lango oko ti sala vizite na mbeni da ti missionnaire so akpa ambeni mingi na ti so ayeke na Afrika ti Do.

Lango Oko na yâ Kusala ti Missionnaire

A yeke ndulu na ngbonga mbasambala ti ndapelele. E si na da ti missionnaire na ngoi ti mu mbage na lisoro ti versê ti Mbeti ti Nzapa so a soro teti lango ni. Amissionnaire bale oko ni ayamba e na wâ, na ala leke place teti e na table ti mungo kawa ti ndapelele. Na ngoi so e yeke gi ti hinga tele, mbeni missionnaire oko ti wali, so asala kusala teti angu mingi awe, ato nda ti fa tene ti mbeni ye ti ngia so asi na lo na yâ kusala ti fango tene. Me lisoro ti e akaï tongana wamungo li ni na lisoro ti lango ni adabe ti azo so ayeke na ngia, so ngoi alingbi awe ti ba versê ti lango ni. Lisoro ni atambela na Français. Atä so e yeke tene pepe yanga ni so, e ba polele na lege so amissionnaire ni ayeke sala na tene so biani ala hinga ti tene yanga ti kodoro ni nzoni mingi.

Na peko ti lisoro na ndo ti Bible ni, a mu mbeni sambela so alondo na bê; na pekoni, ngoi alingbi awe ti mu kawa ti ndapelele. Tongana e yeke te na ngia mbeni pendere kobe so a sala na céréale, missionnaire so aduti na tele ti e awa e ti fâ mbeni bule na ndo ni. E fa na lo so e ye ka tene ti bule mingi pepe, me lo tene so fade e yeke duti ande na mbeni bibe nde na ngoi so e yeke tara a-bule so amaï na ndo ni so. Tongaso, e zia bule kete na ndo ti kobe ti e ti céréale ni. Lo tene tâ tene! A-bule so anzere mingi, a yeke sucré tongana crème glacée! Nga, ala tene na e so a yeke na yâ ti mbeni kete magasin so ayeke ndulu na tele ti da ti missionnaire ni si a zö pendere yongoro mapa ni so e yeke te.

Na peko ti kawa ti ndapelele, fade e yeke mu lango ni ti tambela na mbeni koli na wali ti lo so ayeke amissionnaire na so e yeke hiri ala Ben na Karen. A sala na e kozoni tene ti territoire ni so alë lengo mingi ti kodoro ti Afrika ti Do so, na e yeke na kota nzala ti ba wala atondo ni ayeke tâ tene.

Tongana e si na place ti kungo bus, e wara azo ndulu na 12 so ayeke ku. A ninga pepe, afon e missionnaire ato nda ti mbeni pendere lisoro na mbeni wali na molenge ti lo ti koli na ndo mbeni tene ti Bible. Teti e hinga ti tene Français pepe, e lingbi gi ti luti na ndo so, na ti fa ngia ti e na lege ti yanga ti e! Na ngoi so wali ni ayeke yeda ti mu apériodique ti Tour ti Ba Ndo na Réveillez-vous!, bus ni asi, na tongaso zo kue atara ti ma na yâ ni legeoko! Na ngoi so e yeke gbugburu tele ti lï na yâ bus ni, azo ni so wungo ti ala ayeke mingi apusu e na peko. A yeke ye ti ngangu ti luti na ndo gere ti e tongana e yeke tara ti gue na peko ti bus ni. Na ngoi so wakpengo na kutukutu ni azia wâ na kutukutu ni ti gue, e gbu tele ni ngangu. Ngoi na ngoi, bus ni ayeke luti na ngangu na mbeni ndo, na azo mingi ayeke lï, na e pete tele mingi ahon. E he mbeni kete ngia na afon e so ayeke na yâ ti kutukutu ni, na ala sala nga legeoko. E ye fade biani ti sala tâ lisoro na ala!

Na ngoi so bus ti e ayeke kpe na loro, e bi lê ti e na mbage ti fenêtre na gigi ti ba akusala nde nde so ayeke sala na tele ti lege. Awali use ayeke tambela na tele ti mba, na ala yö anengo kungba na li ti ala. Mbeni oko na popo ti ala ayö mbeni kota ta ti ngu na li ti lo. Mbeni bubangele azi yâ ti mbeni balangeti na tele ti lege, na lo zia na ndo ni ambeni kete kungba ti ngele ngangu pepe so lo ye ti kä. Na ndo kue, a yeke wara azo so ayeke vo wala ayeke kä ye kue so a ba a lingbi ti vo na ti kä ni.

Fade fade, Ben so aduti na tele ti mbi aba so mbeni ye ayeke kpo gere ti lo. A lingbi ti duti nyen? Azo mingi mingi ayeke na yâ ti bus ni, me ye ni angbâ lakue ti kpo gere ti lo. Lo tara ti ba ndo na gbe ni. Na yâ ti mbeni sakpa na tele ti gere ti lo, a yeke mbeni canard so ngoi na ngoi lo yeke sigigi na li ti lo na yâ ti sakpa ni ti dë lo! Ben atene so mveni ti canard ni ayeke gue na lo peut-être na gala ti kä lo.

Tongana e si na territoire ti e, e yeke na ngia ti manda so e yeke gue ande ti sala vizite na mbeni tâ vaka ti Afrika. Tongana e ga ndulu na kozo da ni, Ben apika maboko ti lo ngangu ti gboto lê ti azo ti da ni. A yeke tongaso si azo ayeke “pika yanga-da” na mbage ti sese so. Mbeni pendere-koli asigigi na lo tene so lo yeke na kusala mingi ti sala, me lo hunda na e ti kiri ti ga na pekoni na ndapelele ni so.

Na da ti pekoni, e tingbi na mbeni wali so atene mbeni yanga so Ben amä ni pepe. Wali ni ahiri molenge ti lo ti koli, na lo hunda na lo ti kiri peko ti tene so Ben aye ti tene. Tongana Ben ahunzi tene ti lo, wali ni ayeda ti mu mbeni brochure so asala tene na ndo Bible, na molenge ti lo atene so fade lo yeke fa pekoni na lo. Na ota da ni, e wara apendere mingi so aduti na gbele ni. Use na popo ti ala alondo hio ti zia ngende ti ala si agene alingbi duti dä. Na pekoni, mbeni lisoro ti wâ ato nda ni na ndo tene ti salango kusala na croix na yâ vorongo. Ala leke ti kiri ti sala lisoro mbeni na yenga ti peko. Fadeso, ngoi alingbi awe ti kiri ti ba pendere-koli so e wara na kozo da ni, na so ayeke fade na akusala mingi ti sala. Na mbeni lege, lo mä awe lisoro so e sala na apendere so ayeke fade na mbage ti lege ni na gbe ni. Lo yeke na ahundango tene mingi na ndo Bible, na lo hunda ti tene a manda Bible na lo. Na pekoni so lo bi lê na ndo carnet ti programme ti lo, Ben ayeda ti kiri ti ba lo na oko ngoi ni na yenga ti peko. Tongana e yeke na lege ti kiri na da ti missionnaire teti tengo kobe ti midi, Ben na Karen afa so a lingbi ala leke programme ti kusala ti ala ti mandango Bible nzoni mingi, ngbanga ti so ala lingbi hio ti to nda ti amandango Bible mingi ahon so ala lingbi ti sala.

E gonda ala teti nzoni tenengo Français ti ala. Ben afa so lo na Karen asala kusala tongana amissionnaire teti angu omene, na ala to nda ti tene yanga ti Français nzoni awe. Ala fa na e so mandango mbeni fini yanga ti kodoro ayeke kete ye pepe, me gbungo ngangu aga na ye ti nzoni.

Na ngbonga 12 na ndambo, amissionnaire ni kue abungbi na tele ti table teti kobe ti midi. E mä so lâ oko oko, a yeke soro mbeni missionnaire nde nde teti leke kawa ti ndapelele na ti tö kobe ti midi, nga teti sukulango asembe na pekoni. Laso, mbeni missionnaire ti wali azö pendere kondo na ayôro a-pomme de terre, na lo zia na tele ni salade ti tomate: mbeni kobe so lo hinga ti tö nzoni mingi!

Ye nyen Ben na Karen aleke ti sala na peko ti midi? Ala tene so azo ti kodoro ni kue akpe ti tambela na gbe ti lâ na popo ti ngbonga oko na ota ti peko ti bekombite; tongaso, mingi ni, amissionnaire ayeke sala kusala na mbeni mbage ti ngoi ni so ti manda ye wala ti hu tele kete. Bê ti e adö pepe tongana Karen atene na e so a yeke mu ngoi mingi pepe teti afini missionnaire ti sala ye alingbi na ngobo so!

Na peko ti hungo tele ti midi, e kiri na yâ ti kusala ti fango tene. Mbeni koli so asala nzala ti tene ni, na so Ben atara fani mingi ti kiri ti tingbi na lo ayeke lakue na ndo ti lo pepe, me apendere-koli use asigigi na yanga-da ni na ngoi so Ben apika maboko ti lo. Ala tene na e so mveni ti da ni asala tene ti avizite ti Ben, na lo wa ala na bê kue ti wara buku Hingango Ye So Ague na Fini ti Lakue Lakue, so ayeke sala na kusala ti manda Bible. E yeke na ngia ti zia na ala mbeni buku so oko. Na pekoni, e mu mbeni bus so ayeke gue ande na e na mbeni ndo so Karen ayeke manda Bible na mbeni wali so asala nzala ti tene ni.

Na ngoi so e yeke kpe na ndo lege ni so asi singo na azo, Karen atene na e so lo tingbi la ni wali so na mbeni ngoi so lo na wali ni use kue ayeke na yâ ti mbeni taxi legeoko na ambeni zo nde. Karen amu na wali ni mbeni tract ti diko na ngoi so taxi ni angbâ ti hon na ala. Wali ni adiko tract ni, na pekoni lo hunda ti wara mbeni nde. Lo diko ni na kota nzala mingi ahon. Na nda ti tambela ni, Karen aleke ti sala vizite na wali ni na da ti lo, na lo to nda ti mbeni pendere mandango ye na yâ brochure Ye Wa Nzapa Ahunda na E? Laso, Karen ayeke gue ti sala Ye ti Manda oku ti brochure ni.

E wara ngia mingi na peko ti lango so e mu teti kusala ti fango tene, me e yeke na ambeni hundango tene na li ti e ti hunda na ndo kusala ti missionnaire. Amissionnaire so atisa e atene so tongana e si ande na yanga-da, fade ala yeke tö mbeni kete kobe na e, na fade ala yeke kiri tene na ahundango tene ti e.

Tongana Nyen Ala Yeke Leke Tele si Ala Nze Hio Pepe

Na ngoi so e yeke te yorongo para, yongoro mapa, na fromage, e manda ye mingi ahon na ndo fini ti amissionnaire. Mingi ni, lango ti lundi ayeke mbeni lango so amissionnaire amu ti hu tele wala ti sala aye ti ala mveni. Mingi ti amissionnaire ayeke mu mbeni ngoi na lango ni so ti sû mbeti na sewa ti ala wala akamarade ti ala. Asango so alondo na kodoro ti ala ayeke kota ye mingi teti ala, na amissionnaire ayeke na ngia ti tokua ambeti nga ti wara ni.

Teti so amissionnaire alango na ndo oko na ayeke sala kusala na tele ti mba, a yeke kota ye mingi teti ala ti sala lisoro nzoni na afon ala missionnaire na salango songo ti kamarade na ala nga na salango lisoro na ndo aye ti yingo. Ti sala tongaso, na lundi oko oko na lakui, amissionnaire ayeke manda Bible na lege ti Tour ti Ba Ndo, nde na batango nzoni programme ti mandango Bible ala mveni. Ben afa so tongana amissionnaire alondo na ando nde nde na alango na ndo oko, akete tene ayeke manke pepe, me aye ti yingo so a mu na lege ti mandango ye na sewa amu maboko na ala ti duti na siriri nga na beoko na popo ti ala. Lo gboto lê nga so a yeke mu maboko na zo ti ne tele ti lo mveni ahon ndo ni pepe.

Tâ be-ti-molenge ayeke nga kota ye mingi. A tokua amissionnaire pepe ti tene azo asala kusala teti ala, me ti tene ala sala na azo. Amissionnaire ti e aba so mbeni oko ti angangu ye ti tene na ayanga ti kodoro kue ayeke “pardon,” mbilimbili tongana mbeni zo aye ti fa vundu so lo yeke na ni teti mbeni ye so lo tene wala lo sala na mbana pepe. Ben adabe e na tapande ti Abigaïl na yâ Bible, so amu pardon teti sioni salango ye ti koli ti lo, na tongaso lo sala si mbeni ye so alingbi fade ti ga na kpale adë. (1 Samuel 25:23-28) Kode ti “duti na siriri” ayeke mbeni kota lengo ti dutingo mbeni nzoni missionnaire.​—2 aCorinthien 13:11.

Fani oko na yâ ti nze oko, amissionnaire ni ayeke leke mbeni bungbi ti sala lisoro na ndo aye so ayeke ndu azo ti sewa ni, nga na agbiango ye ti sala na yâ programme ti ngbâ ti bata da ti missionnaire ni nzoni. Na pekoni, ala yeke te mbeni kobe so ayeke nde. E ba ye so tongana mbeni lekengo ye so alingbi tâ na lege ni, nga so anzere.

Na peko ti kete kobe so e te, e sala kete tambela na yâ da ti missionnaire ni. E ba so, atä da ni ayeke kota wala ti nginza mingi pepe, amissionnaire ayeke sala kusala maboko na maboko ti bata ni nzoni si a duti na saleté oko pepe. A yeke wara na yâ ni mbeni frigo, mbeni masini ti sukulango bongo, na mbeni four. Karen afa na e so na yâ ti akodoro ti ndowâ tongana ti so na Afrika ti Dö, a lingbi nga ti wara masini ti tokuango dë. Ando ti lango so alingbi na ni, nzoni kobe, na salango hange kete na seni ti ala amu maboko na amissionnaire ti ngbâ ngangu na ti lë lengo.

Zia Lê Mingi na Ndo Aye ti Nzoni

Bê ti e adö na aye kue so e ba. Peut-être kusala ti missionnaire ayeke nga teti e? Tongana nyen e lingbi ti hinga ni? Amissionnaire so atisa e afa na e ambeni ye ti gbu li dä.

Kozoni kue, ala tene na e so amissionnaire Chrétien ayeke gue pepe ti sala ngia. Ala yeke gi azo ti bê ti mbilimbili so aye ti manda tene na ndo apendere zendo ti Nzapa. Amissionnaire amu angbonga 140 nze oko oko ti fa tene; tongaso, a yeke kota ye mingi ti duti na ndoye teti kusala ni.

E hunda: ‘Me, ye ni ayeke tongana nyen na angbo, akadâ, na akete nyama?’ Ben atene na e so atä a lingbi ti wara ala na ando mingi so a tokua amissionnaire dä, na nda ni, amissionnaire ayeke duti na mbito ti ala mbeni pepe. Lo tene nga so ndo oko oko so a tokua amissionnaire dä ayeke na mbeni ye ti lo ti nzoni so ayeke nde na atanga ni, na tongana ngoi ni ayeke hon, amissionnaire ayeke zia lê mingi gi na ndo aye ti nzoni ti ndo so a tokua ala dä. A ninga pepe, aye so na tongo nda ni a ba ni “nde mingi,” aga ye so aba ni lakue, na a lingbi même ti ga mbeni ye so amu ngia na zo. Mbeni missionnaire ti wali so asala kusala na Afrika ti Do teti angu mingi kozoni si akungba na yâ sewa ti lo apusu lo ti kiri na kodoro ti lo, atene so a duti la ni ngangu na lo mingi ti zia territoire ti lo ahon ti zia kodoro ti lo mveni angu mingi kozoni. Territoire ti lo ti missionnaire aga ndo ti lo.

Mo Yeke Ndulu ti Sala Ni?

Ben na Karen afa na e atene mingi ti gbu li dä. Ka ti mo? Mo gbu li kete na ndo salango kusala tongana mbeni missionnaire na mbeni kodoro-wande? Tongana a yeke tongaso, mo lingbi peut-être ti duti ndulu mingi ti sala kusala so ahon ye so mo yeke gbu li dä. Mbeni oko ti akota ye so a hunda ayeke ti duti na ndoye teti kusala ti ngoi kue na ti yekia kusala ti mungo maboko na azo. Dabe mo so amissionnaire ayeke pepe azo so ahon tanga ti azo kue, me ala yeke akoli na wali tongana azo kue. Ala yeke sala ye kue so ala lingbi ti sala ti tene kota kusala ti ala atambela nzoni.

[Afoto na lembeti 27]

Lango oko oko ato nda ni na salango lisoro na ndo mbeni versê ti Bible

[Afoto na lembeti 28, 29]

Atapande ti aye so a yeke ba na Afrika

[Foto na lembeti 29]

Fini ti missionnaire alingbi ti mu ngia mingi