Mo Lingbi ti Sala si Sese Aga Mbeni Ndo ti Nzoni Ahon? — BIBLIOTHÈQUE NA NDÖ TI INTERNET Watchtower

Mo Lingbi ti Sala si Sese Aga Mbeni Ndo ti Nzoni Ahon?

“Aye ti poroso alingbi pepe ti leke tâ gunda ti anzoni ngobo ti salango ye na popo ti azo. Ala yeke pepe na anzoni gbakuru so alingbi ti mu lege ti kiri ti leke atene ti mabe ti akotara so andu nzoni tambela ti zo. Même aye so aleke na ndara so ayeke nzoni ahon atanga ni kue alingbi pepe ti kiri na angbele salango ye so andu lege so koli na wali agi ti hinga tele wala mariage, ti sala si ababâ ayö kungba ti ala na mbage ti amolenge ti ala, ti kiri ti maï na yâ zo ngonzo wala kamela so lo yeke na ni giriri kozoni na gbele ambeni ye . . . Ndia alingbi pepe ti lungula mingi ti akota kpale ti tambela ti zo, so ayeke bi vundu na bê ti e.”

MO YEKE ndulu ti yeda na atene so ti mbeni ngbele wamungo maboko na yanga-ti-komande ti Amerika? Tongana a yeke tongaso, ye nyen ayeke duti yorö ti akpale mingi so laso aga na lege ti salango bê, ndoye so atia azo na yâ asewa, atambela ti kirikiri, hingango ye oko pepe, na ambeni ye nde so abuba ye, so ayeke te yeke yeke gunda ti bungbi ti azo? Ambeni zo aba ti ala so yorö ayeke dä oko pepe, tongaso ala mu lege na fini ti ala ti wara nzoni kue so ala lingbi wara dä. Ambeni zo nde abi bê so mbeni lâ, fade mbeni mokonzi so salango ye ti lo apika bê ti azo na so ayeke za na lege ti akode ti lo (peut-être même a lingbi ti duti mbeni mokonzi ti lege ti vorongo) ayeke ga ande, na lo yeke fa na ala nzoni lege.

Biani, a sala fadeso angu saki use awe, azo aye la ni ti zia Jésus Christ gbia ngbanga ti so ala ba so a yeke Nzapa si atokua lo, na fade lo yeke duti ande mbeni mokonzi so alingbi kue ahon tanga ti amokonzi kue. Ye oko, tongana Jésus ahinga bibe ti ala, hio lo gboto tele ti lo yamba. (Jean 6:14, 15) Ngoi kete na pekoni, lo kiri tene tongaso na mbeni gouverneur ti Rome: “Royaume ti mbi ayeke mbage ti sese so pepe.” (Jean 18:36, NW) Ye oko, na ngoi ti laso, a yeke gi kete wungo ti azo si aluti tongana ti so Jésus aluti giriri; même amokonzi ti vorongo so atene ala yeke adisciple ti lo asala tongaso pepe. Ambeni na popo ti ala atara ti sala si sese so aga ndo ti nzoni ahon, na tarango ti sala ngangu na ndo amokonzi ti sese wala na mungo mbeni kota ndo ti poroso ala mveni. E lingbi ti ba ni na bingo lê na aye so asi na yâ angu 1960 na 1970.

Angangu ti Alege ti Vorongo ti Sala si Sese Aga Nzoni Ahon

Na hunzingo ti angu 1960, ambeni wandara ti alege ti vorongo na yâ akodoro ti Amerika ti Mbongo ato nda ti tiri teti awanzinga na azo so a sala ngangu na ala. Ti sala tongaso, ala sigigi na ye so a hiri ni Théologie de la libération (mbeni senda-ndara ti lege ti vorongo so ayeke tiri teti liberté ti azo), so na yâ ni, a ba Christ pepe gi tongana mbeni zo ti ga na salut na lege so Bible afa, me nga zo ti ga na salut na lege ti poroso na ti konomi. Na États-Unis ti Amerika, ambeni mokonzi ti Église so agi bê ti ala ngangu mingi na bubango ti akpengba-ndia ti tambela ti azo abungbi tele na asigigi na mbeni bungbi so a hiri ni Majorité Morale. Ye so bungbi ni azia na gbele lo ti sala ayeke ti mu kungba ti poroso na azo so ayeke bi bê ti sigigi na andia teti nzoni duti ti sewa. Legeoko nga, na yâ mingi ti akodoro ti aMusulman, ambeni bungbi atara ti kanga lege na guengo na li ni ti petengo goro na ti asalango ye ahon ndo ni na gingo ti maï dutingo ndulu mingi ahon na Coran.

Mo mä na bê so sese aga mbeni ndo ti nzoni ahon ngbanga ti amara ti ngangu tongaso? Aye so asi afa so, mingi ni, akpengba-ndia so andu nzoni tambela angbâ ti kiri gi na peko, na kangbi so ayeke na popo ti zo ti mosoro na zo ti nzinga angbâ lakue ti kono, même na yâ akodoro so tene ti théologie de la libération amaï dä mingi.

Ngbanga ti so bungbi ti Majorité Morale asi pepe na akpengba ye so lo zia na gbele lo ti sala na États-Unis, walekengo bungbi ni, Jerry Falwell, akanga yanga-da ti bungbi ni na ngu 1989. Ambeni bungbi nde amu place ti lo. Ye oko, Paul Weyrich, kozo zo ti salango kusala na tene “majorité morale” asû tene so na yâ mbeni mbeti-sango (Christianity Today): “Même tongana e hon na ngangu na lege ti poroso, ahongo na ngangu ti e ayeke ga pepe na mara ti akpengba-ndia ti salango ye so e bi bê so ayeke kota ye mingi.” Lo sû nga na mbeti: “Ngobo ti anzoni salango ye ti azo ayeke ga tongana mbeni dû ti afungo ngu so asua, so yâ ni ayeke kono lakue mingi ahon ti kozo. E tï na yâ mbeni kota son so a ba ni kozo pepe, mbeni tingo so ayeke kota mingi si a hon ndo ti aye ti poroso.”

Cal Thomas, mbeni wasungo ambeti-sango na abuku, afa ye so lo ba tongana kota kpale na yâ ngangu so a yeke sala ti yä na nduzu salango ye ti azo na lege ti aye ti poroso, lo tene: “Tâ gbiango ye alondo na bê ti zo oko oko, me a ga pepe na lege ti a-vote so a yeke sala na peko ti tele, teti so akozo kpale ti e aluti pepe na ndo konomi na poroso, me na ndo tambela nga na akpengba-ndia so andu lege ti vorongo.”

Me tongana nyen mo lingbi ti leke akpale so andu tambela na akpengba-ndia ti lege ti vorongo na yâ mbeni sese so a yeke wara pepe mbeni ndia oko teti azo kue, so na yâ ni azo asoro teti ala mveni ye ti nzoni na ye ti sioni? Tongana azo so ayeke sala ngangu mingi na so ayeke na anzoni bibe, atä ala yeke azo ti lege ti vorongo wala pepe, alingbi pepe ti sala si sese aga mbeni tâ ndo ti nzoni ahon, ka zo wa alingbi ti sala ni? Tongana ti so e yeke ba ande na yâ article ti peko, mbeni kiringo tene ayeke dä. Biani, a luti tâ na ndo anda ti tene so apusu Jésus ti tene so Royaume ti lo ayeke ti sese so pepe.

[Lingu ti afoto na lembeti 2]

[Lingu ti afoto na lembeti 3]