Tâ Mabe A Ngbâ ti Wara ni Lakue?

“Mabe ayeke mbeni kpengba ziango bê so ayeke na fini na yâ nzobe ti Nzapa; a yeke tâ ye biani tongaso wamabe ayeke ndulu ti kui ngbanga ni fani mingi.”​—MARTIN LUTHER, 1522.

“A lingbi ti tene so na yâ ye kue e yeke fadeso mbeni bungbi ti azo so na yâ ni mabe nga na asalango ye ti aChrétien aga ndulu ti glisa biani.”​—LUDOVIC KENNEDY, 1999.

ABANGO NDO na ndo ti mabe ague nde nde mingi. Giriri, azo mingi amä na bê na Nzapa. Fadeso, na yâ sese ti dengo kite na ti pasi, tâ mabe na yâ Nzapa nga na yâ Bible ayeke glisa hio.

Tâ Mabe

Ti azo mingi, “mabe” aye gi ti tene dutingo na mbeni tene ti mabe ti alege ti vorongo wala ti mu peko ti mbeni lege ti vorongo. Ye oko, na yâ ti Bible, “mabe” aye mbilimbili ti tene ziango bê kue, mbeni kpengba mango na bê kue so alingbi ti yengi lâ oko pepe na yâ Nzapa nga na yâ azendo ti lo. A yeke mbeni lengo so amu lege ti hinga na mbeni disciple ti Jésus Christ.

Na mbeni ngoi, Jésus Christ asala tene na ndo nene ti sambela na ti “zia pepe.” Na salango tongaso, lo hunda mbeni tene ti hinga wala na ngoi ti e a lingbi biani ti wara tâ mabe. Lo hunda: “Tongana Molenge Ti Zo asi, fade Lo wara mabe [so] na sese?” Ngbanga ti nyen lo hunda mara ti tene tongaso?​—Luc 18:1, 8, NW, kete tene na gbe ni.

Mabe so Aglisa

Aye mingi alingbi ti sala si azo aglisa mabe so ala lingbi ti duti na ni. Na popo ti aye so a wara akpale na atara so asi na yâ fini ti lâ oko oko. Na tapande, Wagingo nda ti Bible Michael Goulder ayeke la ni prêtre ti mbeni paroisse na Manchester, Angleterre, na ngoi so mbeni lapara asala ndao na Munich na ngu 1958, na azo mingi ti bungbi ti pikango ndembo ti gere ti Manchester United akui dä. Na yâ ti mbeni kuasingale ti BBC, Joan Bakewell, wagosingale ni, atene so Goulder “ahinga pepe ye so lo lingbi ti sala na gbele kota vundu ti azo so.” Mbeni ye so asi na pekoni ayeke so lo “glisa mabe ti lo na yâ mbeni Nzapa so ayôro tele ti lo na yâ ye so a diko ti si na yâ fini ti zo.” Goulder atene so lo mä na bê so “Bible ayeke pepe . . . tene so alondo na Nzapa mveni na ayeke gi tâ tene” me, nde na so, “a yeke tene so alondo na zo mveni na so alingbi ti tene mvene, so peut-être lo sû ambeni tene ni na gbe ti yingo ti Nzapa.”

Ngoi na ngoi mabe ayeke kiri gi na peko yeke yeke. A yeke ye so asi na tapande ti wasungo-mbeti nga na wagosinga Ludovic Kennedy. Lo tene so ngbele ye na ngoi so lo de kete molenge, “na ambeni ngoi atene ti kite nga na agingo bê [na ndo ti Nzapa] atambela na asala si dengo kite ti [lo] akiri akono.” A ba so zo oko pepe alingbi la ni ti mu na lo anzoni kiringo tene na ahundango tene ti lo. Kuâ ti babâ ti lo na kota ngu-ingo asala ye mingi na ndo mabe ti lo so awoko kozoni awe. A mä pepe asambela so a tene ti “bata e na aye ti sioni ti ngu-ingo nga na asalango ngangu ti wato” na ngoi so akota mangboko ti bira ti Zamani aga ti sala bira na afuti mangboko ti yongo azo, so babâ ti lo ayeke la ni na ndo ni, na ngoi ti Use Bira so Amu Sese Kue.​—All in the Mind​—A Farewell to God.

Aye tongaso ayeke si lakue. Bazengele Paul atene: “Mabe ayeke na azo kue pepe.” (2 aThessalonicien 3:2) Mo tene ti mo nyen? Tâ mabe na yâ Nzapa nga na yâ Tene ti lo angbâ lakue na yâ sese so dengo kite ague na li ni mingi? Ba ye so article ti peko atene na ndo ni.