Duti na Bê ti Kiri Singila na Wara Ngia

MBENI mbeti-sango ti Canada, Calgary Herald, atene: “Bibe so apusu zo ti kiri singila ayeke mbeni kpengba ye na yâ aye so zo ayeke manda na yâ ti fini ti lo.” Mbeti-sango Herald afa peko ti tene ti ambeni wamandango ye ti kete da-mbeti, so ngu ti ala ayeke gumbaya, so wafango ye na ala ahunda na ala ti sû na mbeti aye so ala yeke kiri singila ndali ni. Mbeni pendere oko atene so lo kiri singila teti azo ti sewa ti lo ‘teti so ala yeke bata lo.’ Mbeni kete molenge ti wali nga akiri singila teti azo ti sewa ti lo, na lo tene: “Ala bata mbi nzoni, na seni; ala ba lege ti aye so atia mbi, ala fa ndoye na mbi, ala mu kobe na mbi, na tongana a yeke fade pepe teti ababâ na mama ti mbi, ka mbi yeke pepe na ndo sese so.”

Bê ti kiri singila pepe ayeke sala si kota suingo bê aga. Na lege ti tene ti mbeni wasenda-ndara na ti alege ti vorongo, J. I. Packer, “a leke e ti duti na fini na lege ti mbeni songo na Nzapa nga na amba ti e.” Ye so adabe e na wango ti ndara so Bible amu, a sala fadeso angu ngbangbo mingi awe, na so atene: “I kiri singila.” (aColossien 3:15, NW) Atene ti merci na ti kiri singila so alondo na bê, so a fa ni na mbage ti ambeni zo, amu maboko ti lë asongo ti ndoye.

Na ndo ni, na yekiango tele na popo ti e nga na bango amba ti e na nene ni, e yeke fa nga bê ti kiri singila ti e na Jéhovah, na lo yeke bi bê dä. Bible atene: “Teti lê ti L’Eternel [“Jéhovah,” NW] akpe na ndo nde nde na lê ti sese kue ti fa ngangu ti Lo teti ala so bê ti ala ayeke mbilimbili na Lo.” (2 Chronique 16:9) Nzapa adë bê ti e so lo yeke dabe na lo yekia ndoye so azo afa teti iri ti lo. (aHébreu 6:10) Biani, e yeke na anda ti tene ti fa bê ti kiri singila ngbanga ti so lengo ti Nzapa so, tongana a fa ni na gigi lâ oko oko, ayeke mu ngia na Jéhovah na a yeke sala si ngia ti e mveni amaï. A yeke tongana ti so aProverbe 15:13 atene: “Bê so ayeke na ngia asala si lê ti zo asi na ngia.”