Atene so Azo Ahunda

Na ndo Molenge ti Nzapa, aColossien 1:16 atene so “a leke ye kue na lege ti Lo na teti Lo.” Na lege wa a leke ye kue “teti” Molenge ti Nzapa, Jésus?

Jéhovah asala kusala na Molenge ti lo ngengele oko tongana wakua ti kode na lekengo tanga ti aye kue, so ti tene, aye kue, nde na Jésus lo mveni. (aProverbe 8:27-30; Jean 1:3) A yeke na lege ni ti tene Molenge ni awara ngia na yâ akusala so; na lege so, ala yeke “teti” lo.

E hinga so ababâ na mama ayeke ku ti wara ngia mingi na yâ amolenge ti ala ti koli na ti wali so ala yeke dü, na fani mingi, ala yeke wara ngia so. Tongaso, mato ti Mbeti ti Nzapa asala tene ti ‘molenge so babâ ti lo awara ngia na yâ lo.’ (aProverbe 3:12, NW; 29:17) Legeoko nga, Jéhovah Nzapa awara ngia na yâ Israël tongana azo ti lo ayeke la ni be-ta-zo. (Psaume 44:4 [44:3, NW]; 119:108; 147:11) Lo wara nga ngia na yâ be-biani ti abe-ta-zo ti lo, même juska na ngoi ti e.​—aProverbe 12:22; aHébreu 10:38.

Tongaso, a yeke na lege ni teti Nzapa ti sala si fon lo na kusala, Jésus, awara ngia na yâ ye so lo sala. Biani, aProverbe 8:31 (NW) atene so Molenge ni ‘awara ngia teti sese ti lo so alë lengo, na aye so lo ye mingi ayeke la ni na popo ti amolenge ti zo.’ A yeke na lege so si aColossien 1:16 atene: “A leke ye kue na lege ti Lo na teti Lo.”