“Ye Nyen Ayeke Kporo na France?”

“Liberté, liberté so a ndoye ni mingi,” ayeke atene so alondo na yâ ti “La Marseillaise,” bia-lombe ti kodoro ti France. Biani, liberté ayeke mbeni ye so a lingbi a ba ni na nene ni mingi. Ye oko, ambeni ye so asi na France ade ti ninga pepe asala si azo agi bê ti ala so a yeke buba akozo liberté ti azo. A yeke ndali ni la si, na vendredi lango 3 ti nze ti novembre ngu 2000, aTémoin ti Jéhovah saki mingi akangbi mbeni tract so ayeke nde, so wungo ni kue ayeke kutu 12, na so li ti tene ni ayeke “Que se trame t-il en France? Les libertés pourraient-elles régresser?” (Ye nyen ayeke kporo na France? Fade aliberté alingbi ti kiri na peko?)

TETI angu mingi fadeso, abungbi so ake tene ti asecte nga na azo ti poroso nde nde abi tene na li ti aTémoin ti Jéhovah na France. Ye so aga na akpale na aTémoin oko oko, na akongregation ti ala nga na yâ kodoro ni kue. Ye oko, na lango 23 ti nze ti juin ngu 2000, Conseil d’État, kota da-ngbanga ti France so aba tambelango ti aye, amu mbeni kpengba desizion so azo angbâ ti dabe na ni so ayeda na tene ti akete da-ngbanga 31 na ndo ti atene 1 100 so ala fâ ngbanga ni. Kota da-ngbanga ni ayeda so lege ti vorongo ti aTémoin ti Jéhovah ague legeoko na ndia ti France na tongaso aDa ti Royaume ti ala alingbi pepe ti futa lampo tongana tanga ti ambeni lege ti vorongo.

Ye oko, na bingo bê oko pepe na desizion so, Ndokua ti Gbenyon Gbia so Aba Tene ti Nginza ti France angbâ lakue ti ke na aTémoin ti Jéhovah droit so ndia amu na abungbi ti vorongo ti futa pepe lampo. Ndokua ni ahunda na ngangu na aTémoin nga na afon ala na yâ ti akongregation 1 500 na France ti futa na ndo ti a-offrande kue so ala mu lampo ti pata 60 na ndo pata 100. Na ngoi so da-ngbanga angbâ ti ba tene ni.

Nda ti kapa ti kangbingo tract so a sala tene ni kozoni ayeke ti fa na gigi tene ti ndia so zo agbu nda ni pepe na ti gboto lê na ndo ti aye so alingbi ti si na lege ti hundango lampo na ngangu tongaso, nga na yâ andia so a ye ti zia na sese so alingbi ti buba liberté ti lege ti vorongo teti azo kue.a

Mbeni Lango so Ayo

Na ngbonga use ti ndapelele, aTémoin ti ambeni kongregation ato nda ti kangbi tract ni na ndo ti kungo train, na gigi ti a-usine nga na pekoni na a-aéroport. Na ngbonga omene, Paris ato nda ti zingo. Azo ndulu na 6 000, so amu tele ti ala mveni na nzobe ti sala ni, aluti na ando so a soro ni nzoni ti tingbi na azo mingi ti kodoro ni so ayeke gue na ndo ti kusala ti ala. Mbeni maseka wali atene: “Ye so ala sala teti liberté ti vorongo ayeke nzoni mingi. Tene ni a ba pepe gi aTémoin ti Jéhovah.” Na Marseilles, aTémoin ahon 350 amu tract na azo na ando ti kungo métro nga na ndo ti lege. Na yâ ti ngbonga oko, da-singa ti kodoro ni asala tene ti kapa ti kusala ni, na tenengo na awamango lo ti zia bê ti ala adö pepe tongana aTémoin ti Jéhovah aga ndulu na ala. Na Strasbourg, ndo so Court Européenne des Droits de l’Homme (Da-ngbanga ti Poto so Aba Lege ti Droit ti Zo) ayeke dä, azo so ayeke na ndo ti kungo a-train aluti na molongo na be-nze-pepe ti wara tract ti ala mveni. Mbeni zo ti ndia atene so, atä so lo kangbi abibe ti e pepe, lo yeke ba peko ti tene ti e na kota nzala, teti tiri ti e ayeke kota ye nga mbilimbili.

Na ngbonga miombe, atä so kota ngu-nduzu apika, aTémoin 507 ti gbata ti Grenoble, na tele ti ahoto ti Alpes, agi azo na ndo ti alege wala azia tract ni na yâ abozo-mbeti ti ada. Na bango so mbeni ye ayeke tambela, azo so agboto akutukutu nga na atram (akete train so ayeke tambela na yâ ti gbata) aluti ti hunda mbeni tract. Na gbata ti Poitiers na mbage ti do, azo so amu train na asi na ngbonga gumbaya awara awe tract ni na ndo so ala londo dä. Na Mulhouse, ndulu na katikati ti Zamani, a zia awe na tïtî azo atract 40 000.

Ti si na ngbonga bale oko, akongregation mingi akangbi ahon ndambo ti atract ti ala awe. Na ngoi so angbonga ti ndapelele ayeke gue na li ni, azo mingi pepe ake tract ni, na a wara gbâ ti apendere lisoro. Na Besançon, gi na kilomètre 80 ti katikati ti Suisse, mbeni pendere koli afa na gigi nzala ti Bible na lo hunda ngbanga ti nyen Nzapa azia lege na pasi. Témoin ni atisa lo ti sala tanga ti lisoro ni na yâ ti Da ti Royaume so ayeke ndulu, ndo so ala to nda ti manda Bible fade fade na koli ni na yâ ti brochure Ye Wa Nzapa Ahunda na E?

Na midi, aTémoin mingi amu ngoi ti hungo tele ti ala ti fa tene teti ngbonga oko wala use. Na peko ti midi ni kue, a ngbâ ti kangbi tract ni, na akongregation mingi ahunzi na ngbonga ota wala osio ti peko ti bekombite. Na Reims, li-kodoro so aleke champagne dä, ambeni zo so amanda Bible wala so abungbi na aTémoin ti Jéhovah giriri afa nzala ti ala ti kiri ti bungbi na kongregation. Na Bordeaux a to nda ti amandango Bible ota. Na yâ oko gbata ni, mbeni Témoin alï na yâ mbeni ndo ti kango ye ti vo mbeti-sango na lo ba gbâ ti tract ni na ndo table ti kango ye. Wadengo buze ni, mbeni ngbele Témoin, awara tract ni na, teti so lo ba nene ni, lo sala a-photocopie ti zia ni na maboko ti azo lo mveni.

Na Le Havre, Normandie, bê ti mbeni wali so ayeke Protestant aso na mango na ndo ti fonono so a hunda ti tene aTémoin ti Jéhovah afuta lampo na ndo ti a-offrande so ala mu. Na bê kue lo mu mbeni tract na lo sepela aTémoin teti salango tene ti ala polele na ndo ti mara ti salango ye tongaso, so ayeke na lege ni pepe. Na 7 H 20 ti lakui, sango ti dasingale na Lyon asala tene na ndo ti kangbingo ye so, a tene: “Na ndapelele so, zo alingbi ti wara lege ti kpe ngu-nduzu ahon ti kpe atract ti aTémoin ti Jéhovah.” A hunda tene na aTémoin use na ala fa anda ti kapa ti kusala so.

A-Témoin so aye ti mu mbage ti ala na kangbingo ye so na peko ti kusala ti ala akangbi ambeni tract na azo ti kodoro ni so ayeke kiri na kodoro na ala zia ambeni na yâ ti abozo-mbeti ti ada. Na yâ ti agbata tongana Brest na Limoges, so a hinga ni mingi ndali ti porcelaine ti lo, azo so alondo na da-limon na 11 h 00 ti bï aduti na popo ti tanga ti azo so awara tract ni na lango so. A ro atract so angbâ na a kangbi ala na ndade ni.

Aye ti Pekoni

Mbeni Témoin asû na mbeti: “Awato ti e aba atene ala yeke woko e. Biani, nde na so ala kpengba e.” Na yâ ti akongregation mingi, aTémoin ahon 75 na ndo ti ala 100 amu mbage ti ala na kusala ni na lango so, ambeni asala kua teti angbonga 10, 12, wala 14. Na Hem, na banga ti France, na peko ti so lo hunzi ti sala kusala ti lo ti bï, mbeni Témoin akangbi tract ni ato nda ni na ngbonga oku ti ndapelele ti hunzi na ngbonga ota ti peko ti bekombite. Yongoro pepe na Denain, ndo so ngbele ye na ngu 1906 mbeni kongregation ayeke dä, aTémoin 75 asala angbonga 200 na yâ kangbingo tract ni na vendredi. Ambeni, atä so ala ga mbakoro awe, mbeni mbage ti tele ti ala anze, na kota ngu-nduzu so apika, aleke nga na bê ti ala ti mu mbage na ni. Na tapande, na Le Mans, ambeni ita-wali ota so ayeke na ngu 80 na ndo ni amu angbonga use ti zia tract ni na yâ abozo-mbeti ti ada, nga mbeni Témoin so ayeke na ndo ti pusu ti lo amu tract na azo na gbele ndo ti kungo train. Na ba tongana nyen a yeke ye ti mungo ngangu ti ba gbâ ti aTémoin so azia ti fa tene ahon nze omene awe amu mbage ti ala na yâ kota kusala so!

Na kite oko pepe, kangbingo tract so a sala mbeni kota tene ti témoin. Azo so dutingo ti ala ayeke nde nde kue, so mingi ni a yeke ngangu ti wara ala na yanga-da, awara mbeni tract ni. Azo mingi aba so kusala ni asala ye mingi ahon gi ti bata aye so andu aTémoin. Mingi ti ala aba ni tongana gbungo koko ti liberté ti yingo-ti-hinga na ti vorongo teti aFrançais kue. Na tapande, azo ahunda ambeni tract ni ti mu na akamarade, afon ala na ndo ti kusala, wala asongo ti ala.

Biani, aTémoin ti Jéhovah na France ayeke na ngia ti sala si a hinga iri ti Jéhovah na ti gbu koko teti aye so andu Royaume. (1 Pierre 3:15) Na bê kue ala yeke na beku so ‘ye alingbi gi ala pepe na ala duti na siriri na lege kue ti bata tene ti Nzapa na ti duti na donzi’ na so azo saki mingi ahon ayeke bungbi ande na ala ti sepela Jéhovah, Babâ ti ala ti yayu.​—1 Timothée 2:2.

[Kete Tene na Gbe Ni]