Atene so Azo Ahunda
Teti ngoi oke Job ahu pono?
Ambeni zo atene so atara ti Job aninga angu mingi, me buku ti Job atene pepe so pono ni aninga tongaso.
Kozo mbage ti atara ti Job so andu kuâ ti azo ti sewa ti lo na glisango akungba ti lo, akpa mbeni ye so asi gi na yâ ti kete ngoi. E diko: “Mbeni lâ, tongana amolenge ti Job ti koli na amolenge ti lo ti wali ayeke te kobe na nyon vin na yâ da ti kozo ita ti ala.” Job awara atokua na peko ti tele so a tene lo glisa aye: abagara ti lo, alele ti lo, angasangbaga ti lo, achameau ti lo, na awakua so ayeke bata anyama so. A lingbi ti tene so gi fade fade na pekoni, Job amä tokua ti kuâ ti amolenge ti lo ti koli na ti wali, so “ayeke te kobe na nyon vin na yâ da ti kozo ita ti ala.” A ba so aye so kue asi gi na yâ ti lango oko senge.—Job 1:13-19.
Use mbage ti atara ti Job ahunda la ni angoi mingi ahon. Satan aga ndulu na Jéhovah na lo tene so fade Job ayeke tï na gbele tara ti dutingo be-ta-zo tongana pono ni andu lo mveni, tele ti lo mveni. Tongaso, a pika Job na “kä ti sioni mingi so asala sanzo, a to nda ni na gere ti lo juska li ti lo.” A hunda la ni angoi kete ti tene kobela so amu tele ti lo kue. Na a hunda peut-être angoi kete ti tene tokua ti “sioye kue so” asi juska na ala so atene ala yeke awadengo bê ti lo, na so aleke tele ti ga ti ba lo.—Job 2:3-11.
Eliphaz ayeke la ni zo ti Théman na yâ kodoro ti Edom, na Zophar alondo na mbeni ndo na mbage ti banga-do ti Arabie; tongaso, ando ti lango ti ala ayo la ni mingi pepe na ti Job na Uz, so ayeke peut-être na mbage ti banga ti Arabie. Me, Bildad ayeke ti lo mbeni zo ti Suah, na a tene so azo ti kodoro ti lo alango la ni na tele ti ngu ti Euphrate. Tongana Bildad ayeke la ni na yâ kodoro ti lo na ngoi so ye ni asi, a yeke hunda fade na lo ambeni yenga wala nze tongaso ti mä tene ti aye so asi na Job na ti gue na Uz. Biani, peut-être ala ota kue ayeke la ni ndulu na ndo so Job ayeke dä na ngoi so lo to nda ti hu pono. Atä a yeke tongana nyen, na ngoi so afon Job ota asi, “ala duti na sese na tele ti lo lâ mbasambala na bï mbasambala,” na ala sala tene oko pepe.—Job 2:12, 13.
Na pekoni, ndangba mbage ti atara ti Job ato nda ni, so anzene nzene tene na ndo ni amu achapitre mingi ti buku ni. A wara dä molongo ti adengo gaba wala adiskur ti azo so atene ala ga ti dë bê ti Job, na fani mingi Job akiri tene na ala. Na nda ti aye so, pendere-koli Élihu azingo na Job, na Jéhovah na yayu amu wango ti sengo-ndo na Job.—Job 32:1-6; 38:1; 39:34—40:1 (40:1-6, NW); 42:1.
Tongaso, apono so Job ahu nga na lekengo tene ni alingbi peut-être la ni ti si gi na yâ ti anze kete, wala a si même ngu oko pepe. Peut-être mo lingbi ti hinga na lege ti aye so asi na mo mveni so a ba angangu tara tongana ye so ayeke ninga lakue lakue. Ye oko, a lingbi e glisa pepe so a yeke hunzi, legeoko tongana atara ti Job ahunzi. Me atä ningango ti atara so e yeke hon na yâ ni ayeke tongana nyen, zia e bata na li mungo maboko ti Nzapa, so asigigi polele na yâ atene so asû na gbe ti yingo: “Teti kete pono ti e ti fadeso asala si e wara gloire ti lakue lakue mingi ahon.” (2 aCorinthien 4:17) Bazengele Pierre asû na mbeti: “Me Nzapa ti grâce kue, Lo so ahiri i na yâ Christ ti si na gloire ti Lo ti lakue lakue, tongana i hu pono awe teti lâ oko oko, fade Lo mveni asala si i lingbi kue, i kpengba, na i wara ngangu.”—1 Pierre 5:10.