Mbeni Buku so Apendere Mingi Abi Bê Dä Pepe

MBENI maseka wali so iri ti lo ayeke Beate atene: “Tongana nyen mbi yeke hinga mbilimbili so Bible ayeke biani Tene ti Nzapa? A yeke mbeni buku so agbu bê ti mbi pepe.”

Na Zamani, kodoro so Beate alango dä, apendere mingi ayeda na bibe so; tongaso, ala ba dikongo Bible na nene ni mingi pepe. Mbeni gingo nda ti ye na kodoro so ade ti ninga pepe afa so na ndo apendere 100 a yeke ngangu ti tene zo 1 adiko Bible lakue, azo 2 adiko ni fani mingi, azo 19 adiko ni ngoi na ngoi, na ndulu na azo 80 adiko Bible lâ oko pepe. A lingbi ti tene so wungo ni ayeke duti legeoko tongaso na ambeni kodoro nde, peut-être nga na ndo so mo lango dä. A yeke polele so Bible ayeke buku so apendere mingi abi bê dä oko pepe.

Tongaso, a yeke ye ti dongo bê pepe so mingi ti apendere ti laso ahinga ye pepe na ndo Bible! Na tongo nda ti ngu 2000, mbeti-sango Lausitzer Rundschau akiri peko ti mbeni gingo nda ti ye so afa azo oke ahinga nzoni aKomandema Bale Oko na ala mu ni tongana ye ti fa lege na yâ fini. Ti azo so ngu ti ala ahon 60, azo 67 na ndo ti ala 100 ahinga akomandema ni na akomandema ni afa lege na ala; adu ti ala so ngu ti ala ayeke na gbe ti 30, a wara gi azo 28 na ndo ti ala 100. Biani, ti apendere mingi, Tene ti Nzapa ayeke ye so ala hinga nzoni oko pepe.

Ambeni Ayeke na Mbeni Bango Ndo Nde

Na mbeni mbage nde, na ndo lê sese kue, apendere kutu mingi ayeke dä so aba Tene ti Nzapa tongana mbeni ye ti ngele ngangu mingi. Na tapande, Alexandre ayeke na ngu 19 na lo diko Bible lâ na lâ na ndapelele kozoni ti gue na kua. Lo tene: “Ti mbi, a yeke lege ti nzoni ahon ti to nda ti lango ni.” Sandra ayeke mu ngoi ti diko mbeni kete mbage ti Bible lâ na lâ na lakui. Lo fa nda ni: “A ga mbage ti salango ye ti mbi ti lâ oko oko.” Na Julia, so ayeke na ngu 13, amaï awe kode ti dikongo kamême chapitre oko ti Bible kozoni ti gue ti lango na bï. “Biani a nzere na mbi mingi, na mbi ye ti ngbâ lakue ti sala ni na yâ angoi so ayeke ga.”

Bango ndo wa ayeke na lege ni na ti ndara? Bible ayeke biani ye so a lingbi a diko ni? A yeke mbeni ye ti ngele ngangu nga ti kota teti apendere ti laso? Mo tene ti mo nyen?