Kaïngo Akä ti Bê so Bira Aga na Ni

TETI angu bale use, Abraham atiri bira na popo ti azo so ayeke aturugu ti Leta pepe.a Me Lo zia salango bira fadeso awe, na fade lo yeke kiri ti tiri bira mbeni pepe. Ti tene ni biani, ambeni na popo ti angbele wato ti lo aga fadeso akota kamarade ti lo. Ye nyen asala si lo gbian? A yeke Bible. A mu na Abraham beku na ndara ti ba nda ti ye, na a mu maboko na lo ti ba aye so azo ayeke sala tongana ti so Nzapa ayeke ba ni. Bible alungula na yâ bê ti lo nzala ti sala bira, na lo to nda ti kaï vundu, kengo ndo, na suingo bê ti lo. Lo ba so Bible ayeke na ngangu yorö teti bê.

Tongana nyen Bible amu maboko na ambeni zo ti kaï akä ti bê? Bible alingbi pepe ti gbian ye so asi giriri na yâ fini ti Abraham. Ye oko, dikongo na gbungo li na ndo Tene ti Nzapa asala si bango ndo ti lo ague legeoko na ti Wasalango ye. Fadeso lo yeke na mbeni beku teti gigi ti kekereke, na lo zia afini ye na kozo ndo na gbele lo ti sala. Aye so ayeke kota na lê ti Nzapa aga nga kota na lê ti lo. Tongana ye so ato nda ni ti si, akä so ayeke na yâ bê ti lo ato nda ti kaï. A yeke na lege so si a mu maboko na Abraham ti gbian.

A Yôro Lo na yâ Bira so Asi na Popo ti Azo ti Kodoro ni

A dü Abraham na yâ ti angu 1930 na Afrika. Na peko ti use bira so amu sese kue, mbeni ngangu kodoro so ayeke na tele ni akomande kodoro ti lo; me mingi ti azo ti kodoro ti Abraham aye la ni lipanda. Na ngu 1961, Abraham alï na yâ mbeni bungbi ti azo so ayeke tiri teti liberté na so ayeke tiri bira nde na aturugu ti Leta na ngangu kodoro so ayeke ndulu na ala.

Abraham atene: “Ala yeke la ni awato ti e. Ala leke na bê ti ala ti fâ e, tongaso, e londo ti gi lege ti fâ ala.”

Fani mingi, fini ti Abraham aduti na yâ kpale; tongaso, na ngu 1982, na peko ti angu 20 ti salango bira, lo kpe lo gue na Poto. Na ngoi ni so, lo ga ndulu ti wara ngu 50, na teti so lo yeke na ye mingi ti sala pepe, lo to nda ti gbu li na ndo ye so lo sala na fini ti lo. Ye nyen asi na aye so giriri lo zia na gbele lo ti wara? Ye nyen gigi ti kekereke aleke fade teti lo? Abraham atingbi na ambeni Témoin ti Jéhovah na lo to nda ti gue na abungbi ti ala. Lo da bê ti lo so na Afrika angu mingi kozoni, lo diko mbeni tract so mbeni Témoin amu na lo. Tract ni afa peko ti mbeni paradis so ayeke ndulu ti ga na ndo sese, nga na mbeni yanga-ti-komande na yayu so ayeke komande ande na ndo azo. Ye so alingbi ti duti biani tâ tene?

Abraham atene: “Na lege ti Bible, mbi manda so mbi buba senge senge angu so kue mbi mu ti sala na bira. Oko yanga-ti-komande so ayeke sala na zo oko oko kue na lege ti mbilimbili ayeke gi Royaume ti Nzapa.”

Ngoi kete na peko ti so Abraham awara batême tongana Témoin ti Jéhovah, mbeni koli so iri ti lo ayeke Robert akpe Afrika ti gue na yâ gbata ti Poto so Abraham ayeke dä. Giriri Robert na Abraham atiri na yâ oko bira me na ambage nde nde. Fani mingi, Robert ahunda tele ti lo na ndo tâ nda ti fini. Lo yeke mbeni zo so abi bê na tene ti vorongo, na teti lo diko ambeni mbage ti Bible, lo hinga so iri ti Nzapa ayeke Jéhovah. Tongana aTémoin ti kongrégation ti Abraham ahunda ti mu maboko na Robert ti gbu nda ti Bible nzoni ahon, hio lo yeda.

Robert afa nda ni: “Tâ na tongo nda ni, bê ti mbi adö mingi na lege so aTémoin ayeke sala kusala na iri ti Jéhovah na Jésus, na hingango so ala yeke azo use so ayeke nde. Ye so ague legeoko na ye so mbi manda awe na ndo Bible. Na nga, aTémoin ayeke yü bongo nzoni na ala yeke sala nzobe na ambeni zo, atä mara ti ala ayeke tongana nyen. Aye tongaso asala kota ngangu mingi na ndo mbi.”

Awato Aga Akamarade

Robert na Abraham, angbele wato, ayeke fadeso akpengba kamarade. Ala yeke sala kusala tongana awafango tene na ngoi kue na yâ kongrégation oko ti aTémoin ti Jéhovah. Abraham atene: “Na ngoi ti bira ni, mbi yeke hunda tele ti mbi fani mingi tongana nyen azo ti akodoro so ayeke ndulu na tele, na so mingi ni ayeke na yâ lege ti vorongo Nzapa oko, alingbi ti ke tele na popo ti ala. Mbi na Robert ayeke na yâ église oko; ye oko, e londo ti tiri bira na popo ti e. Fadeso, e use kue e yeke aTémoin ti Jéhovah, na mabe ti e abungbi e oko.”

Robert atene na ndo ni: “A yeke ye so asala kangbi ni. Fadeso, e yeke na yâ mbeni lege ti mabe so asala si e duti mbage ti mbeni tâ songo ti aita. Fade e yeke kiri ti sala bira lâ oko pepe.” Bible asala kota ngangu mingi na ndo bê ti angbele wato so. Yeke yeke, kengo tele na suingo bê azia place na ziango bê na zo nga na songo ti akamarade.

Na oko ngoi ni so Abraham na Robert ayeke sala la ni bira, ambeni pendere koli use ayeke na yâ ambage nde nde ti mbeni bira nde so ayeke na popo ti akodoro use so ayeke na ma oko. Kete na pekoni, Bible asala kusala tongana mbeni ngangu yorö teti bê ti ala nga. Tongana nyen?

Fâ Zo, na Pekoni Kui Kuâ ti Ngangu Teti Kodoro

Gabriel, so awara fango lege na yâ mbeni sewa so ayeke na yâ lege ti vorongo, amanda so kodoro ti lo ayeke na gbe ti mbeni bira ti nzoni-kue. Tongaso, na ngoi so lo wara ngu 19, lo yeda na bê ti lo ti sala kusala ti turugu na lo hunda ti tene a tokua lo na ndo so atiri bira ni dä. Teti anze 13, lo duti na ndo so bira ni ayeke ngangu mingi, na ambeni ngoi, a yeke gi kilomètre oko na ndambo si akangbi popo ti lo na awato ni. Lo tene: “Mbi da bê ti mbi na mbeni mbilimbili ngoi. Komanda ti e atene na e so fade awato ayeke ga ti sala bira na bï ni so. Tele ti e adö ngangu mingi, a sala si e pika kota ngombe ti e na bï ni kue.” Lo ba azo ti kodoro so ayeke na ma oko na ti lo tongana awato ti lo so alingbi na kuâ. “Bibe ti mbi ayeke ti sala ngangu kue ti fâ ala mingi. Na pekoni, legeoko tongana mingi ti akamarade ti mbi, mbi ye fade ti kui kuâ ti ngangu teti kodoro ti mbi.”

Ye oko, na pekoni, bê ti Gabriel ato nda ti sui. Lo kpe na yâ ahoto, lo hara juska lo fâ katikati ti kodoro ni ti si na mbeni kodoro so bira ni andu ni pepe; na pekoni, lo gue na Poto. Lo ngbâ lakue ti hunda na Nzapa ngbanga ti nyen gigi ayeke ngangu mingi tongaso, wala akpale ayeke mbeni ngbanga so alondo na Nzapa. Lo tingbi na aTémoin ti Jéhovah, na ala fa na lo na lege ti Bible ngbanga ti nyen gigi asi singo na akpale laso.​—Matthieu 24:3-14; 2 Timothée 3:1-5.

Tongana Gabriel ayeke gue na li ni na yâ mandango Bible, lo ba biani so tâ tene ayeke na yâ ni. “Mbi manda so e lingbi ti duti na fini teti lakue lakue na yâ mbeni paradis na ndo sese. Atä so a yeke ye ti ndima mingi, a yeke ye so mbi sala kota nzala ni mingi tongana mbi de molenge.” Bible adë bê ti Gabriel na asala si gingo bê so lo yeke na ni juska na ngoi ni so adë. Akä ti bê ti lo so alï mingi ahon ato nda ti mu. Tongaso, na ngoi so lo tingbi na Daniel, mbeni ngbele wato, Gabriel ayeke na bibe ti kengo ndo mbeni pepe. Me ye nyen asala si Daniel asi na Poto?

“Tongana Mo Yeke Dä Biani, Mbi Toto na Mo ti Mu Maboko na Mbi!”

Daniel akono na yâ lege ti vorongo ti aCatholique, na tongana lo wara ngu 18, a hiri lo na kusala ti turugu. A tokua lo ti mu mbage ti lo na oko bira so Gabriel ayeke sala, me lo tiri ti lo na mbage ni nde. Ndulu na ndo so ayeke tiri bira ni dä, Daniel ayeke na yâ mbeni char ti bira na ngoi so mbeni kota lë ti ngombe apika ni. Akamarade ti lo akui, lo wara kota kä na a gbu lo tongana zo ti kanga. Lo sala anze mingi na da-nganga nga na yâ mbeni kando; na pekoni, a gue na lo na mbeni kodoro so bira andu ni pepe. Tongana lo ba so lo duti gi lo oko na so aye atia lo ngangu, lo ye ti fâ tele ti lo. Daniel asambela na Nzapa: “Tongana mo yeke dä biani, mbi toto na mo ti mu maboko na mbi!” Gi na ndade ni, aTémoin ti Jéhovah aga na da ti lo, na ala wara lege ti kiri tene na mingi ti ahundango tene ti lo. Na nda ni, lo gue na Poto tongana zo so akpe bira. Kâ, Daniel akiri abungbi na aTémoin na lo manda Bible. Ye so lo manda adë gingo bê nga na suingo bê ti lo.

Gabriel na Daniel ayeke fadeso akota kamarade, ala bungbi oko tongana aTémoin ti Jéhovah so awara batême awe na yâ mbeni songo ti aita na lege ti yingo. Gabriel atene: “Ndoye ti mbi teti Jéhovah na hingango ye ti mbi na ndo Bible amu maboko na mbi ti ba aye tongana ti so Lo yeke ba. Daniel ayeke wato ti mbi mbeni pepe. Angu mingi kozoni, mbi yeke duti fade na ngia ti fâ lo. Bible afa na mbi lege so ague tâ nde na ni: ti duti ndulu ti kui teti lo.”

Daniel atene: “Mbi ba azo ti alege ti vorongo na ti amara nde nde so ayeke fâ tele na popo ti ala. Na a yeke wara azo ti lege ti vorongo oko so ayeke ti mbage nde nde ti bira ni na so ayeke fâ tele na popo ti ala. Tongana mbi ba ye so la ni, mbi tene a yeke Nzapa si ayeke na gonda ni. Fadeso, mbi hinga so Satan ayeke na peko ti abira kue. Mbi na Gabriel ayeke fadeso afon wamabe. Fade e yeke kiri ti sala bira lâ oko pepe!”

“Tene ti Nzapa Ayeke na Fini nga na Ngangu”

Ngbanga ti nyen Abraham, Robert, Gabriel, na Daniel agbian ngangu mingi tongaso? Tongana nyen ala lingbi ti lungula na yâ bê ti ala vundu nga na gunda ti kengo ndo so alï mingi?

Zo oko oko na popo ti akoli so adiko, agbu li na ndo, na amanda tâ tene so alondo na Bible, so “ayeke na fini nga na ngangu.” (aHébreu 4:12, NW) Lingu ti Bible ayeke Wasalango zo, so ahinga tongana nyen ti sala nzoni ngangu na ndo bê ti zo so ayeda ti mä na ti manda ye. “Ambeti kue alondo na yanga ti Nzapa, na a yeke nzoni ti fa nda ti ye, ti zingo na azo, ti leke ye na lege ni, na ti mu wango tene na azo na yâ ye so ayeke na lege ni.” Tongana mbeni wadikongo ye azia tele ti lo si Bible afa lege na lo, lo yeke manda ambeni fini lengo na ambeni fini salango ye. Lo yeke to nda ti manda tongana nyen Jéhovah ayeke ba aye. Mara ti salango ye tongaso ayeke ga na aye ti nzoni mingi, na popo ni kaïngo akä ti bê so bira aga na ni.​—2 Timothée 3:16, NW.

Mbeti ti Nzapa atene so a yeke wara pepe mbeni kodoro, mbeni mara, wala mbeni kete mara so ayeke nzoni wala sioni ahon mbeni nde. “Nzapa asala pepe nzoni gi na ambeni zo, me na yâ mara oko oko kue, lo yeda na zo so akpe mbito ti lo na asala ye alingbi na mbilimbili.” A yeke mu maboko yeke yeke na wadikongo ye so ayeda na ni ti hon ndo ti abibe ti kengo mbeni mara wala kodoro.​—Kusala 10:34, 35, NW.

Aprophétie ti Bible afa so, na yâ ngoi kete, fade Nzapa ayeke lungula abungbi ti akomandema ti zo ti laso na lo yeke zia na place ni Royaume ti Messie ti lo. Na lege ti yanga-ti-komande so, Nzapa ‘ayeke sala si bira awe juska na nda ti sese.’ A yeke lungula ande abungbi so ayeke sala si abira amaï na so ayeke wa azo ti sala abira. Fade a yeke zingo azo so akui na yâ bira na a yeke mu na ala lege ti ngbâ na fini na ndo mbeni sese so aga paradis. Fade zo oko pepe ayeke duti na nzala ti kpe ndali ti mbeni zo so aye ti sala sioni na lo wala ti sala ngangu na lo.​—Psaume 46:10 [46:9, NW]; Daniel 2:44; Kusala 24:15.

Na ndo azo so ayeke duti ande na fini na ngoi ni so, Bible atene: “Fade azo asala da, na ala duti na yâ ni; fade ala lu vigne na yaka, na ala te lë ni. Fade azo asala da si mbeni zo aduti na yâ ni pepe . . . Fade ala sala kusala senge pepe, na ala dü amolenge ti wara vundu pepe.” Fade a yeke wara pepe mbeni kpale wala mbeni kä so akaï ni pepe. Ziango mabe na yâ mara ti beku tongaso ayeke lungula yeke yeke vundu na yâ bê ti mbeni zo.​—Esaïe 65:21-23.

Biani, Bible ayeke mbeni ngangu yorö teti bê. Afango ye ti lo ato nda ni awe ti sala kusala ti kaï akä ti bê so bira aga na ni. A yeke bungbi angbele wato na yâ mbeni songo oko ti aita ti mara nde nde. Kusala so ti kaïngo akä ayeke ngbâ ti gue na yâ fini sese ti Nzapa juska na ngoi so a yeke wara mbeni pepe kengo tele, suingo bê, na vundu na yâ bê ti azo. Wasalango ye amu zendo so “fade azo adabe ala na kozo ye pepe, na ala bi bê ti ala dä mbeni pepe.”​—Esaïe 65:17.

[Kete Tene na Gbe Ni]

[Kete Tene na lembeti 3]

“Na lege ti Bible, mbi manda so mbi buba senge senge angu kue so mbi mu ti tiri bira”

[Kete Tene na lembeti 4]

Bible alingbi ti sala kota ngangu na ndo bê ti angbele wato

[Kete Tene na lembeti 5]

Kengo tele na suingo bê azia la ni place yeke yeke na ziango bê kue na zo nga na songo ti kamarade

[Kete tene na lembeti 5]

Tongana mbeni wadikongo ye azia Bible ti fa lege na lo, lo yeke manda ambeni fini lengo na salango ye

[Foto na lembeti 6]

Angbele wato ayeke bungbi oko fadeso na yâ mbeni songo ti aita ti amara kue

[Lingu ti foto na lembeti 3]

Kando ti azo so akpe ngbanga ti bira: FOTO TI BENDO TI GIGI 186811/J. Isaac