Ala Tomba Mbito

A YEKE lakue kete ye pepe ti tomba mbito ti fango tene. Biani, bazengele Paul atene so, na mbeni ngoi, lo fa tene “na yâ tiri mingi.” (1 aThessalonicien 2:2) ‘Tiringo’ ti fa tene alingbi na ngangu so asala? Azo ti Nzapa aku oko pepe ti tene ambeni ye so ayeke nde mingi asi na ala, me fani mingi ala yeke na ngia so ala tomba mbito. Ba ambeni tapande.

Mbeni molenge-wali ti ngu miombe so iri ti lo ayeke Tara amä tene nzoni na ngoi so wafango mbeti na lo atene na klasse so na ngoi ti Use Bira so Amu Sese Kue, a hunda na azo so ayeke na yâ kando ti salango pasi ti aJuif ti yü Tongoro ti jaune ti David, si a hinga ala na ni. Tara ahunda tele ti lo wala a lingbi lo sala tene. Lo dabe lo: “Mbi sambela atä so mbi kanga lë pepe.” Na pekoni lo yä maboko ti lo na nduzu na lo tene so aTémoin ti Jéhovah ayeke la ni na yâ akando so nga, na a hunda na ala ti yü triangle violet. Tene ni agbu bê ti wafango ye ni na lo kiri singila na lo. Tene ti Tara azi lege na ambeni lisoro na wafango mbeti ni, so même na pekoni afa na klasse ti lo kue kasete vidéo La fermeté des Témoins de Jéhovah face à la persécution nazie.

Na Guinée, Afrika ti Do, mbeni pendere so ayeke wafango tene so ade ti wara batême pepe, so iri ti lo ayeke Irène, aye ti gue na li ni na yâ kusala ti lo. Ita-wali missionnaire so amanda Bible na lo awa lo ti tara ti kangbi apériodique Tour ti Ba Ndo na Réveillez-vous! na afon lo wamandango mbeti na ekole. Bê ti Irène agi lo teti so kozoni azo ti klasse ti lo ayeda na tene pepe. Ye oko, na lege ti wango ti missionnaire ni, Irène amu desizion ti ga ndulu kozoni na wamandango mbeti so akpa zo so ake tene mingi ahon atanga ni. Bê ti Irène adö ti ba so molenge-wali ni amä tene ni na lo yeke ndulu ti yeda na apériodique. Ambeni wamandango mbeti nde ayeda na ni nga. Irène akangbi na nze so apériodique mingi ahon so lo kangbi na yâ ti anze oku kue so ahon kozoni.

Na Trinité, mbeni ancien ayeke gi bê ti lo na ndo gango ndulu na wayinda ti mbeni ekole ti fa na lo ngele ngangu ti Réveillez-vous! na yâ fango ye. Ye oko, lo tomba mbito. Lo tene: “Mbi sambela na ngoi so mbi yeke lï na yâ kota gbagba ni. Bê ti mbi apika ti ba so salango lisoro na wayinda ni anzere mingi.” Wali ni ayeda na Réveillez-vous! na ndo “Quel espoir pour les jeunes?” na lo yeda ti sala kusala na ni ti fa ye na awamandango mbeti. Ngbele ye na ngoi ni so, lo yeda awe na apériodique 40 so andu atene nde nde.

Na ngoi so lo de pendere, Vaughn aba lakue fango tene tongana ye ti ngangu. “Mbito ayeke sala mbi, gbiki ayeke sigigi na yâ ti maboko ti mbi, na mbi yeke sala tene na loro, mbi lingbi pepe ti sala tene yeke.” Ye oko, lo ga mbeni wakua ti ngoi kue. Me, a ngbâ lakue ngangu na lo ti sala tene. Mbeni lâ, na mbeni lango so lo gi kua gba, lo ye ti fa tene na mbeni zo na yâ métro, “tongaso si nzoni ye alingbi ti sigigi na yâ mbeni sioni lango.” Me mbito asala lo ndali ti awadengo buze so akpa akota zo na yâ métro ni. Na nda ni, lo tomba mbito si lo sala tene na mbeni kangba koli so ayeke ndulu na lo. Mbeni yongoro lisoro aga na pekoni. Wadengo buze ahunda: “Mo de pendere me mo yeke na anzoni hundango tene. Mo yeke mbeni wandara ti alege ti vorongo?” Vaughn akiri tene, “Pepe, mbi yeke Témoin ti Jéhovah.” Koli ni ahe ngia, “Ah, mbi hinga nda ni fadeso awe.”

A-Témoin so kue, na ambeni mingi nga, ayeke na ngia so ala tomba mbito si ala fa tene. Fade mo sala legeoko nga?

[Foto na lembeti 17]

Tara

[Foto na lembeti 17]

Vaughn