YE TI MANDA 29
Nyen la ayeke si na e na peko ti kuâ ti e?
Mbeni zo so mo ye lo mingi akui awe? Na ngoi ti vundu tongaso, mo peut ti hunda terê ti mo: ‘Nyen la ayeke si na e na peko ti kuâ ti e? Eskê beku ayeke dä ti kiri ti bâ azo so e ye ala so akui?’ Na yâ ti ye ti manda so nga na ti peko, bâ akiringo tënë ti Bible so adë bê ti zo.
1. Nyen la ayeke si na e na peko ti kuâ ti e?
Jésus ahaka kuâ na kota lango. Zo so atï na kota lango ahinga pëpe ye so ayeke passé na terê ti lo. Na lege wa la kuâ ayeke tongana lango? Na peko ti so mbeni zo akui, lo yeke mä songo ti ye ape. Lo yeke bâ pëpe so lo yeke gï lo oko, atâa lo ye lani mingi akamarade nga na afami ti lo. Bible atene: “Azo so akui awe ahinga ti ala ye oko pëpe.”—Diko Zo-ti-fa-tene 9:5.
2. Ti hinga tâ tënë na ndö ti kuâ ayeke aidé e tongana nyen?
Azo mingi ayeke na mbeto ti kui nga même ti azo so akui awe. Me tënë so Bible atene na ndö ti kuâ apeut ti dë bê ti mo. Jésus atene: “Tâ tënë ayeke zi ala.” (Jean 8:32). Ambeni bungbi ti vorongo nzapa afa so mbeni ye na terê ti zo ayeke ngbâ na fini na peko ti kuâ ti lo, me a yeke ye so Bible afa la ape. Tongaso, zo oko ayeke bâ pasi na peko ti kuâ ti lo ape. Nga, so akuâ ahinga ye oko ape, ala peut ti sara sioni na e ape. Tongaso, e bezoin pëpe ti dë bê ti ala, ti voro ala wala ti sambela ndali ti ala.
Ambeni zo atene so ala peut ti sara lisoro na akuâ. Me ala peut ti sara ni ape. Tongana ti so e londo ti manda, akuâ “ahinga ti ala ye oko pëpe.” Azo so apensé so ala yeke sara lisoro na azo so ala ye ala so akui ayeke sara lisoro biani na asioni yingo so atene ala yeke azo so akui awe. Tongaso, ti hinga tâ tënë na ndö ti kuâ ayeke bata e si asioni yingo asara sioni na e ape. Jéhovah agboto mê ti e na ndö ti gingo ti sara lisoro na akuâ ndali ti so lo hinga so sarango lisoro na asioni yingo ayeke sara sioni na e.—Diko Deutéronome 18:10-12.
GI TI HINGA AYE MINGI
Gi ti hinga ambeni ye na ndö ti ye so Bible afa na ndö ti kuâ, nga duti na kpengba mabe na Nzapa ti ndoye so ayeke punir pëpe azo so akui awe.
3. Gi ti hinga tâ ye so ayeke si na zo na peko ti kuâ ti lo
Na yâ ti dunia, azo ayeke na abango nde nde na ndö ti ye so ayeke si na e na peko ti kuâ ti e. Me abango ndo so kue apeut ti duti na lege ni ape.
Na ndo so mo yeke dä, azo atene nyen la ayeke si na zo na peko ti kuâ ti lo?
Ti hinga ye so Bible afa, zia VIDÉO ni.
Diko Zo-ti-fa-tene 3:20, na pekoni kiri tënë na ahunda so:
Ti gue oko na versê so, tongana zo akui lo yeke gue na ndo wa?
Eskê mbeni ye na terê ti zo ayeke ngbâ na fini na peko ti kuâ ti lo?
Bible asara na e tënë ti kuâ ti Lazare, mbeni kota kamarade ti Jésus. Na ngoi so mo yeke diko Jean 11:11-14, bâ ye so Jésus atene na ndö ti Lazare. Na pekoni kiri tënë na ahunda so:
Jésus ahaka kuâ na nyen?
Nyen la hakango ye so afa na e na ndö ti azo so akui awe?
Mo bâ so atënë so Bible atene na ndö ti kuâ ayeke na lege ni?
4. Ti hinga tâ tënë na ndö ti kuâ a-aidé e
Ti hinga tâ tënë na ndö ti kuâ asara si e sara mbeto ti akuâ encore ape. Diko Zo-ti-fa-tene 9:10, na pekoni kiri tënë na hunda so:
Eskê akuâ apeut ti sara sioni na e?
Tâ tënë ti Bible abata nga e si e pensé ape so e doit ti dë bê ti akuâ wala même ti voro ala. Diko Ésaïe 8:19 nga na Apocalypse 4:11, na pekoni kiri tënë na hunda so:
Ti mo, tongana mbeni zo avoro mbeni zo so akui wala agi mungo maboko ti lo, a yeke sara Jéhovah tongana nyen?
Tâ tënë na ndö ti kuâ azi e na yâ ti angobo so Jéhovah ake
5. Tâ tënë na ndö ti kuâ adë bê ti e
A fa na azo mingi so tongana ala kui, ala yeke bâ pasi ndali ti asioni ye so ala sara ândö. Me bê ti e adë ti hinga so zo oko ayeke bâ pasi ape na peko ti kuâ ti lo, même zo so asara ândö aye so ayeke sioni mingi. Diko aRomain 6:7, na pekoni kiri tënë na hunda so:
Bible atene so kuâ azi siokpari na li ti zo wala azi zo na gbe ti siokpari. Tongaso, mo pensé so mbeni zo so akui ayeke bâ pasi ndali ti afaute so lo sara ândö?
Tongana e hinga Jéhovah nzoni, e yeke hinga nzoni mingi so lo yeke zia lâ oko ape si akuâ abâ pasi. Diko Deutéronome 32:4 nga na 1 Jean 4:8, na pekoni kiri tënë na ahunda so:
Eskê Nzapa so ayeke na asarango ye so a sara tënë ni na yâ ti aversê so apeut ti yeda ti tene a punir azo so akui awe?
Eskê tâ tënë na ndö ti kuâ adë bê ti mo? Ngbanga ti nyen?
AMBENI ZO ATENE: “Mbeto ti ye so ayeke si na mbi na peko ti kuâ ti mbi asara mbi.”
Aversê wa la mo peut ti fa na ala ti dë bê ti ala?
NA NDURU TËNË
Tongana mbeni zo akui, lo yeke na fini encore ape. Azo so akui awe ayeke bâ pasi ape nga ala peut ti sara sioni na azo so ayeke na fini ape.
Dango bê
Nyen la ayeke si na e na peko ti kuâ ti e?
Ti hinga tâ tënë na ndö ti kuâ ayeke aidé e tongana nyen?
Ti hinga tâ tënë na ndö ti kuâ adë bê ti e tongana nyen?
GI NDA TI YE
Bâ ye so tënë “âme” aye biani ti tene na yâ ti Bible.
Gi ti hinga wala Nzapa ayeke punir asioni zo na yâ ti enfer.
Eskê enfer ayeke biani ndo so a yeke sara pasi na zo dä? (3:07)
Eskê e bezoin ti sara mbeto ti akuâ?
Gi ti hinga tongana nyen la bê ti mbeni koli adë na ngoi so lo hinga tâ tënë na ndö ti ye so ayeke si na e na peko ti kuâ ti e.