‘L’heure ti fango ngbanga’ ni asi awe

APOCALYPSE, so ayeke ndangba buku ti Bible, agboto lê ti e so mbeni ange so ayeke hulu na nduzu ayeke na mbeni “Tene-nzoni ti lakue lakue ti fa”. Ange ni atene na kongo: “I kpe mbito ti Nzapa, i mû gloire na Lo, teti l’heure ti Lo ti fâ ngbanga asi awe.” (Apocalypse 14:6, 7). ‘L’heure ti fango ngbanga’ so andu lango so Nzapa ayeke dë na ngbanga ni, nga lâ ni so lo yeke ga ti sala ye ti peko ti dengo ngbanga ni so. Mbeni “l’heure” wala ngbonga oko ayeke gi mbeni kete ngoi tongaso. “L’heure” ni so ayeke ko nda ti ngoi ti “lâ ti nda ni” so. E yeke fadeso na yâ ngoi ni so awe.​—2 Timothée 3:1.

Singo ti ‘l’heure ti fango ngbanga’ so ayeke mbeni nzo tënë teti ala so afa so ala ndoye mbilimbili. A yeke mbeni ngoi so Nzapa ayeke mû ande dengo bê na awakua ti lo so abâ pasi na tïtî azo ti sese so ndoye atia ala, na so ayeke sala ngangu na amba ti ala.

Fadeso, kozoni si ‘l’heure ti fango ngbanga’ ni ako nda ni na futingo aye ti sioni ti fadeso, a mû na e kpengba wango so: “I kpe mbito ti Nzapa, i mû gloire na Lo.” A yeke ye so mo yeke sala la? A hunda gi pëpe ti tene na yanga so e mä na bê na Nzapa (Matthieu 7:21-23; Jacques 2:19, 20). A lingbi kpengo mbito ti Nzapa apusu e ti yekia lo na dongo bê. A lingbi a pusu e ti zi tele ti e na ye ti sioni (aProverbe 8:13). A lingbi kpengo mbito so amû maboko na e ti ndoye ye so ayeke nzoni na ti ke ye so ayeke sioni (Amos 5:14, 15). Tongana e gonda Nzapa, fade e yeke mä lo nzoni. E yeke zia ande pëpe si ambeni ye nde amû ngoi ti e mingi si e diko Tënë ti lo Bible lakue pëpe. Fade e yeke zia bê kue na lo na ngoi kue (Psaume 62:9; aProverbe 3:5, 6). Ala so agonda lo biani ayeke yeda so, teti lo yeke Lo so asala yayu na sese, lo yeke Kota Gbia ti ndagigi kue; tongaso, na lege ti ndoye, ala yeke mä lo tongana Kota Gbia so ayeke ti lo ti fa lege na ala. Tongana e bâ so a yeke ti e ti kiri ti bi bê mingi na ndo aye so, zia e sala tongaso hio na e ku pëpe.

Ngoi so Jéhovah ayeke ga ti sala ye ti peko ti dengo ngbanga so ange ni asala tënë ni ayeke mbeni ngoi so a di iri ni nga ‘lâ ti Jéhovah’. Mara ti “lâ” tongaso atï lani na ndo Jérusalem ti giriri na ngu 607 kozoni na ngoi ti e, teti so azo ti kodoro ni asala ye lani pëpe alingbi na agbotongo mê so Jéhovah amû na lege ti aprophète ti lo. So na yâ li ti ala, ala yeke tene so lâ ti Jéhovah ni angbâ yongoro mingi, ala kiri asala si fini ti ala aduti mingi na gbele kpale. Jéhovah agboto mê ti ala lani kozo awe, lo tene: ‘Kota lâ ti Mbi aga ndulu, na a yeke ga fade fade.’ (Sophonie 1:14). Mbeni ‘lâ ti Jéhovah’ ni nde atï na ndo Babylone ti giriri na ngu 539 kozoni na ngoi ti e (Esaïe 13:1, 6). Teti so ala zia bê ti ala gi na ndo agbagba ti ala nga na anzapa ti ala ti bata ala, azo ti Babylone ake ti mä agbotongo mê so aprophète ti Nzapa amû ni. Me gi na bï oko, kota Babylone ni atï na maboko ti azo ti Médie na ti Perse.

Mbeni lâ wa e yeke na gbele ni laso? A yeke mbeni ‘lâ ti Jéhovah’ ni nde so ayeke duti kota ahon ala so ahon kozoni (2 Pierre 3:11-14). Nzapa adë ngbanga awe na ndo “Kota Babylone” wala Babylone ti Kota. Na Apocalypse 14:8, mbeni ange atene: “Kota Babylone atï awe.” Tingo ti Babylone ni ayeke mbeni ye so asi awe. Lo lingbi mbeni pëpe ti kanga lege kue na awavorongo Jéhovah ti sala kusala ti ala. A fa tâ polele na gigi na lê ti azo mingi tënë ti goro so ayeke na yâ lo, nga mungo mbage ti lo na yâ bira. Fadeso, lâ ti futingo Babylone ni biaku ayeke ndulu ti si. Ndani la si Bible awa azo na ndo kue na tënë so: “I sigigi na kodoro so [Babylone ti Kota] si i sala beoko na siokpari ti lo pëpe, na tongaso sioye ti lo aga na ndo i pëpe; teti siokpari ti lo mingi asi juska na yayu, na Nzapa adabe Lo na ye ti kirikiri ti lo.”​—Apocalypse 18:4, 5.

Babylone ti Kota ayeke nyen? A yeke bungbi ti alege ti vorongo kue na sese, so a yeke wara na yâ ala aye so giriri a bâ na yâ kodoro ti Babylone (Apocalypse, chapitre 17 na 18). Bâ ambeni kamba so ayeke na popo ti alege ti vorongo ti laso na Babylone ti giriri:

• Aprêtre na yâ Babylone ti giriri ayôro tele ti ala lani mingi na yâ atënë ti poroso ti mara ni. A yeke nga ye so e yeke bâ na mbage ti alege ti vorongo mingi laso.

• Fani mingi, aprêtre ti Babylone ti giriri ayeke pusu azo ti mara ni ti sala bira. Laso nga, lege mingi, azo ti alege ti vorongo ayeke akozo zo ti hiri deba nzoni na ndo aturugu na ngoi so amara ayeke gue na bira.

• Afango ye nga na asalango ye ti Babylone ti giriri apusu azo ti mara ni ti sala pitan ahon ndo ni. Laso nga, tongana amokonzi ti lege ti vorongo apusu na peko akpengba-ndia ti Bible na ndo tambela, salango pitan ayeke gue na li ni na popo ti akota zo ti lege ti vorongo ni nga na ala so ayeke ga gi ti mä tënë. Mbeni ye so a lingbi e hinga ni nga ayeke so salango ye ti ndumba ti Babylone ti Kota na tele ti azo ti sese so nga na abungbi ti poroso asala si buku ti Apocalypse afa lo tongana mbeni wali ti pitan.

• Bible atene nga so Babylone ti Kota aduti “na yâ ye ti mosoro”, na kamene asala lo pëpe. Na yâ Babylone ti giriri, place so temple ni ayeke dä amû akota sese so yâ ni akono mingi na so aga ti lo, na aprêtre ni abi tele ti ala mingi na yâ akusala ti dengo buze. Laso, Babylone ti Kota ayeke na ada ti vorongo nzapa ti lo; me na ndo ni nga, lo yeke na akota terrain na andokua ti dengo buze. Afango ye ti lo na alâ ti matanga ti lo aga na mosoro mingi na lo nga na ambeni zo so ayeke dë buze.

• Na yâ Babylone ti giriri, a yeke sala lani kusala mingi na a-image, tënë ti magie na ti likundu, na laso nga ye ni ayeke tambela tongaso na ando mingi. A yeke bâ lani kuâ gi tongana mbeni lege ti zia fini so ti gue na yâ mbeni mara ti fini nde. Babylone asi na atemple nga na akete da so a leke ni teti anzapa ti lo, me azo ti Babylone ake tënë ti awavorongo Jéhovah. Mara ti atënë ti mabe na asalango ye tongaso ayeke ye so a hinga na Babylone ti Kota.

Giriri, Jéhovah asala kusala na angangu kodoro ti poroso na aturugu ti ala ti se ala so ake ti bi bê na lo nga na ye so lo ye, na so aye ti gbian pëpe. A yeke tongaso si Samarie awara futingo na tïtî azo ti Assyrie na ngu 740 kozoni na ngoi ti e. Jérusalem awara futingo na tïtî azo ti Babylone na ngu 607 kozoni na ngoi ti e, nga na ngu 70 ti ngoi ti e na tïtî azo ti Rome. Babylone nga atï na maboko ti azo ti Médie na ti Perse na ngu 539 kozoni na ngoi ti e. Ti e laso, Bible afa so ayanga-ti-komande, so a haka ala na mbeni sioni nyama ti ngonda, ayeke tï ande na ndo “wali ti pitan” so na ala yeke zia lo senge; na lege so, a yeke fa na gigi mara ti zo wa lo yeke biani. Ala yeke futi ande lo kue.​—Apocalypse 17:16.

Fade ayanga-ti-komande ti sese so ayeke sala mara ti ye tongaso biani? Bible atene so ‘a yeke ye so Nzapa ayeke zia na bê ti ala’. (Apocalypse 17:17). Ye ni ayeke si gi hio tongaso, zo ayeke ku tele ti lo na ni pëpe, a yeke duti ye ti dongo bê, nga aye so andu ni ayeke si ande pëpe gi yeke yeke tongaso.

Ye nyen a ku na mbage ti mo ti sala? Hunda tele ti mo: ‘Mbi ye gi ti ngbâ lakue na yâ mbeni bungbi ti vorongo so abuba na lege ti afango ye na asalango ye ti yâ ni so afa so lo yeke na yâ Babylone ti Kota?’ Même tongana mo yeke na yâ ni pëpe, peut-être mo lingbi ti hunda tele ti mo: ‘Mbi zia si bibe ti lo ayeke sala ngangu na ndo mbi?’ Bibe wa? Bibe ti zia lege na atambela ti kirikiri, ndoye ti aye ti mitele na aye ti ngia, ahon ti zia lege ti ndoye Nzapa, wala ti bâ na nene ni pëpe Tënë ti Nzapa (même na yâ ye so akpa akete ye). Gbu li nzoni na ndo kiringo tënë so mo yeke mû.

Ti nzere na lê ti Jéhovah, a yeke kota ye mingi ti tene, na yâ asalango ye ti e nga na anzara ti bê ti e, e fa polele so biani e yeke pëpe na yâ Babylone ti Kota. Ngoi ti ku ayeke pëpe. Ti gboto lê ti e so nda ni ayeke ga na mbeni ngoi so e yeke ku tele ti e na ni pëpe, Bible atene: “Fade A bi Babylone, kota kodoro so, na sese na ngangu tongaso, na fade a wara kodoro so mbeni pëpe.”​—Apocalypse 18:21.

Me aye ni ayeke ngbâ gi ge pëpe. Na yâ mbeni mbage ni nde ti ‘l’heure ti fango ngbanga’ so, Jéhovah Nzapa ayeke fâ ngbanga na ndo abungbi ti poroso kue, amokonzi ni nga ala kue so ake ti yeda na komandema ti lo ti mbilimbili so lo yeke fa ni na lege ti Royaume ti lo ti yayu so Jésus Christ ayeke Gbia ni (Apocalypse 13:1, 2; 19:19-21). Suma so a fa na lege ti prophétie na Daniel 2:20-45 asala tënë ti ayanga-ti-komande (ti londo na Babylone ti giriri juska ti si laso) tongana mbeni ngbongboro image so a sala ni na lor, argent, gengere, wen na ndô. Na salango tënë ti ngoi ti e, prophétie ni atene: “Fade Nzapa ti yayu ayä royaume so afuti lâ oko pëpe.” Nga, tongana lo sala tënë ti ye so Royaume ni ayeke kiri ti sala ande na ngoi ti ‘l’heure ti fango ngbanga’ ti Jéhovah, Bible atene: “Fade royaume so afâ mbeni royaume [ti azo] so kue ndulu ndulu, na a sala si royaume nde nde so kue awe; na fade royaume so angbâ lakue lakue.”​—Daniel 2:44.

Bible atene na atâ wavorongo Nzapa ti sala hange na ndoye teti “ye so ayeke na sese so”, so ti tene asalango ye so azo ti sese ni so ake tâ Nzapa ayeke maï ni (1 Jean 2:15-17). Adesizion so mo mû nga aye so mo yeke sala afa so mo mû mbage ti mo kue na Royaume ti Nzapa? Mo yeke zia Royaume ni biani na kozo ndo na yâ fini ti mo?—​Matthieu 6:33; Jean 17:16, 17.

Encadré na lembeti 14]

Lawa si nda ni ayeke si?

“Na l’heure ni so i yeke ku pëpe, fade Molenge Ti Zo aga.”​—Matthieu 24:44.

“I bata [‘I lango pëpe’, Fini Mbuki, 2001], teti i hinga lâ ni wala l’heure ni pëpe.”​—Matthieu 25:13.

“A yeke si na ngoi ni.”​—Habakuk 2:3, NW.

[Encadré na lembeti 14]

Ti hinga fade tâ lango ni ayeke pusu mo ti sala kusala na fini ti mo na mbeni lege nde?

Tongana fade mo hinga biani so lango ti fango ngbanga ti Nzapa so aga ndulu ayeke si ande pëpe na yâ ti angu ota wala osio tongaso, ye so ayeke pusu mo ti sala kusala na fini ti mo na mbeni lege nde? Tongana mo bâ so futingo ngbele bungbi ti aye ti sese so asi biani hio pëpe tongana ti so mo ku ni fade, mo yeke zia lege na ye so ti sala si mo kiri na peko na yâ kusala ti Jéhovah?​—aHébreu 10:36-38.

So e hinga tâ lango ni pëpe amû lege na e ti fa so e yeke sala na Nzapa na nzoni bibe. Ala so ahinga Jéhovah ayeke bâ so ti ku gi ti fa na gigi wâ na yâ kusala ti Nzapa na nda ni ayeke pëpe mbeni ye so ayeke pika ande bê ti Nzapa, teti lo yeke bâ ti lo ye so ayeke na yâ ti bê ti zo.​—Jérémie 17:10; aHébreu 4:13.

Ti ala so biani andoye Jéhovah, a yeke lo si aga lakue na kozo ndo na yâ fini ti ala. Legeoko na ambeni zo, atâ Chrétien alingbi ti sala kua ti nginza. Ye oko, ye so ala yeke gi ayeke pëpe ti wara mosoro mingi, me ti wara ye na lege ti mitele so alingbi, nga mbeni kete ye ti kangbi na ambeni zo (aEphésien 4:28; 1 Timothée 6:7-12). A nzere nga na ala ti sala angia so ayeke nzoni, nga ti sala mbeni ye nde ti gbian kete yâ ti aye so ala yeke sala ka lâ oko oko; ye oko, ye so ala ye ayeke ti wara ngangu na lege ni, me pëpe ti sala tongana ti so tanga ti azo kue ayeke sala (Marc 6:31; aRomain 12:2). Legeoko na Jésus Christ, ala yeke na ngia ti sala ye so bê ti Nzapa aye.​—Psaume 37:4; 40:9.

Atâ Chrétien aye ti ngbâ na fini ti sala na Jéhovah teti lakue lakue. Ti wara ambeni ye ti nzoni so a fa, a lingbi ala ku teti mbeni kete ngoi ahon ti so ambeni aku fade ni, me ayeke so la asala pëpe si beku ti ala ni aga kete ye na lê ti ala.

[Encadré na lembeti 15]

Tënë so andu kota yanga-ti-komande ti Nzapa

Ti hinga nzoni ngbanga ti nyen Nzapa azia lege na apasi mingi ti si, a lingbi e gbu nda ti tënë so andu kota yanga-ti-komande ti lo.

Teti so Jéhovah ayeke Wasalango ye kue, a yeke ti lo ti komande na ndo sese nga na ala so kue ayeke na ndo ni. Ye oko, Bible atene na e so na tongo nda ti mbaï ti azo, a bi tënë ti kite na ndo kota yanga-ti-komande ti Jéhovah. Satan Zabolo atene so Jéhovah amû andia ahon ndo ni so akanga lege na zo senge senge ti sala ambeni ye, nga so Lo dü mvene na akozo babâ na mama ti e na ndo ye so ayeke si ande tongana ala doro ndia ti Nzapa na ala sala gi ye so aga na li ti ala. Lo tene nga so ala yeke duti fade nzoni mingi tongana ala komande tele ti ala gi ala oko me na gingo fango lege ti Nzapa pëpe.​—Genèse, chapitre 2 na 3.

Tongana fade Nzapa afuti gi na lê ni lê ni azo ti kengo yanga ni, ye so ayeke fa na gigi ngangu ti lo; me a yeke leke pëpe atënë so abâ gigi. A hon ti sala tongaso, Jéhovah azia ngoi ti tene azo so kue lo sala ala na yayu nga na sese abâ futa ti peko ti kengo yanga ti lo. Atâa so ngoi so lo zia aga na pasi na sese, a mû nga lege na e ti bâ gigi.

Na ndo ni, Jéhovah asala kota sacrifice mingi tongana lo leke na lege ti ndoye ti tene a zi na gbe ti ngangu ti siokpari na ti asioni ye ti pekoni azo so ayeke mä ande lo na ayeke fa mabe na yâ sandaga ti kota ngele ti Molenge ti lo, tongaso si ala wara fini na yâ Paradis. Lo lingbi ti sala tongaso na lege ti zingongo azo na popo ti akuâ, tongana a hunda ni.

Ngoi so lo zia ni ti leke tënë so amû nga lege na awakua ti Nzapa ti fa na gigi so ala lingbi ti sala tongana ti so ndoye ti Nzapa apusu ala ti sala, na nga ti fa na gigi be-biani ti ala na Jéhovah na yâ aye kue. Lekengo tënë so andu kota yanga-ti-komande ti Nzapa nga tënë so ague oko na ni, so andu be-biani ti azo, ayeke kota ye mingi teti nzoni tambela ti aye na yâ ndagigi kue. Tongana a leke atënë so pëpe, tâ siriri alingbi lâ oko pëpe ti ga.a

[Kete tënë na gbe ni]

[Foto]

Fade a yeke futi bungbi ti ayanga-ti-komande ti poroso kue ti sese