Fini ti mo ayeke gue na mo na ndo wa?
• Azo mingi azia si aye ti gigi so amû ngoi ti ala kue asala si ala bi bê gi kete na ye so ayeke gue ti si na ala.
• Biani, Bible afa na e so apendere ye ayeke ku e kekereke. Me lo gboto mê ti e nga so mbeni kota gbiango ye ayeke gue ti si na yâ aye so azo aleke. Tongana e ye ti wara ye ti nzoni na ti kpe si ye ti ngangu asi na e, a yeke kota ye mingi ti sala ye hio fade fadeso.
• Ambeni zo ni ayeke dä so ahinga ye so Bible atene na so ayeke tara ti sala ye alingbi na ni. Ye oko, ala zia si agingo bê na ndo gigi so ague na ala ti mû mbeni lege so ayeke nzoni pëpe.
• Tele ti mo anzere na lege so fini ti mo ayeke gue na mo dä? Tongana mo yeke leke aye ti sala, mo yeke gi ti bâ tongana nyen aye so alingbi ti sala ngangu na ndo aye so mo leke ti sala kekereke?
[Encadré/Afoto na lembeti 9]
Ye wa ayeke kota ahon tanga ni kue na lê ti mo?
Na yâ aye so a zia na gbe ni ge, fa ti mo a so wa si aga kozo, na zia ala na molongo ni juska a si na nda ni.
Mingi ti aye so ayeke na place ti ala na yâ fini ti zo, na a yeke na lege ni. Ye oko, tongana a hunda mo ti soro so wa aga kozo na yâ fini ti mo, so wa aga na pekoni, na ti fa tongaso juska na nda ni, fade mo yeke soro tongana nyen?
․․․ Salango ngia
․․․ Kua so mbi yeke sala
․․․ Seni ti mbi
․․․ Gingo ngia ti mbi mveni kozo
․․․ Koli wala wali ti mbi
․․․ Babâ na mama ti mbi
․․․ Amolenge ti mbi
․․․ Mbeni pendere da, apendere bongo
․․․ Ti duti lakue na li ni na yâ aye kue so mbi sala
․․․ Vorongo so mbi mû na Nzapa
[Encadré na lembeti 10, 11]
Aye so mo soro ayeke gue na mo ti wara ye so mo ye biani?
GBU LI NA NDO AHUNDANGO TËNË SO
SALANGO NGIA: Ngia so mbi soro ayeke mû lege na mbi ti wara ngangu? Wala a ndu aye so aga na mbi mbeni kota nzerengo tele me so alingbi ti sala sioni na seni ti mbi wala même ti buba mbeni mbage ti tele ti mbi teti tanga ti alâ ti fini ti mbi kue? A yeke mbeni lege ti “salango ngia” so asala si tele ti mbi anzere mingi teti mbeni kete ngoi peut-être, me so na pekoni alingbi ti ga na mbi vundu so ayeke ninga? Même tongana ngia so mbi soro ti sala ayeke nzoni, mbi yeke mû ngoi ti mbi mingi na ni si mbi wara ngoi mingi pëpe teti aye so ayeke kota ahon ni?
KUA SO MBI YEKE SALA: Kua ni ayeke gi ti mû maboko na mbi ti vo aye so mbi yeke na bezoin ni, wala mbi yeke tâ ngbâa ni? A yeke hunda ngoi nga na ngangu ti mbi mingi si seni ti mbi ayeke na gbele kpale? Mbi ye mingi ti mû gbâ ti angoi ti sala gi kua ti mbi ni, wala mbi ye mingi ti duti na tele ti koli wala wali ti mbi wala na tele ti amolenge ti mbi? Tongana patron ti mbi ahunda mbi ti sala mbeni kua so yingo-ti-hinga ti mbi ayeke gi mbi na ndo ni wala so lakue ayeke zia na mbi ngoi mingi pëpe teti aye ti yingo, fade mbi yeke sala gi ni ti tene a tomba mbi na kua pëpe?
SENI TI MBI: Mbi yeke bâ ni tongana ye senge? Wala mbi yeke sala kue si mbeni ye abuba ni pëpe? Atënë ti mbi mingi ayeke gi na ndo seni ti mbi? Lege so mbi yeke sala ye na fini ti mbi ni afa so mbi yeke bi bê ti mbi biani na sewa ti mbi?
GINGO NGIA TI MBI MVENI KOZO: A yeke ye so si agbu bê ti mbi mingi ahon tanga ti aye kue? Mbi yeke gi ti zia ngia na bê ti mbi mveni kozoni kue na ngia ti koli wala wali ti mbi, wala ti sewa ti mbi? Lege so mbi yeke gi ni alingbi biani na dutingo ti mbeni zo so ayeke voro tâ Nzapa?
KOLI WALA WALI TI MBI: Mbi yeke bâ koli wala wali ti mbi tongana tâ kamarade ti mbi gi na ngoi so a nzere na mbi? Wala mbi yeke sala ye na mbage ti lo na yekiango ndo, tongana mbeni zo so a lingbi a ne lo? Mabe so mbi yeke na ni na mbage ti Nzapa ayeke sala ngangu na ndo lege so mbi yeke bâ na koli wala wali ti mbi?
BABÂ NA MAMA TI MBI: Tongana mbi yeke mbeni zo so ade molenge wala maseka, mbi yeke mä yanga ti babâ na mama ti mbi? Ti tene ni nde, mbi yeke kiri tënë na ala na yekiango ndo? Mbi yeke sala akua so ala mû na mbi? Mbi yeke kiri na yanga-da na ngbonga so ala fa? Nga tongana ala gboto mê ti mbi na mbage ti asioni kamarade nga na ambeni kusala nde, mbi yeke mä ala? Tongana mbi ga kota awe, mbi yeke mä tënë ti babâ na mama ti mbi na yekiango ndo? Na mbi yeke mû maboko na ala tongana ti so a hunda? Mbi yeke sala tongaso gi tongana mbi bâ nzoni ti mbi dä? Wala mbi yeke sala ni teti so a yeke Mbeti ti Nzapa si awa mbi ti sala ni?
AMOLENGE TI MBI: Mbi bâ so a yeke ti mbi ti fa na amolenge ti mbi nzoni lege ti tambela, wala mbi yeke ku ti tene a fa ni na ala na ekole? Mbi yeke mû ngoi ti duti na tele ti amolenge ti mbi, wala mbi yeke mû gi na ala ambeni ye tongana aye ti ngia, limon wala ordinateur ti mû ngoi ti ala si ala zia mbi kpô? Mbi yeke se amolenge ti mbi na lege ni na ngoi kue so ala yeke doro andia ti dango bê so alondo na Nzapa? Wala mbi yeke sala tongaso gi na ngoi so ye so ala sala aso bê ti mbi?
MBENI PENDERE DA, APENDERE BONGO: Ye nyen ayeke fa lege na ngoi so mbi yeke mû ni teti pendere ti tele ti mbi na akungba so mbi yeke na ni? A yeke ti gi ti pika bê ti amba ti mbi? A yeke nzoni duti ti azo ti sewa ti mbi? Wala a yeke dutingo ti mbi tongana wavorongo Nzapa?
TI DUTI LAKUE NA LI NI NA YÂ AYE KUE SO MBI SALA: Mbi bâ so a yeke kota ye mingi ti sala aye nzoni mingi? Mbi yeke sala kue ti duti gi na li ni ahon amba ti mbi kue? Tënë ni ayeke so mbi mingi tongana mbeni zo nde asala mbeni ye so ahon ti mbi?
VORONGO SO MBI MÛ NA NZAPA: Ti nzere na lê ti Nzapa ayeke kota ye mingi na lê ti mbi ahon ti nzere na koli wala wali ti mbi? amolenge ti mbi? babâ na mama ti mbi? wala patron ti mbi? Ti bata mbeni nzoni dutingo na sese so, mbi yeke duti ande ndulu ti pusu kusala ti Nzapa na peko?
GBU LI NZONI NA NDO WANGO TI BIBLE
Place wa Nzapa ayeke na ni na yâ fini ti mo?
Zo-ti-fa-tene 12:15: “Mo kpe mbito ti Nzapa, na mo bata komandema ti Lo, teti so ayeke kusala ti azo kue.”
HUNDA TELE TI MO: Fini ti mbi afa so mbi yeke bâ aye na lege so? A yeke batango akomandema ti Nzapa si ayeke fa na mbi lege so mbi yeke yô na akungba ti mbi na yâ da, na place ti kua wala na ekole? Wala a yeke ambeni ye nde so mbi ye wala akpale ti fini si ayeke fa na mbi lege so mbi yeke leke na ngoi teti Nzapa?
Songo ti mo na Nzapa ayeke tongana nyen?
A-Proverbe 3:5, 6: “Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sala si lege ti mo aga mbilimbili.”
Matthieu 4:10: “A lingbi mo sambela Seigneur Nzapa ti mo, na mo sala gi na Lo oko.”
HUNDA TELE TI MO: A yeke tongaso si mbi yeke bâ Nzapa na bê ti mbi? Akusala ti mbi ti lâ oko oko nga lege so mbi yeke sala ye na gbele aye ti ngangu afa na gigi so mbi zia bê ti mbi kue na lo na mbi voro gi lo oko?
Dikongo Bible nga na mandango ni ayeke kota na lê ti mo tongana nyen?
Jean 17:3: “So ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.”
HUNDA TELE TI MO: Lege so mbi yeke bâ na dikongo Mbeti ti Nzapa nga na gbungo li dä afa so mbi yeke biani na bibe so?
Gango na abungbi ti kongregation ti aChrétien ayeke kota na lê ti mo tongana nyen?
A-Hébreu 10:24, 25: “A lingbi e bi bê ti e na ambeni zo na popo ti e ti wa ala si ala ndoye azo, na ala sala kusala nzoni; a lingbi e zia ti bungbi pëpe, . . . mingi ahon teti i bâ so lâ ni aga ndulu.”
Psaume 122:1: “Mbi yeke na ngia tongana ala tene na mbi, Zia e gue na da ti L’Eternel.”
HUNDA TELE TI MO: Lege so mbi sala na fini ti mbi afa so mbi kiri singila teti fango lege so ayeke na yâ Mbeti ti Nzapa? Na nze so ahon, mbi manke ambeni bungbi ti e ti Chrétien teti so mbi zia lege si mbeni ye nde amû place ni?
Mo yeke mû mbage ti mo na wâ ti fa na azo tënë na ndo Nzapa nga na aye so lo leke ti sala?
Matthieu 24:14: “Fade a fa Tene-nzoni so ti royaume na sese so kue teti tënë ti témoin . . . na tongaso fade nda ni aga.”
Matthieu 28:19, 20: “I gue, i fa tënë na amara kue si ala ga adisciple, . . . i fa na ala ti bata ye kue so Mbi komande i.”
Psaume 96:2: “Sala bia na L’Eternel, sala tënë nzoni na iri ti Lo, fa salut ti Lo na gigi lâ na lâ.”
HUNDA TELE TI MO: Mbi yeke zia biani kusala so na place so a lingbi lo duti dä na yâ fini ti mbi? Mbage so mbi yeke mû na yâ kusala ni afa biani so mbi yeke bâ pëpe tongana kete ye ngoi so e yeke na yâ ni?