Ngbâ lakue ti gue na li ni

TONGANA mo manda ti kozoni akpengba-ndia ti Bible, mo bâ so akode ti gbungo li, ti salango tënë nga na ti salango ye so alï mo ngangu ato nda ti gbian yeke yeke. Mingi ti agbiango ye so ayeke si même kozoni si mo zia iri ti mo na Ekole ti Kusala ti aChrétien. Fadeso, mo gue peut-être na li ni juska ti mû fini ti mo na Jéhovah. So aye ti tene mo lingbi ti kaï ti gue na li ni? Oko pëpe. Batême ti mo ayeke gi mbeni senge tongo nda ni.

Disciple Timothée ayeke sala lani kusala awe tongana mbeni ancien na ngoi so Paul atene na lo ti “gbu li nzoni” na ndo wango so lo mû na lo nga na ndo matabisi ti kusala so a mû na lo, ti “bi tele” ti lo na yâ aye so, si “azo kue alingbi ti bâ guengo na li ni” ti lo (1 Tim. 4:12-15, NW ). Atâa mo londo gi ti to nda ti mû lege ti tâ tënë la wala mo ninga awe tongana Chrétien, a lingbi mo bi bê na ndo guengo na li ni ti mo.

Hingango ye nga na gbiango ye

Na aEphésien 3:14-19, e diko so bazengele Paul asambela ti tene amba ti lo Chrétien wamabe awara lege ti “hinga . . . ye so ayeke kota ti lê ni, yongo ni, yongo ni na nduzu, na yongo ni na gbe ti sese” ti tâ tënë. Ndali ni, Jésus amû azo tongana amatabisi ti fa ye na kongregation, ti kiri ti leke yâ ni na ti kpengba ni. Gbungo li lakue na ndo Tënë ti Nzapa so a sû na gbe ti yingo ti lo, legeoko na fango lege ti awafango ye so ayeke na kode mingi, alingbi ti mû maboko na e ti “maï” wala ti gue na li ni na lege ti yingo.​—aEph. 4:11-15.

Guengo na li ni so andu ‘kiringo ti wara bibe ti fini na yâ yingo ti mo’. Ye so aye ti tene ti sala si, na yâ ye kue, bibe ti mo ague gi oko na ti Nzapa nga na ti Christ. A hunda ti zia lakue si bibe ti ala asala ngangu na ndo bibe ti mo, si mo “yü zo-ti-fini”. (aEph. 4:23, 24) Tongana mo yeke manda aÉvangile, mo yeke bâ atondo so ti fini ti Christ tongana mbeni tapande ti mû pekoni? Mo yeke gi ti hinga ambeni mbilimbili salango ye ti Jésus, na mo yeke sala ngangu biani ti mû pekoni na yâ fini ti mo?​—1 Pi. 2:21.

Atënë so mo yeke zia na yâ alisoro ti mo alingbi ti fa tongana nyen mo gue na li ni na yâ lege so. Azo so ayü zo-ti-fini ayeke zonga ndo pëpe, ayeke tene pëpe atënë so ayeke sioni mingi, so ayeke na lege ni pëpe wala so afa nzoni bibe pëpe. Nde na so, ala yeke sala atënë “so alingbi kpengba zo na amû grâce na ala so amä tënë so.” (aEph. 4:25, 26, 29, 31; 5:3, 4; Jude 16). Atënë so ala yeke tene atâa na lê ti azo mingi pëpe nga na abungbi ti kongregation afa na gigi so tâ tënë ayeke gbian fini ti ala.

Tongana “pupu ti tënë nde nde kue ayengi” mo fadeso mbeni pëpe, ye so afa nga so mo yeke gue na li ni (aEph. 4:14). Na tapande, mo yeke sala ye tongana nyen tongana sese so ayeke tuku na ndo ti mo afini tënë, atënë ti tiri ndali ni wala ambeni salango ngia? Bê ti mo aye ti pusu mo ti mû ngoi so ayeke ti aye ti yingo ti gi na aye so? Salango tongaso alingbi ti kiri na guengo na li ni ti mo na peko. Lege ti ndara ahon so ayeke ti vo ngoi teti aye ti yingo!​—aEph. 5:15, 16.

Lege so mo yeke sala na ye na ambeni zo alingbi nga ti fa so mo yeke gue na li ni na lege ti yingo. Mo manda awe ti duti “na be-ti-ndoye, [ti] pardone” aita ti mo ti koli na ti wali?​—aEph. 4:32.

A lingbi a bâ na yâ ti kongregation nga na da guengo na li ni ti mo na yâ salango aye tongana ti so bê ti Jéhovah aye. A lingbi a duti nga polele na ekole, na ndo so azo mingi ayeke dä nga na place ti kua ti mo (aEph. 5:21–6:9). Tongana na yâ ti mara ti aye tongaso kue mo yeke sala ye tongana ti Nzapa, guengo na li ni ti mo ayeke sigigi lo mveni.

Sala kusala na matabisi ti mo

Jéhovah amû na e oko oko kue akode nga na ndara ti sala ambeni ye. Lo ku ti tene e sala kusala na aye so ndali ti azo na mbeni lege so asala si, na lege ti e, lo lingbi ti fa nzobe ti lo. Na ndo ye so, bazengele Pierre asû na mbeti, lo tene: “Legeoko tongana A mû matabisi nde nde na i oko oko kue, i kangbi yâ ni na popo ti i tongana awabatango ye so abata grâce nde nde ti Nzapa nzoni.” (1 Pi. 4:10). Mo yeke sala kusala tongana nyen na kungba ti mo ti wabatango ye?

Pierre akiri atene: “Tongana mbeni zo afa tënë, a lingbi lo fa tënë tongana tënë ti yanga ti Nzapa.” (1 Pi. 4:11). Versê so agboto lê na ndo kungba so zo ayeke na ni ti sala si tënë ti lo ague oko na Tënë ti Nzapa, si Nzapa awara gonda. A lingbi lege so a yeke sala na tënë ni amû nga gonda na Jéhovah. Ye so Ekole ti Kusala ti aChrétien ayeke fa alingbi ti mû maboko na mo ti sala kusala na matabisi ti mo tongaso: ti gonda Nzapa na lege so mo yeke mû maboko na azo. Na ziango ye so na gbele mo, a lingbi mo hinga guengo na li ni ti mo na ekole ni tongana nyen?

Ahon ti gi ti hinga ni na lege ti wungo ti awango so mo mû pekoni awe na yâ mbeti ti mo ti awango, wala na lege ti mara ti devoir so a yeke mû na mo, gbu li na ndo tongana nyen fango lege so ekole ni amû asala si sandaga ti sepela ti mo aga nzoni ahon ti kozo. Ekole ni ayeke leke e ti lë lengo na fango tënë mingi ahon ti kozo. Tongaso hunda tele ti mo: ‘Mbi yeke leke biani ye so mbi yeke tene ande na fango tënë? Mbi manda awe ti fa so mbi bi bê biani na azo so mbi yeke fa tënë na ala? Mbi yeke leke gere ti mbeni fini vizite kozoni si mbi hon, na lege so mbi hunda mbeni tënë ti sala lisoro na ndo ni na ngoi ti peko? Tongana mbi yeke manda Bible na mbeni zo, mbi yeke sala ngangu ti maï tongana mbeni wafango ye so ayeke ndu bê ti zo ni?’

Bâ guengo na li ni ti mo gi pëpe na lege ti amatabisi ti kusala so a mû na mo. Azo ayeke bâ guengo na li ni ti mo, gi pëpe na lege ti ye so a mû na mo, me na lege ti ye so mo yeke sala na ni. Tongana a mû na mo mbeni ye so andu fango ye, hunda tele ti mo: ‘Mbi yeke sala kusala biani na kode ti fango ye? Mbi yeke sala devoir ni na mbeni lege so asala ye na ndo fini ti azo so amä mbi?’

Wango ti sala kusala na matabisi ti mo andu mungo li ni ti sala ye. Mo yeke mû li ni ti sala kusala na ambeni zo na fango tënë? Mo yeke gi alege ti mû maboko na azo ti kongregation ti mo so ayeke afini zo, amaseka wala azo so mbakoro wala ambeni ye awoko ala? Mo yeke mû tele ti mo ti leke yâ ti Da ti Royaume pendere wala ti mû maboko na alege nde nde na ngoi ti akota bungbi? Mo lingbi ti mû kua ti pionnier auxiliaire lakue na ambeni mbilimbili ngoi? Lege ayeke na mo ti mû kua ti pionnier permanent wala ti mû maboko na mbeni kongregation so bezoin ayeke dä mingi? Tongana mo yeke mbeni ita-koli, mo yeke gi ti sala ye so Mbeti ti Nzapa ahunda ti lingbi na kusala ti serviteur ti mungo maboko wala ancien? Tongana mo yeke ndulu ti mû maboko na ti yeda na akungba, mo yeke fa so mo yeke gue na li ni.​—Ps. 110:3.

Kusala ti ye so zo amanda na yâ fini ti lo

Tongana mo bâ so ambeni ye ayeke kara mo ngbanga ti so mo hinga ye mingi pëpe na yâ fini ti Chrétien, zia bê ti mo aduti kpô. Tënë ti Nzapa alingbi ti sala si “zo so [ahinga ye mingi pëpe, NW ] aga zo ti ndara.” (Ps. 19:8; 119:130; aProv. 1:1-4). Batango awango ti Bible ayeke mû lege na e ti wara ye ti nzoni na yâ ti ndara ti Jéhovah so ayeke mbilimbili-kue, so ngele ni ayeke kota ahon mandango ye kue so e lingbi ti wara na lege ti ye so asi na yâ fini ti e. Ye oko, tongana e yeke gue na li ni na yâ kusala ti e na Jéhovah, e yeke manda aye ti ngele ngangu na yâ fini ti e. E lingbi ti sala kusala na ni nzoni tongana nyen?

Teti so mbeni zo atingbi na aye nde nde na yâ fini ti lo, bê ti lo alingbi ti pusu lo ti tene: ‘Mbi tingbi na mara ti ye tongaso awe. Mbi hinga ye so a lingbi mbi sala.’ So ayeke lege ti ndara la? A-Proverbe 3:7 amû gbotongo mê so, a tene: “Mo bâ mo mveni tongana wandara pëpe.” Ye so e hinga na yâ fini ti e alingbi biani ti kono bango ndo ti e na ndo aye so a lingbi e bâ na ngoi so e yeke na gbele ambeni ye ti gigi. Me tongana e yeke gue na li ni na lege ti yingo, a lingbi nga ye so e hinga afa na bibe nga na bê ti e so e yeke na bezoin ti deba nzoni ti Jéhovah ti sala ye nzoni. Tongaso, guengo na li ni ti e ayeke sigigi polele, pëpe na lege so e luti na gbele aye ni na ziango bê ti e gi na e mveni, me na lege so e bi lê hio na mbage ti Jéhovah ti tene lo fa lege na fini ti e. Tongana e hinga na bê kue so tongana mbeni ye asi a yeke lo si azia lege na ni, e yeke fa so e yeke gue na li ni. Azo ayeke bâ nga guengo na li ni ti e na lege so e ngbâ lakue ti bata mbeni songo na babâ ti e ti yayu, so na yâ ni e zia bê ti e kue na lo na e ndoye lo.

Ngbâ ti gi aye so ayeke na li ni

Bazengele Paul, atâa so lo yeke mbeni Chrétien so a sa yingo na ndo ti lo, so akpengba na lege ti yingo, lo yeda lani so a lingbi lo ngbâ ti “gi ye so ayeke na li ni” ti wara fini (aPhil. 3:13-16, Fini Mbuki, 2001 ). Mo nga kue mo bâ ye ni tongaso?

Mo gue na li ni awe ti si na ndo wa? Hinga guengo na li ni ti mo na lege so mo yeke sala ye kue ti zo-ti-fini, mo yeke zia tele ti mo kue na gbe ti kota yanga-ti-komande ti Jéhovah nga mo yeke sala kusala na bê kue na amatabisi ti mo ti gonda Jéhovah. Na ngoi so mo yeke wara nzoni na lege ti Ekole ti Kusala ti aChrétien, a lingbi asalango ye so Tënë ti Nzapa asala tënë na ndo ni asigigi polele yeke yeke na yâ kode so mo yeke sala na tënë nga mo yeke fa na ye. Zia aye so angbâ na gbele mo lakue. Biani, wara ngia na yâ ni, na fade guengo na li ni ti mo ayeke sigigi polele hio.