Lekengo adevoir na adiskur teti kongregation
A LEKE programme ti Ekole ti Kusala ti aChrétien ti mû ye ti nzoni na kongregation ni kue. A yeke fa nga asango ti ngele ngangu na ambeni bungbi ti kongregation nde nga na akota bungbi. Tongana a mû na mo kusala ti sala mbeni mbage ti aprogramme so, kota kungba la mo wara awe so. Bazengele Paul awa mingi surveillant Timothée ti sala hange lakue na fango ye ti lo (1 Tim. 4:16). Azo so aga na abungbi ti aChrétien azia mbeni ngoi nde so ayeke ti ngele ngangu ti wara fango ye na ndo aye so andu songo ti ala na Nzapa, na ambeni asala ngangu mingi ti wara ngoi tongaso. Fango mara ti ye tongaso ayeke biani mbeni kota matabisi! Mo lingbi ti yô kungba so nzoni tongana nyen?
Angbongboro tënë ti dikongo Bible
Mbage ti ekole so aluti na ndo dikongo Bible so a mû teti yenga ni. A lingbi a gboto lê na ndo tongana nyen ye ni andu e laso. Tongana ti so a fa pekoni na Néhémie 8:8, Esdras na amba ti lo adiko Tënë ti Nzapa na gbele azo, ‘ala fa nda ni’, na ala sala si azo agbu nda ni. Fango angbongboro tënë ti Bible ayeke mû lege na mo ti sala tongaso nga.
Mo lingbi ti leke mara ti devoir tongaso tongana nyen? Tongana lege ayeke dä, diko yenga oko wala ahon so kozoni mbage ti Bible so a mû ni na mo. Na pekoni, bi bê na kongregation ti mo na aye so atia lo. Zia ni na yâ sambela. Wango wa, atapande wa na akpengba-ndia wa na yâ mbage ti Tënë ti Nzapa so alingbi na aye so atia kongregation ni?
A yeke kota ye ti gi nda ti ye. Watchtower Library na ndo ti CD wala Index des publications de la Société Watch Tower ayeke na yanga ti kodoro so mo mä yâ ni? Tongana a yeke dä pëpe, sala kusala na index so ayeke na yâ ndangba numéro ti Tour ti Ba Ndo ti ngu oko oko. Na gingo nda ti aye so a zia na mbeti, so andu versê so mo soro ti luti na ndo ni, mo lingbi ti wara ambeni tënë so azia lumière na ndo aye so asala si ambeni ye asi giriri nga afango ye na ndo gango tâ tënë ti aprophétie ti Bible. Mo lingbi nga ti wara afango nda ti tënë na ndo ye so ambeni versê afa na ndo Jéhovah, wala atënë na ndo akpengba-ndia. Gi pëpe ti sala tënë na ndo gbâ ti aye. Luti gi na ndo ti mbeni kete wungo ti aversê na sala kusala na ni nzoni mingi. Ye so ayeke nzoni ahon atanga ni kue.
Peut-être devoir ti mo ahunda ti tisa azo ti fa tongana nyen ala wara ye ti nzoni na lege ti dikongo Bible ti yenga ni. Ye wa ala wara, so ayeke ga na ala ande ye ti nzoni na yâ mandango ye ti ala mveni wala na sewa, na yâ fango tënë wala na yâ fini ti ala? Asalango ye wa ti Jéhovah asigigi na yâ alege so lo sala ye na azo nga na amara? Ye wa kongregation ni amanda, so akpengba mabe ti lo nga asala si lo kiri singila na Jéhovah ahon ti kozo? Luti pëpe na ndo ti anzene nzene ye so akpengba mingi. Gboto lê na ndo nda ti atënë so mo soro nga tongana nyen a lingbi ti sala kusala biani na ni.
Diskur ti wango
Diskur so aluti na ndo ti mbeni ye so a zia na mbeti awe, tongana mbeni article na yâ Tour ti Ba Ndo wala Réveillez-vous! wala peut-être mbage ti mbeni buku. Mingi ni, ngoi so a mû na mo alingbi pëpe ti tene mo fa atënë ti yâ ti mbeti ni kue. Mo lingbi ti sala devoir so tongana nyen? Sala ni tongana mbeni wafango ye, pëpe gi tongana mbeni zo so ayeke fa gi peko ti aye so a mû na lo na mbeti. A lingbi mbeni surveillant ahinga “lege ti fa nda ti tënë na azo”.—1 Tim. 3:2.
To nda ti lekengo tele ti mo ni na mandango mbeti ni nzoni. Diko aversê ni. Gbu li na ndo ni. Sala kue ti sala ni ngoi mingi kozoni na lango ti diskur ti mo. Dabe mo so a wa aita ti diko kozoni mbeti so diskur ti mo aluti na ndo ni. Devoir ti mo ayeke pëpe gi ti kiri ti bâ ni wala ti fa ni na ndulu tënë, me ti fa tongana nyen a lingbi ti sala kusala na ni. Sala kusala na ambeni mbage ti atënë ti mbeti ni na mbeni lege so asala si kongregation awara ye ti nzoni dä.
Legeoko tongana ti so molenge oko oko ayeke na salango ye ti lo mveni, kongregation oko oko ayeke nga na salango ye ti lo mveni. Mbeni babâ wala mama so afa ye nzoni ayeke diko pëpe gi peko ti akpengba-ndia ti nzoni salango ye na molenge ti lo. Lo yeke fa nda ti ye na lo. Lo yeke bi bê na salango ye ti molenge ni nga na akpale so molenge ni ayeke tiri na ni. Legeoko nga, awafango ye na yâ ti kongregation ayeke sala ngangu ti hinga aye so atia bungbi ti azo so ala yeke sala tënë na ala, na ti fa aye so andu ni. Ye oko, mbeni wafango ye ti ndara ayeke kpe ande ti sala kusala na atapande so alingbi ti zia kamene na lê ti mbeni oko ti azo ni. Lo yeke fa ande anzoni ye so azo ayeke wara na peko ti tambelango na ndo lege ti Jéhovah, na lo yeke gboto lê na ndo wango ti Bible so ayeke mû ande maboko na kongregation ti leke akpale ti lo nzoni.
Nzoni fango ye ayeke ndu bê ti azo so ayeke mä ni. Ye so ahunda ti fa gi pëpe aye, me nga ti sala si azo ni abâ nene ti aye ni so. A hunda ti bi bê biani na azo so a yeke fa ye ni na ala. A lingbi aberger ti yingo ahinga kundu ti ala. Tongana, na ndoye, ala bata na li akpale so azo nde nde ayeke na ni, fade ala lingbi ti sala tënë so akpengba zo, na ti fa so ala gbu nda ti ye so asi na ala na ala bâ mawa ti ala.
Tongana ti so anzoni wafango ye ahinga, a lingbi a bâ polele ye so mbeni diskur ayeke gue ti si dä. A lingbi a fa atënë ni na mbeni lege so asala si angbongboro tënë ni asigigi polele na angbâ na yâ li ti azo ni. A lingbi azo so amä ni adabe na anzoni tënë so ayeke sala ye ande na ndo fini ti ala.
Bungbi ti Kusala
Tongana mo yeke mû mbeni diskur so aluti na ndo mbeni article ti Kusala ti Royaume, kpale ni alingbi ti duti nde kete. Mo yeke bâ ande so mingi ni a hunda na mo ti fa na kongregation ye kue so a mû, pëpe ti soro gi ye so alingbi biani na lo. Mû maboko na kongregation ni ti gi nda ti aversê so ayeke na gunda ti wango kue so a mû (Tite 1:9). Teti a fa mbeni wungo ti ngoi ndali ti diskur ni, mingi ni lege ayeke dä pëpe ti zia ambeni tënë nde na ndo ti ye so a mû ni.
Na mbeni mbage nde, a lingbi ti hunda na mo ti sala mbeni devoir so aluti pëpe na ndo mbeni article na yâ Kusala ti Royaume ni. A lingbi ti hunda na mo ti bâ mbeni article ti Tour ti Ba Ndo, wala devoir ni alingbi ti luti gi na ndo andulu tënë so a fa na mo. A yeke na mo wafango ye ni ti bâ aye so atia kongregation na lege ti ye so a fa na mo ti sala na kusala. Mo lingbi ti sala kusala na mbeni ndulu tapande so alingbi, wala ti fa peko ti mbeni ye so asi so alingbi na devoir ni. Dabe mo so devoir ti mo ayeke pëpe gi ti sala tënë na ndo ti mbeni ye tongaso, me ti sala ni na mbeni lege so amû maboko na kongregation ti sala na ngia na bê kusala so Tënë ti Nzapa amû ti sala.—Kus. 20:20, 21.
Na ngoi so mo yeke leke devoir ni, gbu li na ndo dutingo ti azo ti kongregation ni. Gonda ala teti aye so ala yeke sala. Tongana nyen salango ye alingbi na awango so a mû alingbi ti kono lengo ti kusala ti ala nga na ngia ti ala na yâ fango tënë?
Devoir ti mo ahunda ti sala mbeni démonstration wala ti hunda tënë na ambeni zo? Tongana a yeke tongaso, a lingbi mo leke ni kozoni hio. Bê ti mo alingbi ti pusu mo ti hunda gi na mbeni zo nde ti leke ye ndali ni; me aye ti pekoni ayeke lakue pëpe nzoni mingi. Tongana lege ayeke dä, tara peko ti démonstration ni wala ti hundango tënë na zo ni kozoni na lango ti bungbi ni. Sala kue ti sala mbage so ti devoir ti mo na mbeni lege so akiri aleke pendere mingi fango ye ni.
Akota bungbi
Tongana ngoi ayeke hon, a lingbi ti hunda na aita-koli so amaï asalango ye na lege ti yingo na so ayeke anzoni wamungo diskur ti mû mbage na programme ti mbeni kota bungbi. So ayeke biani ambeni lege so ayeke nde mingi ti fa aye ti Chrétien. Devoir ni alingbi ti duti mbeni manuscrit, mbeni plan, aye so a fa teti drame ti Bible so atingbi ni na ngoi ti laso wala gi ambeni wango ti mû pekoni. Tongana mo yeke na matabisi ti mû mbage na mara ti programme tongaso, manda nzoni mingi ye so a mû na mo. Sala kusala na ni juska mo bâ nene ti tënë ti yâ ni.
A lingbi ala so a mû na ala mbeni manuscrit adiko tâ gi atënë kue so a zia na mbeti. Ala yeke tene pekoni na mbeni lege nde pëpe, wala ala yeke kiri ti leke yâ ni pëpe. Nde na so, ala yeke manda ni ti hinga polele angbongboro tënë ti yâ ni nga tongana nyen mbeti ni asigigi na angbongboro tënë so. Ala yeke tara peko ti dikongo ni na kota go juska na ngoi so ala lingbi ti mû diskur ni na akode so: ti luti mbilimbili na ndo akota tënë ni ti tene azo agbu nda ni, nga ti sala tënë na wâ, na bê kue nga na atënë ti bê so alingbi. Ala yeke leke nga totongo ti go ti ala ti lingbi na ni tongana a yeke gbâ ti azo la abungbi.
Aita-koli so a mû na ala mbeni plan ayeke na kungba ti fa tënë ni na mbeni lege so ague ndulu mingi na atënë ti plan ni. Ahon ti diko plan ni dikongo wala ti sû atënë ni oko oko kue na mbeti, a lingbi salango tënë ti zo ti salango devoir ni aga gi na bê ti lo mveni, nga a lingbi atënë ti lo alondo na bê ti lo. A hunda na lo ti sala tënë alingbi na ngoi so ayeke na ndo ti plan ni si lo fa polele ngbongboro tënë oko oko. A lingbi wamungo diskur ni asala kusala nzoni na atënë nga na aversê so a zia na gbe ti angbongboro tënë ni. A yeke ti lo pëpe ti zia atënë ti lo mveni na ndo ni si lo pusu yamba ye so ayeke na yâ ti plan ni. Biani, gunda ti fango ye ni ayeke Tënë ti Nzapa. Kungba ti a-ancien ayeke ti “fa Tënë ni”. (2 Tim. 4:1, 2). Tongaso, a lingbi mbeni wamungo diskur abi bê mbilimbili na ndo aversê ti plan ni; lo yeke fa nda ni nga tongana nyen ti sala ye alingbi na ni.
Ku pëpe ti leke tele
Mo yeke na yâ ti mbeni kongregation so alege ayeke dä mingi ti mû adiskur wala ti sala adevoir? Tongana nyen mo lingbi ti bi lê mbilimbili na ndo ala kue? Ku pëpe gi tongana lango ni aga ndulu awe si mo to nda ti leke ni.
A lingbi zo agbu li nzoni na ndo adiskur na adevoir ti lo ti tene a mû biani ye ti nzoni na kongregation. Tongaso, sala si a ga ye ti tele ti mo ti diko aye so ayeke na gunda ti diskur wala devoir ti mo oko oko gi na ngoi so mo wara ni. Ye so ayeke mû ande lege na mo ti gbu li na ndo ni na ngoi so mo yeke sala ambeni kusala nde. Na yâ alango wala ayenga so aga kozo na diskur ti mo, peut-être mo lingbi ti mä ambeni tënë so ayeke mû maboko na mo ti bâ tongana nyen ti sala kusala nzoni mingi na asango ni. Ambeni ye alingbi ti si so afa so asango ti diskur wala ti devoir ti mo ni alingbi biani na ngoi ni. Ti diko na ti gbu li na ndo devoir ti mo gi na ndembe so mo wara ni ahunda ngoi, me ngoi so ayeke hon senge senge pëpe. Tongana mo duti fadeso ti leke plan ti mo, mo yeke wara ande aye ti nzoni so aga na peko ti so mo gbu li ti mo kozoni na ndo devoir ni. Lekengo adevoir ti mo tongaso ayeke sala ande si gingo bê ti mo akiri na peko mingi na a yeke mû maboko na mo ti mû diskur ni na mbeni lege so aga na ye ti nzoni na azo ti kongregation na andu bê ti ala.
Tongana mo bâ na nene ni mingi matabisi so a mû na mo ti mû mbage na programme so Jéhovah aleke ti fa ye na azo ti lo, mo yeke gonda lo ande na mo yeke duti mbeni deba nzoni teti azo so andoye lo.—Es. 54:13; aRom. 12:6-8.