Gango nzoni na Ekole ti Kusala ti aChrétien

NA NDO sese kue, na yâ ti akodoro ahon 200, a-élève kutu mingi ayeke wara yenga oko oko aye ti nzoni na lege ti Ekole ti Kusala ti aChrétien. Ambeni ayeke afini zo, na ambeni nde aninga na ekole ni ngu mingi awe. A yeke sala ekole ni na ando saki mingi. Atâa mo yeke na ndo wa na ndo sese, mo lingbi ti wara oko fango ye so. Azo so ngu ti ala, kete mara ti ala na hingango mbeti ti ala ayeke nde nde ayeke manda senge senge ye so alondo na Nzapa.

Tongana a zi yanga ti ekole so na yâ ti akongregation ti aTémoin ti Jéhovah na ngu 1943, a fa nda ti ekole so tongaso: “Ti leke ‘akoli be-ta-zo’ kue, ala so amä Tënë ti Nzapa na afa na gigi so ala mä na bê na ni, si ala ‘lingbi ti fa ye na ambeni zo’ . . . ti tene a leke zo oko oko . . . ti fa na gbele azo nzoni ahon ti kozo beku so ayeke na yâ lo.” (Cours pour le ministère théocratique, l. 4) Juska laso, ekole ni angbâ ti zia oko ye so na gbele lo.

Biani, ye wa, so ayeke nzoni ahon atanga ni kue, e kue e lingbi ti sala na matabisi ti salango tënë so Nzapa amû na e? Bible akiri tënë na ni, a tene: ‘Zia ye kue so ayeke na mbö asepela Jéhovah. I sepela Jéhovah!’ (Ps. 150:6). Tongana e sala tongaso, e yeke zia ngia na bê ti Babâ ti e ti yayu. E yeke fa na lo so bê ti e asi na kota singila ndali ti nzobe na ndoye so lo fa na mbage ti e. Nda ni la a hunda na aChrétien ti “mû sacrifice ti merci na Nzapa lakue na lege ti Lo, sacrifice so ayeke lengo ti yanga so asepela iri ti Lo.” (aHéb. 13:15). Ti mû maboko na mo ti maï kode ti mo ti sala kusala na amatabisi so Jéhovah amû na mo ti sepela na lo, e yamba mo tongana élève na Ekole ti Kusala ti aChrétien.

Na yâ Ekole ti Kusala ti aChrétien, a yeke bi lê mingi na ndo dikongo mbeti na gbele azo nga na ndo akode ti salango tënë na ti fango ye. Me anzoni ye ti ekole so angbâ gi ge pëpe. Na ngoi so mo yeke mû mbage dä, a yeke mû ande maboko na mo ti kono akpengba kode so: dikongo ye teti mo mveni, mango tënë nga dango bê na ni, mandango ye, gingo nda ti atënë, bango yâ ti atënë nga lekengo ni nzoni, salango lisoro, kiringo na atënë nga sungo na mbeti atënë so ayeke na li ti mo. Bible mveni nga na ambeti ti e ayeke duti ande aye so ayeke mû lege na mo ti manda ye, ti kiri na tënë nga ti sala adevoir na ekole ni. Na ngoi so mo yeke zia na yâ li ti mo atâ tënë ti ngele ngangu so mo wara na yâ Bible, fade mo yeke manda ti bi bê legeoko tongana Nzapa. So tâ ye ti nzoni si ayeke duti ande na yâ ambage kue ti fini mo! Na ndo ngele ti Tënë ti Nzapa, William Lyon Phelps, mbeni wafango ye na kota da-mbeti ti ngoi ti e, atene: “A lingbi ti hiri biani zo kue so ahinga Bible nzoni, zo so ahinga mbeti. . . . Ti mbi, ngele ti ye so zo ahinga na yâ Bible, sân ti gue na kota da-mbeti, ayeke kota ahon ngele ti ye so zo amanda na kota da-mbeti, sân ti hinga Bible.”

Lege ti wara nzoni dä mingi

Biani, ti wara nzoni mingi na yâ Ekole ti Kusala ti aChrétien, a lingbi mo élève ni, mo sala ngangu mo mveni. Bazengele Paul awa Timothée, Chrétien so asala kusala legeoko na lo, lo tene: “Mo bata ye so kue nzoni; zia bê ti mo kue na ye so, si azo kue alingbi bâ lege so mo yeke kpengba.” (1 Tim. 4:15). Mo lingbi ti sala ngangu na yâ ambilimbili ye wa?

Sala kue ti gue na Ekole ti Kusala ti aChrétien yenga oko oko. Sala kusala na ndara na buku so, Wara nzoni na lege ti Ekole ti Kusala ti aChrétien. Sû iri ti mo na place so a zia ndali ni na kozo lembeti ni. Gue na buku ni lakue na ekole. Mo lingbi nga ti sala mbeti na yâ buku so. Tongana mo diko na yâ ni mbeni pendere tënë so mo bâ ayeke mû maboko na mo ande, sû kamba na gbe ni. Sû na akota place so a zia na yanga ti alembeti ni apendere tënë so mo manda na ngoi ti alisoro na ekole ni.

A mû programme ti Ekole ti Kusala ti aChrétien nde na buku so. Na yâ ni, a yeke wara nga anzene nzene tënë na ndo lege so fade a yeke sala na ekole ni. Mo lingbi ti bâ so a yeke duti nzoni ti bata programme ni na yâ buku so, ti wara ni hio.

Na lekengo tele teti ekole ni yenga oko oko, hinga so kozo buku so e yeke manda ayeke biani Bible. Zia na kozo ndo dikongo mbeni mbage ni so a leke teti yenga ni. A yeke duti nga mbeni ye ti nzoni mingi tongana mo lingbi ti wara lege ti diko kozoni ambeti so a yeke sala ambage nde nde ti ekole ni na yâ ni.

Na ngoi ti ekole ni, a lingbi ti hunda na azo ti mû mbage na alisoro. Gi ti wara ye ti nzoni mingi dä. Tongana mo bi tele ti mo na yâ mara ti alisoro tongaso, ye so ayeke mû ande maboko na mo mingi ti dabe ti mo na ye so mo mä, nga ti sala ye alingbi na ni na yâ fini ti mo.

Biani, lege ayeke zi na a-élève kue ti sala adevoir wala adémonstration na gbele kongregation. Sala kusala nzoni na alege kue so azi na mo so. Sala ngangu biani ti maï akode ti salango tënë kue so a mû na mo. A yeke mû na mo ande wango ti ngbâ ti gue na li ni. Yeda na maboko so a mû tâ gi na mo mveni. Sû na yâ buku ti mo ambilimbili wango so a mû na mo na ndo ye so mo mveni mo lingbi ti sala ti maï kode ti mo. A yeke ngangu ti tene zo abâ lo mveni tongana ti so ambeni zo nde alingbi ti bâ na lo. Tongaso, awango kue so a mû na ndoye, so alondo na yâ ti Bible, alingbi ti mû maboko mingi na mo ti gue na li ni, atâa mo yeke na ekole ni a ninga ngu mingi awe.​—aProv. 1:5.

Mo ye ti gue na li ni hio mingi? Mo lingbi biani tongana mo mveni mo to nda ti sala ambeni ye kozo. Diko kozoni ye so élève oko oko ayeke sala tënë ande na ndo ni. Tongana a hunda ti wara mbeni zo ti sala devoir na place ti mbeni élève, mo lingbi ti mû tele ti mo ti sala ni. Na lege so, mo yeke manda ye mingi ahon ti kozo. Tongana azo ayeke sala tënë, mä nzoni tongana nyen ala yeke sala devoir ni. E yeke manda ye na lege ti amba ti e.

Na ndo ni, tongana lege ayeke dä, mo lingbi ti pusu na loro guengo na li ni ti mo na lege so mo manda buku so kozoni. Na pekoni so mo hunzi nzoni awe aye ti manda 15 so ayeke ga, yeke yeke manda mbage so: “Kapa ti maï kode ti salango tënë na ti fango ye”, so ato nda ni na lembeti 78. Kozoni kue, manda akode ni oko na oko, na tara tele ti mo alingbi na ye so a fa na yâ ni. Mû ye so mo yeke manda ti sala kusala na ni na fango tënë. Ye so alingbi ti sala si mo gue na li ni hio mingi tongana zo so asala tënë na gbele azo kue, nga so afa Tënë ti Nzapa.

Ekole ti Kusala ti aChrétien ayeke mû ande maboko na mo ti lingbi ti sala aye so ayeke kota ahon atanga ni kue na yâ fini ti mo. Teti so e yeke na fini ngbanga ti so bê ti Nzapa aye tongaso, tongana e sepela lo, e sala awe tâ ye so a leke fini ti e ndali ni. Jéhovah Nzapa alingbi na gonda so ayeke nzoni ahon atanga ni kue (Apoc. 4:11). Ni la, fango ye so e wara na ekole amû lege na e ti sala ye so, si e gbu li nzoni, e sala ye na ndara na e fa na azo nzoni apendere tâ tënë ti Bible so a sû na gbe ti yingo ti Nzapa.