Bâ anzoni sarango ye ti amba ti mo
Kpale ni
Tongana zo ayeke pensé gï na lo wani mingi ayeke gue na lo ti ke amba ti lo, Zo tongaso ayeke mû terê ti lo na valeur mingi ahon amba ti lo. A yeke mbeni ye so tongana e sara ngia ape e kue e peut ti tï na yâ ni. Mbeni bakari (Encyclopædia Britannica) atene: “Mingi ti amara apensé so, lege so ala yeke vivre na ni, akobe so ala yeke te, bongo so ala yeke yü, asarango ye ti ala, aye so ala mä na bê na ni nga na ambeni ye ni nde la ayeke nzoni ahon ti amba ti ala.” E yeke sara tongana nyen ti zi mara sioni pensé tongaso na li ti e?
Mama-ndia ti Bible
“Ala sara terê ti ala kete na ala bâ amba ti ala tongana azo so ayeke kota ahon ala.”—APHILIPPIEN 2:3.
Versê so aye ti tene nyen? Versê so aye ti fa so tongana e sara terê ti e kete, e yeke pensé na e wani ahon ndö ni ape. Tongana e sara terê ti kete, e yeke bâ so na yâ ti ambeni ye amba ti e asara ye nzoni ahon e. Mbeni mara so aye ti ala kue ayeke nzoni nzoni ayeke dä ape.
Bâ tapande ti Stefan. Lo kono lani na yâ ti mbeni kodro so ayeke communiste. Me lo wara lege ti hon ndö ti sioni pensé so lo yeke na ni kozo na ndö ti azo so alondo na akodro so ayeke communiste ape. Me lo tene: “Mbi bâ so tongana zo abâ so amba ti lo ayeke kota ahon lo, a yeke aidé lo mingi ti hon ndö ti sioni pensé so lo yeke na ni na ndö ti ala. Mbi hinga ye kue ape. Mbi peut ti manda ye na mbage ti azo kue.”
Ye so mo peut ti sara
Hinga so mo yeke na limite na girisa ape so mo kue mo yeke sara ka afaute. Hinga so ambeni ye so mo sara nzoni ape, ambeni zo asara ni nzoni ahon mo. Tene ape so na yâ ti mara tongaso wala azo tongaso, kua ti ala ka gï la.
A hon ti duti na sioni pensé na ndö ti mbeni zo, hunda terê ti mo:
Hinga so ambeni ye so mo sara nzoni ape, ambeni zo asara ni nzoni ahon mo
Eskê sarango ye ti zo ni so mbi ke so ayeke sioni wala ayeke gï nde na ti ti mbi?
Tongana zo ni abâ mbi, lo kue lo yeke bâ ande asioni sarango ye na mbage ti mbi ape?
Aye wa la zo ni ahinga ti sara ni nzoni ahon mbi?
Tongana mo kiri tënë na lege ni na ahunda so, a yeke sara si mo yeke zi asioni pensé so mo yeke na ni na ndö ti zo ni nga mo yeke bâ ande ambeni nzoni sarango ye na mbage ti lo so anzere na mo.