Aye so ambeni zo amä na bê na ni

A-Hindou

amä na bê so pasi ayeke ye ti peko ti aye so zo asara na yâ ti gigi ti lo ândö wala na temps so a dü lo na yâ ti mbeni terê ândö. Ala tene so tongana zo ni asara sanka ti aye ti sese, tongana lo kui a yeke kiri ti dü lo mbeni ape, ge la apasi ti lo ayeke hunzi.

A-Musulman

abâ pasi tongana punition ti Nzapa ndali ti asiokpari ti e me nga so Nzapa ayeke sara kua na ni ti tara mabe ti azo. Docteur Sayyid Syeed, président ti kota bungbi ti amusulman na Amérique du Nord atene so aye ti ngangu so ayeke si ayeke mbeni dango bê na e “ti ngbâ lakue ti kiri merci na Nzapa ndali ti aye ti nzoni kue so lo sara na e nga ti hinga so a lingbi e aidé azo so ye amanke ala.”

Coutume ti aJuif

afa so pasi ayeke futa ti ye so zo asara. Ambeni Juif atene so zingongo ti akuâ ayeke duti ande dä, na pekoni awe la a yeke futa ande azo so tënë ayeke na li ti ala ape ndali ti apasi so ala bâ lani kozo. Ambeni nde afa so tongana zo akui, a yeke kiri ti dü lo fani oko wala fani mingi na yâ ti mbeni terê nde, ti mû lege na lo ti payé afaute ti lo.

A-Bouddhiste

amä na bê so tongana zo akui, a yeke kiri ti dü lo fani mingi. Ala tënë so zo ni ayeke ngbâ ti bâ pasi juska lo zia lege ti sioni sarango ye ti lo nga na sioni pensé so lo yeke na ni. Tongana mbeni zo asara ye na ndara, lo sara aye ti nzoni nga lo sara kue ti tene apensé ti lo aga sioni ape, lo yeke wara mbeni dutingo so pasi ayeke dä ape; so ala iri ni nirvana.

Azo so asara nzapa ti Confucius

atene so mingi ti pasi so azo ayeke bâ ayeke ndali ti erreur ti ala nga na aye so ala sara si atï na ngu. Ala tene so tongana zo asara ye ti nzoni, apasi ti lo ayeke diminué, na ati so angbâ ayeke ati so ayingo la ayeke na gunda ni. Ala tene so na yâ ti mara ti aye tongaso, zo adoit gï ti yeda na ye so destin afa.

Ambeni bungbi ti nzapa na Afrika

atene so tongana zo abâ pasi, andâ asioni yingo la ayeke na peko ni. Ala tene so asioni yingo apeut ti mû chance na zo wala apeut ti sara pasi na zo me so tongana zo asara ayorö ti akotara, apasi ti lo ni apeut ti diminué. Ndali ni la ala mä na bê so tongana terê ti zo ason, ayorö ti azo ti nganga apeut ti buba yâ ti ye so asioni yingo ni angbâ ti sara na zo ni so.

A-Chrétien

amä na bê so pasi abâ gigi ndali ti siokpari ti kozo koli na kozo wali, tongana ti so Bible afa na mbeti ti Genèse. Me gbâ ti a-eglize akiri azia ambeni tënë nde na ndö ni. Na tapande, ambeni zo ti eglize Catholique atene so Nzapa apeut ti sara kua na pasi ti mbeni zo ndali ti nzoni ti eglize wala ti tene mbeni zo awara salut.