“I yeke ti sese so pëpe”: Tongana nyen?

NA SIÈCLE osio ti ngoi ti e, azo saki mingi so atene ala yeke aChrétien, adö azia akungba, afami, nga na salango ye ti ala kue ti gue ti duti ala oko na ayando ti Egypte. Na salango tongaso ala ga a-anachorète. Tënë so alondo na tënë anakorêtès na Grec, so aye ti tene “lo so azi tele ti lo yamba”. Mbeni wasungo-mbaï atene so ala ke songo kue na azo so ayeke na ngoi ni kâ. Na zingo tele ti ala yamba na tanga ti azo, a-anachorète abâ lani so ala yeke bata komandema so atene a lingbi Chrétien ‘aduti ti sese so pëpe’.​— Jean 15:19.

A yeke tâ tënë so Bible awa aChrétien ti ‘bata tele ti ala mveni si ala ga sioni pëpe na lege ti ye ti sese so.’ (Jacques 1:27). Bible atene polele: “I azo so i sala lango-sioni, i hinga pëpe? ti ndoye sese so ayeke ti ke Nzapa. Tongaso zo so aye ti ga ndeko ti sese so, lo sala si lo mveni aga wato ti Nzapa.” (Jacques 4:4). So aye ti tene a lingbi aChrétien ake songo na tanga ti azo kue? A lingbi ala zi tele ti ala yamba na azo so ayeke na oko mabe na ala pëpe?

Chrétien ake songo na tanga ti azo kue pëpe

Na yâ aversê ti Bible mingi, a yeke wara tënë ti dutingo nde na sese. Aversê so agboto lê ti Chrétien na ndo nene ti duti nde na bungbi ti azo so ayeke yongoro na Nzapa (Bâ 2 aCorinthien 6:14-17; aEphésien 4:18; 2 Pierre 2:20). Ndani la aChrétien ayeke kpe bango ndo, adiskur, na asalango ye ti azo so alingbi tâ gi na sese so, so ague nde na ambilimbili lege ti Jéhovah. A yeke aye tongana gingo na kota bê mosoro, nzara ti duti kota zo, nga salango ye kue so bê ti zo aye (1 Jean 2:15-17). A-Chrétien ayeke duti nga nde na sese na yorongo yanga ti ala pëpe na yâ abira nga na poroso.

Jésus Christ atene so adisciple ti lo ‘ayeke duti ande ti sese so pëpe’. Me lo tene nga na Nzapa na yâ sambela: “Mbi hunda Mo ti lungula ala na sese so pëpe, me ti bata ala si wato-sioni asala ye na ala pëpe.” (Jean 17:15). A yeke polele, Jésus ahunda lani pëpe na adisciple ti lo ti ke tanga ti azo kue, wala ti duti na songo oko pëpe na azo so ayeke aChrétien pëpe. Ti bâ ni nzoni, dutingo nde na tanga ti azo kue alingbi oko pëpe na kusala ti Chrétien ti fa tënë na ti fa ye na ‘gbele azo nga da na da’.​—Kusala 20:20; Matthieu 5:16; 1 aCorinthien 5:9, 10.

Wango ti duti na saleté oko pëpe na mbage ti sese amû lege na Chrétien pëpe ti bâ so lo yeke kota ahon tanga ti azo kue. Zo so akpe mbito ti Jéhovah ake “fandara” na bê oko (aProverbe 8:13). A-Galate 6:3 atene so “tongana mbeni zo atene na bê ti lo, lo yeke kota zo, tongana lo yeke gi zo senge, zo so ayeke handa tele ti lo mveni.” A yeke tongaso ngbanga ti so “azo kue asala siokpari awe, ala lingbi na gloire ti Nzapa pëpe”.​—aRomain 3:23.

‘Tene sioni tënë na tele ti mbeni zo pëpe’

Na ngoi ti Jésus, ambeni zo ayeke ke zo kue so ayeke na yâ bungbi ti vorongo ti ala pëpe. A-Farizien ayeke lani tongaso. Ala hinga nzoni mingi Ndia ti Moïse nga na anzene nzene ye ti akotara ti ala (Matthieu 15:1, 2; 23:2). Ala pika kate ti ala so ala yeke mû peko ti andia ti amatanga tâ na lege ni. Ala fa so ala yeke kota ahon tanga ti azo kue gi ndali ti so ala hinga mbeti mingi, nga ndali ti kota ndo ti ala. Ala fa na gigi ndendia nga na baba ti ala na tenengo: “Azo mingi so, so ahinga Ndia pëpe, zonga ayeke na li ti ala!”​—Jean 7:49.

Ye oko, tongana nyen akozo Chrétien abâ lani azo so ayeda na tënë ti mabe ti ala pëpe? A wa lani adisciple ti Jésus ti sala ye na azo so ayeke aChrétien pëpe “na ngangu pëpe” nga ‘na nengo zo’. (2 Timothée 2:25; 1 Pierre 3:16, Buku ti Nzapa, Fini Mbuki, 1995). Na ndo ye so, bazengele Paul azia nzoni tapande. A yeke lani ngangu pëpe ti ga ndulu na lo, nga lo yeke na fandara pëpe. Ahon ti yä tele ti lo na ndo tanga ti azo kue, lo duti na tâ be-ti-molenge na lo kpengba azo (1 aCorinthien 9:22, 23). Na yâ mbeti so lo sû na gbe ti yingo na Tite, Paul awa aChrétien ti ‘tene sioni tënë na tele ti mbeni zo pëpe, ti gi tënë na zo pëpe, ti sala nzoni bê na azo, ti sala ye na ngangu pëpe.’​—Tite 3:2, FM 95.

Na yâ ti Bible, ngoi na ngoi tënë “wamabe pëpe” andu azo so ayeke aChrétien pëpe. Me ye oko amû lege pëpe ti tene a yeke iri so a hinga ala na ni. A yeke polele, a sala lani kusala na ni pëpe ti kiri na gbe ni azo so ayeke aChrétien pëpe. Ye so alingbi fade ti duti nde na akpengba-ndia ti Bible (aProverbe 24:9). A-Témoin ti Jéhovah ayeke sala ngangu ti sala ye nzoni nga na fandara pëpe na azo so ayeke aTémoin pëpe. Ala bâ a yeke na lege ni pëpe ti tene atënë so ayeke kiri na zo na peko, na ndo sewa wala avoizin ti ala so ayeke aTémoin pëpe. Ala mû peko ti wango ti Bible so atene ‘boi ti Seigneur asala ye na ngangu pëpe na azo kue’.​—2 Timothée 2:24.

“E sala ye ti nzoni na azo kue”

A yeke nzoni e bâ tongana senge ye pëpe kpale ti duti na kota songo na sese so, mbilimbili na azo so ake na bê oko akpengba-ndia ti Nzapa (Bâ 1 aCorinthien 15:33). Me tongana Bible ahunda ti “sala ye ti nzoni na azo kue”, tënë “kue” andu nga azo so ayeke pëpe na oko mabe ti Chrétien na e (aGalate 6:10). A si lani peut-être na aChrétien ti kozo siècle ti te ye legeoko na azo “so amä na bê pëpe”. (1 aCorinthien 10:27). Tongaso, aChrétien laso ayeke sala ye na lege ni na azo so ayeke na oko mabe na ala pëpe, na bango ala tongana amba ti ala zo.​—Matthieu 22:39.

A yeke duti ande na lege ni pëpe ti tene so mbeni zo ayeke sioni songo, wala zo ti pitan, gi ngbanga ti so lo hinga tâ tënë ti Bible pëpe. Azo nga na aye ayeke gbian. Ndani la a yeke na Chrétien oko oko ti bâ juska na ndo wa lo yeke duti ande na songo na ambeni zo. Ye oko, a yeke ye senge nga a gue oko pëpe na Bible ti duti nde gi e oko tongana ti so a-anachorète asala lani, wala, tongana aFarizien, ti bâ tele ti e kota na tanga ti azo kue.