Lekani Kusaka Pyakulotera!
ANTHU onsene asafuna kudziwa ninji pinafuna kucitika ntsogolo. Panango asadzudzumika na makhaliro a ntsiku na ntsiku. “Ndinadzwala mbeu mangwana?” “Ndinakwanisa kakwedza maudzu sumana inafuna kudza?” “Makhaliro akudambo anadzakhala tani kutomera nthanda ino mpaka ndzidzi wa phwando?”
2 Nee ndi pyakukwanisika kusaka kudziwa pya ntsogolo kubulukira ku makhaliro akudambo. Konsene kwene anthu asadzudzumika na pinafuna kudzacitika mu dziko yawo, mu dziko yonsene yapantsi, mu pyamalonda, m’mabasa, makamaka nyatwa zinaakhuya na zinakhuyambo anthu a m’banja mwawo. Ceneci ndi cifuno camphambvu cacibaliro cinakulumiza anthu azinji kusaka anyakulotera toera kutawira mibvundzo yawo thangwi ya pinthu pya ntsogolo.
3 Anyakulotera asalonga kuti alungu akupiringana munthu anakwanisa kutculula pinthu pya ntsogolo kwa ale adapfundziswa kuleri na kulotera pidzindikiro pinango pyakuti iwo asalonga napyo mu njira zakusiyana-siyana: Kubulukira mu pipangizo pya kudzulu (mbuto na kufamba kwa nyenyezi na maplaneta, kugumana kwa dzuwa na mwezi); mphambvu za dziko (mphepo, conzi, moto) makhaliro a pyakucitwa (kulira kwa anambwa, kumburuka kwa mbalame, kufamba kwa nyoka); makhaliro a masamba a caya angaikhwa mu copo peno mafuta padzulu pa madzi peno mbuto inagwa mapswimo angaponywa, maonekero a pfafa, mapapo na utumbo wa pinyama pikhaperekwa ntsembe; mithemba ya m’manja na “mizimu” ya anthu akufa.
Pyakulotera Pisapangiza Kuti Nee Ndi Pyadidi
4 Mitundu yonsene yakulotera, mwakukhonda tsalakana macitiro ace, ndi yakusiyana kakamwe na pinalonga Bhibhlya. Kubulukira mwa Mose, Yahova, acenjeza kazinji kene Aisraele toera akhonde kucita pinthu pyakulotera pikhacita mbumba zinango, mu kulonga kuti:
“Mbaleke kuoneka pakati pa iwe nee munthu mbodzi wakupisa mwanache wa nkazi peno wa mamuna; peno wakuikhira mitombwe kuli andzache, peno wakulonga misanganiko yakupisa, peno wakulotera, peno pinango pyakulodza, pya ufiti, pya chizimu, peno pyakuchemera anyakufa. Thangwi Mbuya anaipirwa na ale anadzipereka ku machitiro anewo akudawa. Ndi thangwi ya madawisiro anewa kuti Mbuya, Mulungu wako, achokesa madziko awa pa maso pako.”—Deut. 18:9-13; Lev. 19:26, 31.
5 Ngakhale kuti pidzindikiro peno pinthu pinango pinalonga anyakulotera pisacitika, iwo nkhabe kuthawa kutongwa kwawo. (Deut. 13:1-5; Yer. 23:32; Zak. 10:2) Kuida kunalonga Bhibhlya thangwi ya anyakulotera kusapangizwa mu ntemo unalonga kuti anthu anewa onsene asatongwa kuphiwa.—Lev. 20:27.
6 Kulotera kukhacitwambo kakamwe mu ndzidzi wa utumiki wa Yezu na anyakupfundzace. Mukakhala mpostolo Paulu pa ntsuwa ya Cipre, iye athimbana na n’fiti akhacemerwa Bari-Yezu, wakuti mpostolo ancitisa kukhala boliboli. Pontho ku Masedonya, Paulu abulusa demonyo yakulotera kuna ntsikana m’bodzi wakuthabuka, mbwenye mbuyace atsukwala kakamwe, nakuti akhawina kobiri na mphambvu yace yakulotera. (Mach. 13:6-11; 16:16-19) Natenepa, anango ninga Simau wa ku Samariya, mwakudziperekeka aleka kuphatisira pinthu pyawo pyakulotera, pontho ku Efeso azinji apisa mabukhu awo a pyakulotera akuti ntengo wace ukhali kobiri ya parata pikwi makumaxanu (panango NCr$8.000).—Mach. 8:9-13; 19:19.
MAFOKOTOZERO A MULUNGU NDI AKUSIYANA NA PYAKULOTERA
7 Pana kusiyana kakamwe pakati pa undimomwene wakubuluka kuna Mulungu na mafala akubuluka kwa anyakulotera. Kazinji kene ale anasaka pyakulotera asathabuka na utenda wa njiri-njiri, utenda unoyu usabwereswa na mademonyo akukhonda oneka. Midzidzi inango iwo asagwa angabva nyimbo zakuipa, pontho angamwa mitombwe yakuledzeresa. Mu Cigrego fala yakuti “kulotera” yabuluka ku fala maiʹne·sthai, yakuti isabveka “manyerezero akukhonda khala na phata,” isaphatisirwa toera kulonga pina citika na munthu anabuluka maphobvu nkanwa peno wakuti ntsisi yace ndi yakunyangalala na yakumangana-mangana.
8 Atumiki andimomwene a Yahova nee akhanentseka na pinentso pyenepi m’manungo peno m’manyerezero angaphatisirwa na nzimu wakucena. (Mach. 6:15; 2 Ped. 1:21) Aprofeta a Mulungu, akhalonga mbakhonda lipwa. Mwakusiyana, anyakulotera akukhonda khulupira akhacita ninga malonda mbalipwa mwakucenama.
9 M’Bhibhlya nkhabemo lemba inasimba ntundu onsene wa pyakulotera. Kazinji kene lemba ibodzi ene inakhondesa pyakulotera isakhondesambo upombo na ulukwali. (2 Am. 9:22; Nah. 3:4; Mal. 3:5; Agal. 5:19, 20; Apok. 9:21; 21:8; 22:15) Pamaso pa Mulungu pyakulotera pisalandaniswa na madawo aupanduki. (1 Sam. 15:23) Natenepa ndi pyakukhonda bverana na malemba kulonga kuti Yahova asalonga na atumiki ace ninga cipangizo “cadidi” cakulotera.
10 Ndoto zakulotera zikhasakwa na nyakulotera toera kuzifokotoza. Mwakusiyana na ndoto zikhabuluka kwa Yahova. Zakuti zikhabveka mwadidi, pontho nee zikhapenulisa kuti zikhabuluka kwa Yahova. (Gen. 20:3-7; Aton. 7:13-15; 1 Am. 3:5; Mat. 1:20; 2:12, 13, 19, 22) Pontho zingakhonda bveka, nee nyakulotera m’bodzi akhakwanisa kuzibvesesa, basi ene atumiki akuperekeka a Yahova akhakwanisa kuzifokotoza.—Gen. 40:5-19; 41:1-32, 39; Dan. 2:1-47; 4:1-28.
ANYAKULOTERA ASAKHONDWA NA YAHOVA
11 Amani wakuipa akhali na ‘munthu [panango nyakupfundza nyenyezi] Puri, ndiko kubveka ntsango, toera kusankhula ntsiku na nthanda,’ kuti aphe anthu a Yahova. (Estere 3:7-9) Tisaleri njira ineyi yakulotera:
“Mu kusankhula njira ineyi toera kukhazikisa ntsiku yakupha, Amani acita ninga pikhacita amambo na anthu a mbiri a ku Persiya, iwo nee akhakwanisa kucita mabasa mbakhonda kubvundza anyakupfundza nyenyezi, pontho akhali akukomerwa na mwai wa ndzidzi unoyu wa ntsango.”—Jamieson’s Commentary, Vol. II, tsa. 639.
12 Mu kutowerera aphungu ace a mademonyo, mwakucimbiza Amani acita masasanyiro ace akuipa. Natenepa, Yahova apangiza kaciwiri mphambvu yakupulumusa anthu ace, pontho Amani, wakuti akhakhulupira pyakulotera, akhomerwa pamuti udasasanya iye toera kukhomera Mordekai.—Estere 9:24, 25.
13 Citsandzo cinango ca mphambvu za Yahova pakati pa mphambvu za mademonyo, ndi ca mu ndzidzi udaenda Amoabu na “miyoni” yakulotera toera kulipa Balaamu nyakulotera wa ku Mesopotamya toera kupasa dzedze Israele. (Num. 22:7) Ngakhale kuti Balaamu anyerezera kapasa dzedze, mbwenye Yahova ancitisa kulonga basi ene pya nkhombo. Mwakukakamizwa na mphambvu ya Yahova, Balaamu alonga kuti: “Nkhabepo adalodza Yakobe, pontho nee pyakulotera toera kuthimbana na Israele.”—Numero, makapitulu 23, 24, Tradução do Novo Mundo.
14 Thangwi ya mbiri yakuipa ya pinthu pyakulotera, ndi pya upswiru mu ndzidzi uno wakumalisa kusaka pyenepi toera kugumana uphungu wa pinthu pya ntsogolo. Mwacibaliro mamuna asafuna kudziwa pya ntsogolo, cifuno ceneci cinakwanisika iye angalambira na kutumikira Nsasanyi wace Wankulu. Mwapyonsene, basi ene Yahova ndiye anadziwa pya ntsogolo. Ndiye basi anadziwa mamalisiro kubulukira pakutoma. (Iza. 46:9, 10) Kusiyapo pyenepi, kubulukira mu njira yace yakupereka mphangwa na Falace Bhibhlya, mwaufuni iye asapangiza mwanyapantsi pinthu pyadidi kuna anthu toera apidziwe.—Amosi 3:7.
15 Natenepa, anthu angapandukira Yahova, pontho mbathaukira M’bodzi ule anadziwa pya ntsogolo, iwo mwakukhonda dembuka asakhala na cipendamiro cakukhulupira mizimu na mademonyo. Sauli ndi citsandzo ca pakweca, iye akhali m’bodzi wakuti akhasaka Yahova toera kukhala na cidziwiso ca pinthu pya ntsogolo, mbwenye pidaluza iye mwai wa kulonga na Yahova thangwi yakukhonda kukhulupirika kwace, iye asaka mademonyo m’mbuto mwa citsogolero ca Mulungu. (1 Sam. 28:6, 7; 1 Pya dziko. 10:13, 14) Mwandimomwene lekani kucita madodo mabodzi ene!
[Cithundzithundzi pa tsamba 3]
Mphangwa izi zabuluswa mu A Sentinela ya 1.° de Fevereiro de 1970, matsamba 89-92