Basa Yathu Si Yapezi Tayu—Mphangwa izi zabuluswa mu Anuário das Testemunhas de Jeová de 2013

Myanmar

Matsamba 113​—115

‘Kufamba M’mapiri’

Nzinda wa Chin usagumanika padzulu pa mapiri a mametru 9.00 mpaka 1.800, padzulu pa bara, mbwenye mapiri anango asafika mametru 3.000. Mapiri mazinji asaphimbirwa na misitu yakupata, miti mikulu, miti ya misapo, maluwa akugaka na pimiti pyakubalika. Na thangwi ya mapiri na misitu, kukhanentsa kucita maulendo. Mizinda ya mu cisa ndi yakuphatana na miseu yakuzungunuka-zungunuka, yakuti ndi yakunentsa kufamba madzi angabvumba, kazinji kene isagwandika na madzi. Mphyakukwanisika kufika ku pisa pizinji pyakutali basi ene na miyendo. Mipingizo ineyi nee isacimwanisa atumiki a Yahova kufikisa mphangwa zadidi kwa anthu azinji.

Aye Aye Thit, adatumikira pabodzi na mamunace mu cisa ca nzinda wa Chin, alonga: “Ndakulira mu cisa cakusowa mapiri ca Delta Ayeyarwady, pontho ndadzumatirwa na mapiri akubalika a ku Chin. Ndakwira phiri yakutoma na kukomerwa kakamwe, mbwenye, pidafika ine kunkhomo, ndaluza muya, pontho ndikhadaneta kakamwe. Pidamala ine kukwira na kutcita mapiri mazinji, ndikhali wakuneta kakamwe mbandinyerezera kuti ndinafa. Pakupita kwa ndzidzi ndapfundza kukwira mapiri mwakukhonda thamanga mbandikoya mphambvu zanga. Mwakukhonda dembuka, ndikhakwanisa kufamba mpaka makilometru 32 pa ntsiku paulendo wa ntsiku zitanthatu peno zakupiringana.”

Mukupita kwa pyaka, abale a ku Chin asaphatisira njira zakusiyana-siyana toera kucita ulendo, kuphataniza buru, kavalo, njinga, mbwenye cincino asaphatisira mota, miotokala mikulu, na miotokala yakuti isakwanisa kupita m’matope. Kazinji kene abale asafamba na miyendo. Toera kufika midzi ya cifupi na Matupi, mwacitsandzo, apainiya akupambulika, Kyaw Win na David Zama akhafamba makilometru mazinji, akhakwira na kutcita mapiri. Toera kugumanika pa misonkhano ku cisa ca Hakha, nsindzo wa makilometru 270, abale a Mpingo wa Matupi akhafamba ntsiku zitanthatu peno zisere basi ene pa kuenda. Mu njira, iwo akhaimba nyimbo za Umambo, mafala awo akhabvekera m’mapiri.

Maulendo anewa akunetesa kakamwe, abale nee akhathabuka basi ene na mapiri, mbwenye, akhathabukambo na imbu na ntundu onsene wa pirombo, kazinji kene mu ndzidzi unabvumba madzi. Myint Lwin, muyag’aniri wa cisa alonga: “Pakufamba mu nsitu, ndaona usundu mbukakwira miyendo mwanga. Mudaubulusa ine, yakwira pontho miwiri. Ndanumpha mbandikwira pamuti wakugwa, mbwenye ndaona nkumbi wa misundu mbikakwira pamuti unoyu. Ndagopa, mbanditoma kuthamanga mu nsitu. Pidafika ine mu nseu, manungo anga akhadadzala na usundu.”

Kusiyapo usundu, pakhalimbo mipingizo inango. Mu cisa ca Myanmar musagumanikambo pinyama pya ntsanga ninga njiri, ditiringwe, nyalugwe, na tigres, m’mbuto zinango, musagumanika nyoka za venenu zakusiyana-siyana. Muyang’aniri wa gawo Gumja Naw, pabodzi na nkazi wace Nan Lu, mukhaenda iwo na miyendo ku mpingo ubodzi na ubodzi, akhagasa moto nkhundu-nkhundu mwawo ca masiku toera kuthawisa pinyama pya ntsanga!

Amwazi mphangwa anewa aphinga, atisiyira sagwati wadidi kakamwe. Maurice Raj alonga: “Iwo aphatisira mphambvu zawo zonsene m’basa ya Yahova. Ngakhale mudacinja iwo kuenda ku cisa cinango, akhali na cifuno cakubwerera. Mwandimomwene, phinga yawo yapasa mbiri Yahova!” Lero, ngakhale kuti ndi cisa cibodzi cakuti nkhabe anthu azinji mu dziko ineyi, nzinda wa Chin uli na mipingo minomwe, pontho na misoka mizinji yakuti iri kutali na nzinda.