Imwe Munakwanisa Kukunda Manyerezero Akuphonyeka!

1-2. Midzidzi inango Paulu akhali na mabvero api, pontho tisapfundzanji na pinthu pidancitikira? (Aroma 7:21-24)

MUSAKUMBUKANJI munganyerezera mpostolo Paulu? Musanyerezera kuti akhali misionaryo wacipapo, mpfundzisi waluso kakamwe peno munthu wakuti alemba mabukhu mazinji a m’Bhibhlya? Unoyu ndi undimomwene. Mbwenye midzidzi inango, ninga azinji a ife, Paulu akhafunikambo kuthimbana na mabvero akuphonyeka, kutsukwala na kudzudzumika.

² Lerini Aroma 7:21-24. Mu tsamba idalembera iye Aroma, Paulu apangiza kuti akhalimbo na mabvero akuti azinji a ife ali nawo. Paulu akhali Nkristu wakukhulupirika kuna Mulungu. Thangwi yakukhala nyakudawa, pikhanentsa kutsandzayisa Yahova ndzidzi onsene. Kusiyapo pyenepi, mu ndzidzi ukhanyerezera Paulu pinthu pidacita iye mbadzati kukhala Nkristu, iye akhapasika mulando.

3. Ndi mibvundzo ipi inafuna ife kutawira mu nsolo uno? (Onanimbo “Mabvekero a Mafala Anango.”)

³ Maseze Paulu akhathimbanambo na kutsukwala,a iye akhawangisira toera akhonde kunyerezera pya nyatwa zace ndzidzi onsene. Mu nsolo uno tinatawira mibvundzo iyi: Thangwi yanji midzidzi inango ‘Paulu akhanentseka?’ Ninji pidamphedza toera kukunda mabvero akuphonyeka? Tinakwanisa tani kukunda mabvero akuphonyeka?

NINJI PIDACITISA MPOSTOLO PAULU KUKHALA NA MABVERO AKUPHONYEKA?

4. Thangwi yanji Paulu akhali na mabvero akuphonyeka?

⁴ Pinthu pidacita iye mbadzati kukhala Nkristu. Paulu mbadzati kukhala Nkristu, akhadziwika na dzina ya Saulu, pontho acita pinthu pizinji pyakuipa. Mwacitsandzo, ntsiku idaphiwa Estevau, Paulu akhali nanthu. Iye akhanyerezera kuti akhacita pinthu pyadidi. (Mabasa 7:58; 8:1) Kusiyapo pyenepi, Paulu akhatcinga Akristu azinji na kuatsalakana mwakuipa.—Mabasa 8:3; 26:9-11.

5. Paulu akhapibva tani thangwi ya pinthu pidacita iye mbadzati kukhala Nkristu?

⁵ Pidamala iye kukhala Nkristu, mpostolo Paulu kazinji kene akhapasika mulando thangwi ya pinthu pyakuipa pidacita iye nduli. Pisaoneka kuti mu pyaka pizinji, Paulu akhatsukwala thangwi yakunyerezera pinthu pyenepi. Mwacitsandzo, pidalemba Paulu tsamba yakutoma kuna Akorinto, panango mu caka 55 Pakumala Kubalwa Kwa Kristu, iye alonga: “Nee ndathema kucemerwa mpostolo, thangwi ndikhatcinga mpingo wa Mulungu.” (1 Akor. 15:9) Pidapita pyaka pixanu, patsamba yace kuna Aefesi, Paulu alonga kuti akhali “munthu wangʼono kakamwe kupiringana munthu wangʼono pakati pa anthu onsene akucena.” (Aef. 3:8) Paulu apangambo Timoti kuti: “Ndikhali munthu wakuxola Mulungu, ndikhatcinga mbumba yace, pontho ndikhali waukali.” (1 Tim. 1:13) Pakucedzera mipingo, panango pikhali pyakunentsa kuna Paulu thangwi yakugumana abale na alongo akuti akhaatcinga peno acibale awo.

6. Ninji pikhacitisa Paulu kukhala wakudzudzumika kakamwe? (Onanimbo cidzindikiro capantsi.)

⁶ Paulu akhathabuka kakamwe. Paulu alonga pya nyatwa zikhandzudzumisa kakamwe zakuti zikhali ninga “aikhwa munga mʼmanungo.” (2 Akor. 12:7) Mwandimomwene Paulu nee alonga ntundu wa nyatwa zikhatamba iye. Mbwenye mafalace asapangiza kuti nyatwa zenezi zikhanthabusa kakamwe. Panango nyatwa zenezi zikhali za manungo, manyerezero peno nyatwa zinango.b

7. Thangwi yanji pikhali pyakunentsa kuna Paulu kucita pinthu pyadidi ndzidzi onsene? (Aroma 7:18, 19)

⁷ Paulu akhatsukwala thangwi ya madodo akhacita iye. Ngakhale tenepo, akhawangisira toera kucita pinthu pyadidi. (Lerini Aroma 7:18, 19.) Mbwenye iye alonga kuti midzidzi inango nee akhacita pinthu pyadidi pikhafuna iye kucita. Paulu alongambo kuti akhawangisira toera akhonde kucita pinthu pyakuipa, mbwenye acite pinthu pyadidi. (1 Akor. 9:27) Midzidzi inango, Paulu akhalonga pinthu pyakuti nee akhafunika kupilonga, pontho akhacita pinthu pyakuti nee akhafunika kupicita. M’midzidzi ineyi, iye akhatsukwala kakamwe.

NINJI PIDAPHEDZA PAULU MU NDZIDZI UKHALI IYE WAKUTSUKWALA?

8. Ndi pinthu pipi pinango pidacita Paulu pyakuti pyam’phedza kucinja makhaliro ace?

⁸ Paulu abvesesa mwadidi kuti nzimu wakucena unakwanisa kuphedza Akristu toera kusiya kunyerezera pinthu pyakuipa mbanyerezera pinthu pyadidi. Tinakwanisa kubvesesa pyenepi kubulukira m’matsamba adalemba iye. (Aroma 8:13; Agal. 5:16, 17) Paulu alonga makhaliro akuti Akristu asafunika kuacalira toera atsandzayise Yahova. (Agal. 5:19-21, 26) Pyenepi pisapangiza kuti Paulu abvesesa kuti akhafunika kuwangisira toera kukhala na makhaliro adidi. Panango iye afufudza m’malemba pinthu pikhafunika iye kucinja, pontho kuti mbadacita tani macinjo anewa. Tingaleri pinthu pidalembera Paulu anthu anango, toera acite pinthu pinatsandzayisa Mulungu, tinakwanisa kukhala na cinyindiro cakuti iye acitambo pibodzi pyene.

9-10. Ninji cidaphedza Paulu toera kukunda mabvero akuphonyeka? (Aefesi 1:7) (Onanimbo foto.)

⁹ Maseze midzidzi inango Paulu akhali wakutsukwala, pakhali na pizinji pikhantsandzayisa. Mwacitsandzo, iye akhatsandzaya angabva mphangwa zadidi thangwi ya mipingo ya kutali. (2 Akor. 7:6, 7) Uxamwali ukhali na iye na abale na alongo, ukhancitisa kukhala wakutsandzaya. (2 Tim. 1:4) Kusiyapo pyenepi, Paulu akhatsandzaya thangwi ya kukhala na uxamwali wakuwanga kakamwe na Yahova, pontho akhantumikira na “cikumbuntima cakucena.” (2 Tim. 1:3) Pikhali Paulu nkaidi ku Roma, iye awangisa abale na alongo toera ‘atsandzaye mwa Mbuya.’ (Afil. 4:4) Mafala a Paulu asapangiza kuti nee akhanyerezera pya nyatwa zace peno madodo ace ndzidzi onsene. Mu ndzidzi ukhatoma iye kunyerezera pinthu pyakuti mbapidantsukwalisa, mwakucimbiza akhacinja mbatoma kunyerezera pinthu pyakuti mbapidantsandzayisa.

¹⁰ Cinthu cinango cikhaphedza Paulu toera kupitiriza kukhala wakutsandzaya, ndi kuona ciomboli ninga muoni udampasa Mulungu. (Agal. 2:20; lerini Aefesi 1:7.) Paulu akhali na cinyindiro consene cakuti mbadalekererwa na Yahova kubulukira mu ntsembe ya ciomboli ya Yezu Kristu. (Aroma 7:24, 25) Natenepa, Paulu mbadakwanisa “kulambira” Mulungu mwakutsandzaya, mwakukhonda tsalakana madawo adacita iye kale.—Aheb. 9:12-14.

11. Pidacitikira Paulu pinakuphedzani tani mungakhala na mabvero akuphonyeka?

¹¹ Ninga Paulu, ife tinakwanisa kubvesesa kuti tisafunika kuwangisira kakamwe toera tikhonde kunyerezera, kulonga peno kucita pinthu pyakuti pinatsukwalisa Yahova. Midzidzi inango, panango tinatsukwala thangwi yakukhonda kutsandzayisa Yahova ndzidzi onsene. Mulongo unango anacemerwa Elizac alonga tenepa thangwi ya mabvero ace: “Kunyerezera nyatwa zidatamba Paulu, kusandibalangaza kakamwe, thangwi ndisaona kuti nee ndine basi anatamba nyatwa. Pidacitikira Paulu pisandikumbusa kuti Yahova asabvesesa nyatwa zonsene zinatamba atumiki ace.” Ninga Paulu, tisafunika kucitanji toera tikhale na cikumbuntima cakucena, akutsandzaya, mwakukhonda kutsalakana mabvero athu?

TINAKUNDA TANI MABVERO AKUPHONYEKA?

12. Thangwi yanji kucita pinthu pyakuti pinawangisa uxamwali wathu na Yahova ndzidzi onsene kunatiphedza?

¹² Pitirizani kucita pinthu pyakuti pinakuphedzani toera kukhala na uxamwali wakuwanga na Yahova. Ife tisakhala na ungumi wadidi, tingadya pinthu pyakupasa ungumi, tingathamula manungo na tingagona mwakukwana. Munjira ibodzi ene, ife tinakwanisa kubalangazika tingaleri Bhibhlya ntsiku zonsene, kumwaza mphangwa, kukhunganyika misonkhano, kugumanika pa misonkhano na kupereka mitawiro. Kupitiriza kucita pyenepi kunatiphedza toera kunyerezera pinthu pyadidi m’mbuto mwakunyerezera pinthu pyakuti pinatitsukwalisa.—Aroma 12:11, 12.

13-14. Kucita pinthu pyakuti pinawangisa uxamwali wathu na Yahova kwaphedza tani abale na alongo anango?

¹³ Onani pidacitikira John. Pikhali iye na pyaka 39 pyakubalwa, adzindikirwa kuti akhali na utenda wakugopswa wa kankro. Pakutoma iye agopa kakamwe mbakhala wakudzudzumika. Iye atsukwala kakamwe, pontho nee akhatawira kuti akhali na utenda unoyu thangwi iye akhali m’phale. Mu ndzidzi unoyu mwanace wamamuna akhali na pyaka 13 pyakubalwa. Ninji pidaphedza John toera kukunda manyerezero anewa akuphonyeka? Iye alonga: “Maseze ndikhali wakutsukwala, ine ndikhacita pyonsene toera banja yathu ipitirize kucita pinthu pyakuti pinawangisa uxamwali wathu na Yahova. Ife tikhawangisira toera kugumanika pa misonkhano mwakukhonda phonya, m’basa yakumwaza mphangwa masumana onsene na kucita kulambira kwa banja mwakukhonda phonya, maseze tikhali na pyakucita pizinji. Tingatamba nyatwa, pakutoma tisatsukwala kakamwe. Mbwenye ndapfundza kuti mwakukhonda dembuka Yahova asatipasa mphambvu, pontho asapangiza kuti asatifuna. Yahova anakwanisa kukuphedzani munjira ibodzi ene.”

¹⁴ Eliza adalongwa pakutoma alonga: “Midzidzi yonsene inagumanika ine pa misonkhano, mu ndzidzi unacita ine pfundziro ya munthu paekha, ine ndisakhala na cinyindiro cakuti Yahova asandibvesera, pontho asandifuna. Pyenepi pisanditsandzayisa kakamwe.” Muyang’aniri wa cisa wa ku Afrika anacemerwa Nolan, alonga tenepa thangwi ya mabvero ace na a nkazace anacemerwa Diane: “Ife tisawangisira kucita pinthu toera kuwangisa uxamwali wathu na Yahova maseze tikhale akutsukwala. Ndzidzi onsene Yahova asapangiza kuti asatitsalakana mbatiphedza toera kukhala na mabvero adidi. Ife tisakumbuka kuti Yahova anatiphedza na kutipasa nkhombo. Maseze tikhonde dziwa kuti anapicita tani, tisakhala na cinyindiro consene cakuti anatiphedza.”

15. Ndi pinthu pipi pinango pinafunika ife kucita toera kukunda mabvero akuphonyeka? Perekani citsandzo.

¹⁵ Ife tinakwanisambo kucita pinthu pinango toera kukunda mabvero akuphonyeka. Mwacitsandzo, nyerezerani kuti nsana wanu uli kupha. Toera kuwanga, kuthamula manungo basi ene nee pinakwana. Panango munafunika kufufudza thangwi ya utenda unoyu peno kulonga na dotoro. Natenepa, imwe munakwanisa kudzindikira kuti thangwi yanji muli kubva kupha. Toera kukunda mabvero akuphonyeka, tisafunika kucita pibodzi pyene. Panango tinafunika kufufudza m’Bhibhlya, m’mabukhu athu, peno kucedza na m’bale wakuti ndi wakukola mwauzimu. Tendeni tione pinthu pinango pyakuti pinakwanisa kutiphedza.

16. Ninji cinafuna kukuphedzani toera kudzindikira pinthu pinakudzudzumisani? (Masalmo 139:1-4, 23, 24)

¹⁶ Citani phembero toera mukwanise kubvesesa pinthu pinakudzudzumisani. Mambo Dhavidhi akhadziwa kuti Yahova akhandziwa mwadidi. Na thangwi ineyi, iye aphemba Yahova toera amphedze kudziwa ‘pikhandzudzumisa.’ (Lerini Masalmo 139:1-4, 23, 24.) Imwe munakwanisa kuphemba Yahova toera akuphedzeni kudziwa kuti ninji cinakucitisani kukhala na mabvero akuphonyeka, pontho kuti munaamalisa tani. Imwe munakwanisambo kubvundzika: ‘Ninji cinandicitisa kukhala wakudzudzumika? Pali na cinthu cinandicitisa kukhala na mabvero anewa? Kazinji kene, ndisanyerezera cinthu cakuti cisanditsukwalisa?

17. Ndi pinthu pipi pinafunika imwe kupfundza pa pfundziro ya munthu paekha pyakuti pinakuphedzani? (Onanimbo foto.)

¹⁷ Sankhulani kupfundza pinthu pyakuti pisabverana na makhaliro anu. Midzidzi inango, kupfundza makhaliro a Yahova kunatiphedza kakamwe. Mwacitsandzo, kunyerezera thangwi yakulekerera kwa Yahova na ciomboli kwaphedza kakamwe mpostolo Paulu. Imwe munakwanisambo kucita pibodzi pyene. Phatisirani Bukhu Inaphatisira Mboni za Yahova Pakufufudza, Índice das Publicações da Torre de Vigia, peno mabukhu anango anagumanika mu cilongero canu, toera kupfundza thangwi ya ntsisi, kulekerera na ufuni wakukhonda mala wa Yahova. Mungagumana misolo yakuti inakuphedzani, lembani misolo ineyi pa ndandanda yanu, pontho ikhani ndandanda ineyi pa mbuto yakuti munakwanisa kuiona mwakukhonda nentsa. Mungatoma kunyerezera pinthu pinakudzudzumisani, lerini misolo ineyi, pontho phatisirani pinaleri imwe mwakubverana na makhaliro anu.—Afil. 4:8.

18. Ndi pinthu pipi pinaphedza abale na alongo anango?

¹⁸ Eliza adalongwa nduli, afufudza thangwi ya Yobe. Iye alonga: “Pidacitikira Yobe pyalandana na pinandicitikira. Yobe atamba nyatwa zizinji mbakhonda kudziwa kuti thangwi yanji pyenepi pikhacitika. Ngakhale tenepo, m’midzidzi yakunentsa, Yobe apitiriza kunyindira ciphedzo ca Yahova.” (Yobe 42:1-6) Diane adalongwa nduli, alonga: “Ine na mamunanga tisapfundza makhaliro a Yahova m’mabukhu athu. Tisapereka takhuta kakamwe kuna Yahova thangwi yakutiphedza kukhala na makhaliro ninga ace. Tingatsukwala thangwi ya madodo athu, tisakumbuka kuti Yahova ali kutipfundzisa, pontho ali kutiphedza toera kukhala anthu adidi. Pyenepi pisawangisa uxamwali wathu na iye.”—Iza. 64:8.

TINAKWANISA KUKHALA NA CINYINDIRO CAKUTI YAHOVA ANATIPHEDZA, PONTHO ANATIPASA NKHOMBO

19. Ndi mabvero api akuti tinakhala nawo midzidzi inango, pontho tinakwanisa kukhala na cinyindiro cipi?

¹⁹ Kucita pinthu pinawangisa uxamwali wathu na Yahova na kusankhula kupfundza pinthu pinabverana na makhaliro athu, nee pinamalisa mabvero athu onsene akuphonyeka. Midzidzi inango, ife tinakhala akutsukwala. Mbwenye na ciphedzo ca Yahova, tinakwanisa kukunda mabvero akuphonyeka mbatikhala akukhurudzika. Tinakwanisa kukhala na cinyindiro cakuti ndzidzi uzinji mu umaso wathu, tinakhala akutsandzaya thangwi tiri na cikumbuntima cakucena, pontho tinakhala na uxamwali wakuwanga na Yahova.

20. Tisafunika kucitanji?

²⁰ Tendeni ticite pyonsene pinakwanisa ife toera tikhonde kukundwa na mabvero akuipa thangwi ya pinthu pidaticitikira kale, nyatwa zathu, peno madodo athu. Na ciphedzo ca Yahova, ife tinakwanisa kukunda manyerezero na mabvero akuphonyeka. (Mas. 143:10) Mu dziko ipswa, nee tinafunika kuwangisira toera kukunda mabvero akuphonyeka. M’mbuto mwace, ntsiku zonsene nee tinakhala akudzudzumika, mbwenye tinakhala akutsandzaya thangwi yakutumikira Babathu waufuni, Yahova.