Kodi Ndi Ninji Pinaikha Imwe Pa Mbuto Yakutoma?

¹ Kodi munautawira tani mbvunzo unoyu? Mwandimomwene, ife tonsene tisafuna kuikha pifuno pya Umambo pa mbuto yakutoma. (Mat. 6:33) Mbwenye, tingakwanise kubvunzika: ‘Kodi pisankhulo pinacita ine pisapangiza kuti ndisaikha pifuno pya Umambo pa mbuto yakutoma?’ Biblya isatiwangisa: “Mubvundzike mwekhene.” (2 Akor. 13:5) Kodi tinakwanisa tani kubvunzika tekhene khala tikuikha Umambo pa mbuto yakutoma?

² Nzidzi Wathu: Tingakwanise kutoma m’kudinga njira inabvunga ife nzidzi wathu. (Aef. 5:15, 16) Kodi ndi nzidzi ungasi unabvungwa m’tsenzo pa sumana na sumana, kuona televizau, kuphatisira interneti, peno ubalangazi? Tingalemba nzidzi unabvunga ife m’pinthu pyenepi na kuulandanisa na unabvunga ife m’mabasa auzimu, tingakwanise kututumuka. Kodi tisabvunga midzidzi mizinji m’basa ya dziko towera kuntsidzikiza basi umaso wakukhupuka mbatisiya pakhundu basa yakucena? Kodi tisaluza kazinji kene misonkhano peno utumiki wa mmunda na thangwi ya ulendo wa kumala kwa sumana towera kacita ubalangazi?

³ Kukhazikisa Pyakutoma: Azinji a ife nee tiri na nzidzi wakukwana towera kucita pinthu pyonsene pinafuna ife. Natenepa, towera kuikha pifuno pya Umambo pa mbuto yakutoma, tisafunika kuona pinthu pidakhazikisa ife pakutoma na kundandalisa nzidzi towera “kudzindikira [pire] pinakoma [peno pyakufunika] pikulu.” (Afil. 1:10) Pyenepi pisaphataniza kupfunza Mafala a Mulungu, kucita khundu m’basa ya mmunda, kutsalakana banja na kugumanika pa misonkhano Yacikristu. (Sal. 1:1, 2; Arom. 10:13, 14; 1 Tim. 5:8; Aheb. 10:24, 25) Mabasa anango, ninga kuthamula manungo na ubalangazi wadidi, ndi akuphindulisambo. (Mko. 6:31; 1 Tim. 4:8) Mbwenye pinthu pyokhonda funika maningi pisafunika kuikhwa pa mbuto yapyo.

⁴ M’bale unango wamphale ayesera kuikha pifuno pya Umambo pa mbuto yakutoma m’kupita m’basa ya utumiki wa nzidzi onsene mbuto mwa kupfunza mabukhu makulu towera kukhunganyikira kuphata basa ya dziko. Iye apfunza cilongero cacilendo na kuenda kaphata basa ku mbuto yakuti iri na kufuna kukulu. Iye alonga: “Ndiri kukhala m’nzidzi wadidi kakamwe m’umaso wanga kuno. Ndi wakuwangisa kakamwe tani utumiki! Ndisafuna kuti aphale na atsikana onsene acite pinthu ninga ipi na abve pinabva ine. Nkhabepo cinthu cadidi kupiringana kutumikira Yahova na pyonsene piri na ife.” Inde, kuikha Umambo pa mbuto yakutoma kusabweresa nkhombo zizinji, mbwenye cakufunika kakamwe ndi kukuza Baba wathu wakudzulu, Yahova.—Aheb. 6:10.