Phedzani Anango Kukhala Axamwali A Mulungu
1 Lero, anthu a madziko onsene asapfunza midida ya Yahova. (Iza. 2:2, 3) Mbwenye, kuti anewa ‘abale misapo na kupirira,’ asafunika kufika pa kufuna Yahova. (Luka 8:15; Mko. 12:30) Mwakusowa kufuna kweneku, iwo nee anakwanisa kupirira pidzoloero pyakuipa peno kuwangisira kucita pinthu pyadidi. Njira ibodzi towera kuphedza anango kukulisa uxamwali wadidi na Yahova ndi kukulisa mwa iwo cifuno ku makhaliro a Yahova. Awangiseni kudinga mwadidi mphangwa zinagumanika m’bukhu yakuti Achegue-se a Jeová.
2 Citsanzo Cathu: Mabasa anu angakwanise kukhuya mwamphambvu kakamwe mitima ya anyakupfunza Biblya. Munaona iwo kuti musakoya uxamwali wanu na Yahova na kuona kuti usakhuya tani umaso wanu, iwo angakwanise kukhala akuwangiswa kusakulira okhene uxamwali ninga unoyu. (Luka 6:40) Inde, citsanzo cathu kazinji kene cisakhuya pikulu pyene anango kupiringana pinalonga ife.
3 Njira ikulu yakuti anyakubala asapfunzisa anawo kufuna Yahova ndi kubulukira ku citsanzo cawo. (Deut. 6:4-9) Banja ibodzi yatonga kukuza mwana wawo m’undimomwene, yaphemba uphungu kwa anyakubala akupembera. Mamuna alonga: “Maonero a anthu azinji adalonga na ine ndi akuti cakutoma ndi citsanzo ca anyakubala.” Natenepa, kubulukira ku njira ya umaso wawo onsene, anyakubala angakwanise kupasa anawo citsanzo ca pinabveka kukhala “xamwali wa Mulungu.”—Tgo. 2:23.
4 Phembero Ya M’ntima: Mungakwanisembo kuphedza anango kusakulira uxamwali na Yahova m’kuapfunzisa kucita phembero ya m’ntima. Mungakwanise kuaonesa phembero yacipangizo ya Yezu, pabodzi na maphembero mazinji a nzidzi wakutoma anagumanika m’Biblya. (Mat. 6:9, 10) Mungakwanise kupfunzisa ananu na anyakupfunza Biblya kuphembera m’kubvesera maphembero anu. Munabvesera iwo mafala anu a m’ntima, iwo asadzindikira pinabva imwe kwa Yahova. Awangiseni ‘kuphembera nzidzi onsene’ munathimbana iwo na nyatwa. (Arom. 12:12, Chiverano Chachinchino) Munatambira iwo ciphedzo ca Yahova m’nzidzi wakuthema, iwo anadzannyindira pabodzi na kunfuna ninga xamwali wandimomwene.—Sal. 34:8; Afil. 4:6, 7.