Thangwi Yanji Tisafunika Kulekerera Anango?

KODI alipo adakucitira pinthu pyakuipa?— Alipo adakutsukwalisa peno alonga pinthu pyakuti nee wakomerwa napyo?— Munthu angacita pyenepi usafunika kum’bwezera?—

Anthu azinji lero angacitirwa pinthu pyakuipa, iwo asabwezerambo pyakuipa kuna ale adaacitira pinthu pyenepi. Mbwenye Yezu atipfundzisa kuti tisafunika kulekerera ale adatitsukwalisa. (Mateu 6:12) Mphapo ndiye tani khala munthu asatitsukwalisa kazinji kene? Tisafunika kumulekerera kangasi?—

Ndi pyenepi pikhafuna kudziwa Pedhru. Ndi thangwi yace, iye abvundzisa Yezu: ‘Ndisafunika kumulekerera mpaka kanomwe?’ Nkhabe, kanomwe pyacepa. Yezu alonga kuti: ‘Usafunika kulekerera munthu adakudawira m’maulendo 77.’

Anewa ndi maulendo mazinji kakamwe. Mwandimomwene khala munthu atidawira kazinji kene, nee tinakwanisa kukumbuka pinthu pyonsene pyakuipa pidaticitira iye. Yezu akhafuna kutipfundzisa kuti: Nee tisafunika kukumbuka pinthu pyonsene pyakuipa pinaticitira anthu. Iwo angaphemba kulekererwa, tisafunika kualekerera.

Yezu akhafuna kupangiza anyakupfundzace kuti ndi pyakufunika kakamwe kulekerera anango. Pidamala Yezu kutawira mbvundzo udacita Pedhru, iye alonga nsangani ubodzi. Usafuna kuudziwa?—

Pakhali na mambo unango wakuti akhali wakukoma ntima. Anyabasace angafuna ciphedzo, iye akhaafiyarisi kobiri. Mbwenye ntsiku inango mambo akhafuna kuti anyabasace am’bwezere kobiri ikhanfiyari iwo. Penepo nyabasa m’bodzi wakuti akhafiyari mamiliyau 60, aendeswa kuna mambo. Ikhali kobiri izinji kakamwe.

Mbwenye nyabasa unoyu akhadamala kubvunga kobiri yonsene ya mambo, pontho nee mbadakwanisa kubwezera kobiri idafiyari iye. Na thangwi ineyi, mambo alonga kuti iye akhafunika kuguliswa. Pontho nkazace, anace na pinthu pyace pyonsene pikhafunikambo kuguliswa. Natenepa, kobiri ikhafuna kuguliswa na iwo, mbidakwana toera kulipa mangawa a mambo. Kodi nyabasa apibva tani?—

Iye agodama pamaso pa mambo mbadembetera: “Ndaphata miyendo, ndisakuphembani toera mudikhire, ine ndinakubwezerani pyonsene.” Mbidakhala kuti mambo unoyu ndiwe mbudacitanji?— Mambo abvera ntsisi nyabasa unoyu, mbamulekerera. Iye ampanga kuti nee akhafunikabve kulipa mamiliyau 60 onsene akhadafiyari iye. Nyabasa pidabva iye pyenepi akomerwa kakamwe.

Mphapo buluka penepo, nyabasa unoyu acitanji? Pidabuluka iye agumana nyabasa ndzace wakuti akhanfiyari basi ene kobiri 100. Iye an’khwipa n’khosi, mbampanga: “Ndibwezere pyonsene pinandifiyari iwe.” Kodi usanyerezera kuti munthu wandzeru anacitadi pyenepi ninga pidacita nyabasa unoyu wakuti akhadamala kulekererwa mangawa ace makulu na mambo?—

Nyabasa adafiyari kobiri 100 akhali ntcerengi. Iye nee mbadakwanisa kulipa kobiri pa ndzidzi unoyu. Na thangwi ineyi, iye agodama pamaso pa nyabasa ndzace mbadembetera: “Ndaphata miyendo, ndisakuphembani toera mudikhire, ine ndinakubwezerani pyonsene.” Kodi nyabasa unoyu nee akhafunika kudikhira mpaka ndzace agumane kobiri?— Khala ndiwe mbudacitanji?—

Mamuna unoyu nee akhali wakukoma ntima ninga mambo. Iye akhafuna kobiri yace mu ndzidzi unoyu. Nakuti nyabasa ndzace nee mbadakwanisa kumulipa, iye amuikhisa nkaidi. Anyabasa andzace pidaona iwo pyenepi nee akomerwa napyo. Iwo atsukwala pidaikhwa nkaidi nyabasa unoyu. Na thangwi ineyi, iwo aenda kapanga mambo pinthu pyonsene pidacitika.

Mambo nee akomerwambo napyo. Iye aipirwa kakamwe na nyabasa adakhonda kulekerera nyabasa ndzace. Na thangwi ineyi, iye ancemeresa mbambvundza: ‘Iwe nyabasa wakuipa, ine nee ndakulekerera mangawa ako onsene? Iwe ukhafunikambo kulekerera nyabasa ndzako.’

Nyabasa adakhonda kulekerera ndzace, akhafunika kupfundza kulekerera ninga pidacita mambo wadidi. Mbwenye iye nee acita pyenepi. Na thangwi ineyi, mambo amuikhisa nkaidi mpaka amale kulipa kobiri ya mamiliyau 60 ikhafiyari iye. Pisaoneka pakweca kuti nkaidi, iye nee mbadakwanisa kugumana kobiri toera kulipa mambo. Pyenepi pisabveka kuti iye mbadakhala nkaidi mpaka kufa kwace.

Pidamala iye kulonga nsangani unoyu, Yezu apanga anyakupfundzace: “Mʼbodzi na mʼbodzi wa imwe angakhonda kulekerera mʼbale wace na ntima onsene, Babanga wakudzulu anadzakutsalakanani munjira ibodzi ene.”—Mateu 18:21-35.

Ife tonsene tiri na mangawa makulu kuna Mulungu. Thangwi umaso uli na ife adatipasa ndiye. Pinafiyari ife Mulungu ndi pikulu kakamwe kupiringana pinatifiyari anthu anango. Pinthu pinatifiyari anthu anango ndi ninga kobiri 100 zidafiyari nyabasa kuna nyabasa ndzace. Mbwenye pinafiyari ife Mulungu ndi ninga kobiri ya mamiliyau 60 idafiyari nyabasa kuna mambo.

Mulungu ndi wakukoma ntima kakamwe. Iye asatilekerera tingacita pinthu pyakuipa. Iye nee asatipha toera kutitcunyusa kwenda na kwenda thangwi ya madawo athu. Pyenepi pisatipfundzisa kuti: Mulungu basi ene anatilekerera ife tingalekererambo ale anatitsalakana mwakuipa. Mwandimomwene ineyi ndi pfundziro yadidi kakamwe.

Munthu angacita cinthu cakuti cakutsukwalisa buluka penepo mbaphemba kulekererwa, unacitanji? Unamulekerera?— Mphapo ndiye tani pingacitika kazinji kene? Unamulekerera basi?—

Mbidakhala ndife adaphemba toera munthu atilekerere, nee mbatidafuna toera iye atilekerere?— Natenepa, ife tisafunikambo kucita pibodzi pyene. M’mbuto mwakulonga basi ene kuti tamulekerera, tisafunikambo kumulekerera na ntima wathu onsene. Tingacita pyenepi, tinapangiza kuti tisafuna kakamwe kukhala anyakupfundza a Mpfundzisi Wankulu.