Anthu Adakhala Anyakupfundza A Yezu

MBANI adakhala ntumiki wadidi wa Mulungu kupiringana onsene?— Ndimomwene, ndi Yezu Kristu. Kodi tinakwanisambo kukhala ninga iye?— Inde, Bhibhlya isalonga kuti tisafunika kutowezera pinthu pidacita iye. Pontho Yezu asatiphemba toera tikhale anyakupfundzace.

Usadziwa kuti pisabvekanji kukhala nyakupfundza wa Yezu?— Pisabveka pinthu pizinji. Cakutoma tisafunika kupfundza thangwi ya iye. Mbwenye nee ndi pyenepi basi. Tisafunikambo kukhulupira pinalonga iye. Natenepa, tingan’khulupira pinakhala pyakukhonda nentsa toera kucita pinatipanga Yezu.

Anthu azinji asalonga kuti asakhulupira Yezu. Usaona kuti onsene ndi anyakupfundzace?— Azinji nkhabe. Panango, iwo asaenda ku gereja. Mbwenye azinji adzati kukhala na ndzidzi toera kupfundza pidapfundzisa Yezu. Mwandimomwene ale anatowezera citsandzo ca Yezu, anewa ndiwo anyakupfundzace.

Tende tilonge pang’ono thangwi ya ale adakhala anyakupfundza a Yezu pikhali iye pa dziko yapantsi. M’bodzi mwa ale adatoma kukhala nyakupfundza a Yezu ndi Filipi. Iye apangambo xamwali wace Natanieli (wakuti akhacemerwa Bhartolomeu). Natanieli akhali nawa pantsi pamuti ninga pinaona iwe pa foto. Natanieli pidafika iye kuna Yezu, Yezu alonga: ‘Onani, uyu ndi munthu wakukhulupirika, Muizraeli wandimomwene.’ Natanieli adzumatirwa mbabvundza: “Musandidziwa tani?”

Yezu atawira: ‘Filipi mbadzati kukucemera, ine ndikhadakuona kale pikhali iwe pantsi pamuti wa nsambvu.’ Natanieli adzumatirwa pidaona iye kuti Yezu akhadziwa pa mbuto ikhali iye, mbalonga: “Imwe ndimwe Mwana wa Mulungu, imwe ndimwe Mambo wa Izraeli.”—Juwau 1:49.

Filipi na Natanieli akhala anyakupfundza a Yezu pidapita ntsiku ibodzi anango mbadamala kale kukhala anyakupfundza. Madzina awo akhali Andreya na m’bale wace Pedhru, Juwau panango na m’bale wace Tiyago. (Juwau 1:35-51) Mukupita kwa ndzidzi, iwo abwerera toera kucita basa yawo yakumedza. Ntsiku inango, Yezu akhafamba n’khundu mwa Bara ya Galileya, iye aona Pedhru na m’bale wace Andreya akhagwisira kokota m’bara. Yezu aapanga: “Nditowereni.”

Pidafamba iye pontho pang’ono, Yezu aona Tiyago na Juwau. Iwo akhali pabodzi na babawo m’bote mbakasasanyira kokota yakuphata nayo nyama za m’madzi. Yezu aacemera toera akhale anyakupfundzace. Mbidakhala Yezu acemera iwe mbudacitanji? Mbudantowera mwakucimbiza?— Amuna anewa akhadziwa mwadidi Yezu. Iwo akhadziwa kuti iye akhadatumwa na Mulungu. Na thangwi ineyi, iwo asiya basa yawo yakuphata nyama za m’madzi mbatowera Yezu.—Mateu 4:18-22.

Pyenepi pisabveka kuti pidakhala iwo anyakupfundza a Yezu nee akhacitabve madodo?— Nkhabe. Panango usakumbuka kuti iwo afika mpaka kuketesana kuti mbani akhali nkulu pakati pawo. Mbwenye iwo abvesera Yezu, mbatawira kucita macinjo. Natenepa tingatawira kucinja tinakhala ninga anyakupfundza a Yezu.

Yezu akhacemera anthu akusiyana-siyana toera akhale anyakupfundzace. Ntsiku inango m’phale m’bodzi wakuti akhali ntongi na wakupfuma abvundza Yezu kuti akhafunika kucitanji toera akhale na umaso wakukhonda mala. Ntongi unoyu pidalonga iye kuti akhabvera matongero onsene a Mulungu kutomera uwana wace, Yezu ampanga: “Bwera ukhale nyakupfundza wanga.” Usadziwa ninji pidacitika?—

Pidadziwa iye kuti kukhala nyakupfundza wa Yezu ndi kwakufunika kakamwe kupiringana kukhala na mpfuma, iye atsukwala kakamwe. Iye nee akwanisa kukhala nyakupfundza wa Yezu thangwi akhafuna kakamwe dinyero kupiringana Mulungu.—Luka 18:18-25.

Pidapita caka cibodzi na meya mbakamwaza mphangwa, Yezu asankhula anyakupfundzace 12 toera akhale apostolo. Apostolo akhali amuna akhatuma iye toera kucita mabasa akufunika kakamwe. Usadziwa madzina awo?— Tende tione khala tinakwanisa kuadziwa. Ona mafoto na madzina awo. Buluka penepo, yesera kualonga nee kuyang’ana.

Mukupita kwa ndzidzi, m’bodzi wa apostolo 12 adzakhala wakuipa. Iye akhali Yuda Iskariyoti. Buluka penepo, asankhulwa nyakupfundza unango toera akhale mpostolo. Usadziwa dzinace mbani?— Akhali Matiya. Mukupita kwa ndzidzi, Paulu na Bharnabhe adzakhalambo apostolo, mbwenye iwo nee akhacita khundu ya apostolo 12.—Mabasa 1:23-26; 14:14.

Ninga pidapfundza ife mu Nsolo 1 wa bukhu ino, Yezu akhafuna kakamwe anapiana. Thangwi yanji?— Thangwi akhadziwa kuti iwo anakwanisambo kukhala anyakupfundzace. Kazinji kene, anapiana asalonga pinthu munjira yakuti isacitisa akulu kubvesera na kufuna kupfundza pizinji thangwi ya Mpfundzisi Wankulu.

Akazi azinji akhalambo anyakupfundza a Yezu. Anango a iwo akhaenda pabodzi na Yezu pikhaenda iye kamwaza mphangwa m’mizinda inango. Mariya Madhalena, Juwana na Suzana acita pyenepi. Panango akazi anewa akham’phedza kuphika cakudya na kufula nguwo zace.—Luka 8:1-3.

Usafunambo kukhala nyakupfundza wa Yezu?— Kumbuka kuti nee usafunika kulonga basi ene kuti ndiwe nyakupfundza wace. Mbuto zonsene zinakhala ife tisafunika kucita pinthu pinapangiza kuti ndife anyakupfundza a Yezu, tayu basi tingakhala pa misonkhano Yacikristu. Unakwanisa kulonga mbuto zinango zinadziwa iwe zakuti tinakwanisa kucita pinthu pinapangiza kuti ndife anyakupfundza a Yezu?—

Ndimodi, tisafunika kupangiza kuti ndife anyakupfundza a Yezu panyumba, ngakhale kuxikola. Leka kuduwala kuti toera tikhale anyakupfundza andimomwene a Yezu, tisafunika kucita pinthu ninga iye ntsiku zonsene mwakukhonda tsalakana mbuto inagumanika ife.