Ule Adacita Pinthu Pyonsene

N DIRI na cinthu cakufunika kakamwe toera kukupanga. Usafuna kucidziwa?— Yang’ana manja ako. Funya pyala pyako. Cincino phata cinthu. Manja asakwanisa kucita pinthu pizinji. Usadziwa mbani adacita manja athu?—

Ndimodi, ndi m’bodzi ene adacita mulomo, mphuno na maso. Ndi Mulungu, Pai wace Mpfundzisi Wankulu. Nee usaona kuti Mulungu acita mwadidi kutipasa maso?— Na maso tisakwanisa kuona pinthu pizinji. Tisakwanisa kuona maluwa, tsanga na makole. Tinakwanisambo kuona mbalame zing’ono zakuti ziri na njala ninga zinapangizwa pa foto. Ndi pyakutsandzayisa kakamwe kuona pinthu pyenepi, nee ndimodi?—

Mphapo mbani adacita pinthu pyenepi? Kodi ndi munthu? Nkhabe. Anthu anakwanisa kumanga nyumba. Mbwenye iwo nkhabe kwanisa kucita tsanga. Anthu nkhabe kwanisa kucita ana a mbalame, maluwa peno pinthu pinango piri na umaso. Ukhapidziwa pyenepi?—

Ndi Mulungu adacita pinthu pyenepi pyonsene. Iye acita kudzulu na dziko yapantsi. Pontho acitambo anthu. Iye acita mamuna na nkazi wakutoma. Yezu, Mpfundzisi Wankulu, apfundzisa pyenepi.—Mateu 19:4-6.

Yezu adziwa tani kuti Mulungu acita mamuna na nkazi? Kodi iye aona Mulungu mbakaacita?— Inde, aona. Yezu akhali pabodzi na Mulungu mu ndzidzi udacita Mulungu mamuna na nkazi wakutoma. Yezu akhali munthu wakutoma adacitwa na Mulungu. Iye akhali anju, pontho akhali kudzulu pabodzi na Pai wace.

Mulungu alonga: “Tendeni ticite munthu.” (Genesi 1:26) Usadziwa kuti Mulungu akhalonga na ani?— Akhalonga na Mwanace, ule adabwera pa dziko yapantsi mbadziwika na dzina yakuti Yezu.

Mwandimomwene pyenepi ndi pyakutsandzayisa kakamwe. Nyerezera basi: Tingabvesera Yezu tisapangiza kuti tiri kupfundziswa na munthu wakuti akhali pabodzi na Mulungu mu ndzidzi ukhacita iye dziko na pinthu pinango pyonsene. Yezu apfundza pinthu pizinji pikhaphata iye basa pabodzi na Pai wace kudzulu. Cincino tisakwanisa kubvesesa kuti thangwi yanji Yezu ndi Mpfundzisi Wankulu!

Mulungu mbadzati kucita Mwanace, usanyerezera kuti akhali wakutsukwala pikhali iye ekhene?— Nkhabe, nee akhali wakutsukwala. Khala iye nee akhali wakutsukwala, mphapo, thangwi yanji acita pinthu pinango piri na umaso?— Thangwi iye ndi Mulungu waufuni. Iye akhafuna kuti pinthu pinango pikhale na umaso, pontho pikomerwe na umaso. Tisafunika kupereka takhuta kakamwe kuna Mulungu thangwi yakutipasa umaso.

Pyonsene pidacita Mulungu pisapangiza ufuni wace. Iye acita dzuwa yakuti isatipasa ceza na kupisa. Dzuwa mbidakhonda kukhalapo, pyonsene mbapidatonthola kakamwe, pontho nee cinthu cibodzi mbacidakhala na umaso pa dziko yapantsi. Nee usakomerwa thangwi Mulungu acita dzuwa?—

Mulungu asacitisambo madzi kubvumba. Midzidzi inango madzi angabvumba nee tisakomerwa nawo, thangwi nee tisakwanisa kuenda kasendzeka. Mbwenye madzi asaphedza toera maluwa akule. Mphapo tingaona maluwa akubalika tisafunika kupereka takhuta kuna ani?— Kuna Mulungu. Tingadya misapo na masamba akukoma tisafunika kupereka takhuta kuna ani?— Tisafunika kupereka takhuta kuna Mulungu, thangwi dzuwa na madzi anabvumbisa iye pisacitisa pinthu pyenepi kukula.

Nyerezera munthu angakubvundza: ‘Ndi Mulungu adacita munthu na pinyama?’ Unantawira tani?— Pinakhala pyadidi ungantawira: “Inde, ndi Mulungu adacita anthu na pinyama.” Mphapo ndiye tani munthu unoyu angakhonda kutawira kuti ndi Mulungu adacita anthu? Pontho angalonga kuti anthu abulukira ku pinyama? Mwandimomwene, Bhibhlya nee isapfundzisa pyenepi. Iyo isalonga kuti Mulungu acita pinthu pyonsene piri na umaso.—Genesi 1:26-31.

Panango munthu anakupanga kuti nee asakhulupira Mulungu. Mphapo unampanganji?— Unakwanisa kumpangiza nyumba mbumbvundza: “Mbani adacita nyumba ineyi?” Anthu onsene asadziwa kuti nyumba isamangwa na munthu. Mwakukhonda penula, nyumba nkhabe mangika yokhene!—Ahebheri 3:4.

Buluka penepo, ndoko kampangize mbuto iri na maluwa, mbumbvundza: “Mbani adacita maluwa awa?” Ninga nyumba yakuti nee isamangika yokhene, maluwa anewa nee acitikambo okha. Alipo adaacita, adaacita ndi Mulungu.

Phemba munthu unoyu toera abvesere kulira kwa mbalame. Buluka penepo mbvundze: “Mbani adacita mbalame, pontho mbani adazipfundzisa kulira?” Ndi Mulungu. Mulungu acita kudzulu, dziko yapantsi na pinthu pyonsene piri na umaso! Pontho Ndiye anapasa umaso.

Anango asalonga kuti asakhulupira basi ene pinthu pinakwanisa iwo kuona. Panango analonga: ‘Khala cinthu nee ndisaciona, nee ndinacikhulupira.’ Ndi thangwi yace, iwo asalonga kuti nee asakhulupira Mulungu thangwi nee asakwanisa kumuona.

Ndimomwene kuti nee tinakwanisa kuona Mulungu. Bhibhlya isalonga: ‘Nkhabepo munthu anakwanisa kuona Mulungu.’ Nkhabepo mamuna, nkazi peno mwana anakwanisa kuona Mulungu. Natenepa, nee munthu m’bodzi asafunika kucita cinthu cakulandana na Mulungu. Pontho Mulungu alonga kuti nee tisafunika kucita dzimunthu yakulandana na iye. Na thangwi ineyi, Mulungu nee anakomerwa na ife tingakhala na cinthu cakulandana na iye n’nyumba mwathu.—Eksodho 20:4, 5; 33:20; Juwau 1:18.

Nakuti nee tisakwanisa kuona Mulungu, tisadziwa tani kuti iye alipo? Nyerezera basi. Usakwanisa kuona mphepo?— Nkhabe, nee m’bodzi anakwanisa kuiona. Mbwenye basi ene tisakwanisa kuona pinthu pinacita iyo, ninga kutekenyesa masamba a miti mu ndzidzi inapepesa iyo. Ndi thangwi yace, tisakhulupira kuti mphepo iripo.

Pana pinthu pinango pidacita Mulungu pyakuti pisaoneka na maso. Natenepa, tingaona maluwa peno mbalame, tisadziwa kuti adacita pinthu pyenepi ndi Mulungu. Na thangwi ineyi, tinakwanisa kukhulupira kuti Mulungu alipo.

Panango munthu anakubvundza: ‘Mbani adacita dzuwa na dziko?’ Bhibhlya isalonga: “Mulungu acita kudzulu na dziko yapantsi.” (Genesi 1:1) Inde, ndi Mulungu adacita pinthu pyonsene pyakudzumisa! Usaona tani pyenepi?—

Mwandimomwene kukhala na umaso ndi pyadidi kakamwe. Thangwi tisakwanisa kubva kulira kwa mbalame, kuona maluwa na pinthu pinango pidacita Mulungu. Kusiyapo pyenepi, tisakwanisambo kudya pyakudya pidatipasa Mulungu.

Tisafunika kupereka takhuta kuna Mulungu thangwi ya pinthu pyonsene pidaticitira iye, makamaka thangwi yakutipasa umaso. Tingapereka takhuta kuna Mulungu, tinacita pinthu toera kupangiza kupereka kwathu takhuta kuna iye. Mphapo tisafunika kucitanji?— Tisafunika kum’bvera, mbaticita pinatipanga iye kubulukira m’Bhibhlya. Tingacita pyenepi tinapangiza kuti tisafuna Ule adacita pinthu pyonsene.