Tisapfundzanji na Mafala Akumalisa Adalonga Yakobe Kuna Anace Akulu Anai?

1-2. Yakobe acitanji pikhali iye dhuzi na kufa, pontho thangwi yanji? (Onanimbo foto )

PIDAKALAMBA Yakobe, iye afuluka pabodzi na banja yace buluka ku Kanani mbaenda ku Ejitu. Kweneko iye apitiriza kutumikira Yahova mu pyaka 17. (Gen. 47:28) Unoyu ukhali ndzidzi wakutsandzayisa kakamwe mu umaso wace. Kusiyapo kuona pontho mwanace wakufunika Zuze, iye akhala na mwai wa kuonambo anace onsene mbakhala pa mbuto ibodzi ene. Mbwenye pidaona iye kuti akhali dhuzi na kufa, Yakobe acemeresa anace onsene toera kuapanga pinthu pyakufunika kakamwe.—Gen. 49:28.

² Mu ndzidzi unoyu, pai angakhala dhuzi na kufa kazinji kene akhacemeresa anthu a panyumba pace mbaapanga pitsogolero. (Iza. 38:1) Panango iye akhaapanga kuti mbani akhafuna kutsogolera banja yace iye angafa.

3. Mwakubverana na Genesi 49:1, 2, thangwi yanji mafala adalonga Yakobe akhali akufunika kakamwe?

³ Lerini Genesi 49:1, 2. Mbwenye mafala adalonga Yakobe ntsiku ineyi kuna anace akhali akusiyana. Mafala adalonga iye akhali profesiya. Na ciphedzo ca Yahova, Yakobe apanga anace pinthu pyakufunika kakamwe pikhafuna kuacitikira ntsogolo pabodzi na mabanja awo. Na thangwi ineyi, tinakwanisa kulonga kuti mafala adalonga Yakobe pikhali iye dhuzi na kufa akhali profesiya.

4. Tinapfundzanji mu nsolo uno? (Onanimbo bokosi ya nsolo wakuti “Banja ya Yakobe.”)

⁴ Mu nsolo uno tinapfundza mafala adalonga Yakobe kuna anace anai: Rubheni, Simeoni, Levi na Yuda. Mu nsolo unatowera tinapfundza mafala adalonga iye kuna anace anango. Ife tinaonambo kuti Yakobe nee alonga profesiya basi ene thangwi ya anace, mbwenye alongambo thangwi ya madzindza awo akuti na ntsiku yace mbadakhala mbumba ikulu ya Izraeli. Pinthu pidacitikira dzindza ineyi pisapangiza kuti mafala a Yakobe akwanirisikadi. Mafala adalonga iye asatipfundzisa pinthu pyakufunika kakamwe pyakuti pinatiphedza toera kutsandzayisa Babathu wakudzulu.

RUBHENI

5. Rubheni panango anyerezera kuti mbadapaswanji na pai wace?

⁵ Yakobe apanga Rubheni: “Iwe ndiwe mwananga wautombo.” (Gen. 49:3) Nakuti iye akhali mwana wakutoma, Rubheni panango akhanyerezera kuti babace mbadansira pinthu pizinji kakamwe. Kusiyapo pyenepi, panango akhanyerezera kuti mbadatsogolera abale ace pai wace angafa, pontho kuti mukupita kwa ndzidzi, iye mbadapasambo anace basa ineyi.

6. Thangwi yanji Rubheni nee apaswa pikhanyerezera iye ninga mwana wautombo? (Genesi 49:3, 4)

⁶ Mbwenye Rubheni nee apaswa pikhanyerezera iye ninga mwana wautombo. (1 Kro. 5:1) Thangwi yanji? Thangwi ndzidzi ungasi pidamala kufa Rakeli, Rubheni apita m’mabonde na Bhila wakuti akhali ntumiki wa Rakeli, pontho akhali nkazi wa Yakobe. (Gen. 35:19, 22) Thangwi yanji Rubheni acita pinthu pyenepi? Iye akhali mwana wa Leya, wakuti akhali m’bale wa Rakeli. Natenepa, panango iye acita pyenepi toera Bhila akhonde kufuniwa kakamwe na Yakobe. Panango iye akhanyerezera kuti thangwi yakucita pyenepi, Yakobe mbadafuna kakamwe Leya. Thangwi inango panango ndi yakuti Rubheni akhasirira Bhila, pontho nee akwanisa kutonga pifuno pyace pyakupita m’mabonde. Mwakukhonda tsalakana mathangwi adancitisa kucita pyenepi, pinthu pidacita iye pyatsukwalisa kakamwe pai wace na Yahova.—Lerini Genesi 49:3, 4.

7. Ninji pidacitikira Rubheni na banja yace? (Onanimbo bokosi ya nsolo wakuti “Mafala Adalonga Yakobe Pikhali Iye Dhuzi na Kufa.”)

⁷ Yakobe apanga Rubheni: “Leka kupiringana abale ako.” Mafala anewa akwanirisikadi. Bhibhlya nee isalonga kuti m’bodzi wa dzindza ya Rubheni akhala mambo, nyantsembe peno mprofeta. Mbwenye pyenepi nee pisabveka kuti Yakobe nee asiira cinthu Rubheni, thangwi mukupita kwa ndzidzi, banja ya Rubheni yadzakhala ibodzi mwa madzindza a Izraeli. (Yos. 12:6) Rubheni akhadapangizambo makhaliro adidi midzidzi inango, pontho pisaoneka kuti iye nee adzacitabve ulukwali.—Gen. 37:20-22; 42:37.

8. Tisapfundzanji na pidacitikira Rubheni?

⁸ Tisapfundzanji? Tisafunika kuwangisira toera kukhala akudzitonga kuti tikhonde kucita ulukwali. Tingayeserwa toera kucita madawo, tisafunika kukumbuka kuti pyenepi pinatsukwalisa Yahova, anthu a pabanja pathu na anthu anango. Pontho tisafunika kukumbuka kuti ‘cinabzwala ife ndico cinafuna kudzabvuna ife.’ (Agal. 6:7) Kusiyapo pyenepi, pidacitikira Rubheni pisatikumbusa kuti Yahova ndi wantsisi. Ndimomwene kuti iye nee anamalisa nyatwa zinacitika thangwi ya madodo athu, mbwenye tingatcunyuka mbatiwangisira toera kucita pinthu pyadidi, iye anatilekerera mbatipasa nkhombo.

SIMEONI NA LEVI

9. Thangwi yanji Yakobe nee akomerwa na Simeoni na Levi? (Genesi 49:5-7)

⁹ Lerini Genesi 49:5-7. Yakobe alongambo na Simeoni na Levi. Iye aphatisira mafala adapangiza kuti nee akhakomerwa na pinthu pikhacita iwo. Pyaka pingasi iye mbadzati kulonga pyenepi, Sikemu wa ku Kanani apita m’mabonde mwakukakamiza na mwana wa Yakobe anacemerwa Dhina. Ana onsene a Yakobe aipirwa kakamwe na pyenepi. Pontho iwo akhali na mathangwi adidi. Mbwenye Simeoni na Levi nee akhala akudzitonga. Iwo anyengeza Sikemu na atumiki ace mbaapanga kuti mbadakhazikisa ntendere na iwo basi ene angasidzwa. Amuna anewa atawira, buluka penepo, mu ndzidzi wakuti iwo akhabva kupha thangwi ya kusidzwa, Simeoni na Levi “m’bodzi na m’bodzi akwata supada yace mbaenda ku nzinda wakuti nee ukhali na citsidzikizo, mbapha amuna onsene.”—Gen. 34:25-29.

10. Mafala adalonga Yakobe thangwi ya Simeoni na Levi akwanirisika tani? (Onanimbo bokosi ya nsolo wakuti “Profesiya Idalonga Yakobe Pikhali Iye Dhuzi na Kufa.”)

¹⁰ Yakobe aipirwa kakamwe na pinthu pyakuipa pidacita anace awiri. Iye alonga kuti Simeoni na Levi mbadabalalika mu dziko yonsene ya Izraeli. Profesiya ineyi yakwanirisika pidapita pyaka 200 mu ndzidzi udapita dzindza ya Izraeli mu Dziko Yakupikirwa. Dzindza ya Simeoni yatambira ninga unthaka mbuto yakucepa nkati mwa cisa ca Yuda. (Yos. 19:1) Pontho Levi atambira mizinda 48 ikhadamwazika mu Izraeli onsene.—Yos. 21:41.

11. Ndi pinthu pipi pyadidi pidacita anthu a dzindza ya Simeoni na Levi?

¹¹ Anthu a dzindza ya Simeoni na dzindza ya Levi nee acita madawo mabodzi ene adacita Simeoni na Levi. Dzindza ya Levi yapangiza kuti ikhali yakukhulupirika mu ulambiri wandimomwene. Aizraeli azinji pidalambira iwo dzimunthu ya ouro, Alevi akhala kukhundu ya Mose, pontho amphedza toera kupha ale akhalambira madzimunthu. (Eks. 32:26-29) Kusiyapo pyenepi, Yahova asankhula anthu a dzindza ya Levi toera kucita basa yakupambulika kakamwe yakutumikira ninga anyantsembe. (Eks. 40:12-15; Num. 3:11, 12) Ndiye tanimbo dzindza ya Simeoni? Anthu a dzindza ineyi, acita pinthu mwakubverana na pikhafuna Yahova, pontho amenya nkhondo mwacipapo pabodzi na dzindza ya Yuda mu ndzidzi ukhapita iwo mu Dziko Yakupikirwa.—Aton. 1:3, 17.

12. Tisapfundzanji na pidacita Simeoni na Levi?

¹² Tisapfundzanji? Ife tisafunika kukhala akudzitonga tingaipirwa. Khala munthu akutsukwalisani peno atsukwalisa munthu anafuna imwe, panango munaipirwa. (Mas. 4:4) Mbwenye tisafunika kukumbuka kuti Yahova nee asakomerwa tingalonga na kucita pinthu mwakuipirwa. (Tiya. 1:20) Tingatsalakanwa mwakuipa na abale na alongo athu peno anthu anango, tisafunika kuphatisira pinalonga Bhibhlya. Natenepa, tinacalira kucita pinthu pyakuipa thangwi yakuipirwa. (Aroma 12:17, 19; 1 Ped. 3:9) Kusiyapo pyenepi, ngakhale kuti anyakubala anu asacita pinthu pyakuti nee pisakomeresa Yahova, imwe nee musafunikambo kucita pinthu pinacita iwo. Lekani kunyerezera kuti ndimwe wakusowa basa peno kuti Yahova nee anakupasani nkhombo. Iye anakupasani nkhombo thangwi yakuwangisira kwanu kucita pinthu pyadidi.

YUDA

13. Thangwi yanji panango Yuda adzudzumika pidamala iye kubva mafala adalonga pai wace?

¹³ Buluka penepo Yakobe alonga na Yuda. Pidamala iye kubva mafala adalonga pai wace kuna abale ace akulu, panango Yuda adzudzumika. Thangwi iye akhadacitambo madawo makulu. Iye aphedzera kuba pinthu pyonsene pya anthu a mu nzinda wa Sikemu. (Gen. 34:27) Yuda pabodzi na abale ace agulisa Zuze ninga bitcu, mbalonga uthambi kuna pai wawo thangwi ya pyenepi. (Gen. 37:31-33) Mukupita kwa ndzidzi, anyerezera kuti nkwenyace anacemerwa Tamara ndi puta mbapita naye m’mabonde.—Gen. 38:15-18.

14. Yakobe alonganji kuna Yuda, pontho ndi pinthu pipi pyadidi pidacita Yuda? (Genesi 49:8, 9)

¹⁴ Mwakukhonda tsalakana pyenepi pyonsene, Yahova atsogolera Yakobe toera kusimba Yuda mbalonga nkhombo zikhafuna kupaswa Yuda na banja yace. (Lerini Genesi 49:8, 9.) Yuda apangiza kuti iye akhadzudzumika na mabvero a pai wace wakuti akhali nkhalamba. Iye abverambo ntsisi m’bale wace wang’ono Bhenjamini, mbayesera kum’phedza.—Gen. 44:18, 30-34.

15. Dzindza ya Yuda yapaswa tani nkhombo?

¹⁵ Yakobe alonga kuti Yuda mbadatsogolera abale ace. Ndimomwene kuti papita pyaka 200 toera profesiya ineyi ikwanirisike, mbwenye dzindza ya Yuda yapaswa nkhombo. Mu ndzidzi udabuluka Aizraeli mu Ejitu mbapita na n’thando kuenda ku Dziko Yakupikirwa, dzindza ya Yuda ndiyo ikhatsogolera Aizraeli. (Num. 10:14) Mukupita kwa pyaka, Yahova asankhula dzindza ya Yuda toera ikhale yakutoma kumenyana na Akanani mbapita mu Dziko Yakupikirwa. (Aton. 1:1, 2) Pontho Dhavidhi akhala mambo wakutoma mwa amambo azinji a dzindza ya Yuda. Mbwenye profesiya ineyi inalonga thangwi ya Yuda mbidakwanirisikambo munjira zinango.

16. Profesiya inagumanika pa Genesi 49:10 yakwanirisika tani? (Onanimbo bokosi ya nsolo wakuti “Profesiya Idalonga Yakobe Pikhali Iye Dhuzi na Kufa.”)

¹⁶ Yakobe alonga kuti m’bodzi wa dzindza ya Yuda mbadatonga anthu onsene kwenda na kwenda. (Lerini Genesi 49:10 na cidzindikiro capantsi.) Ntongi unoyu adalonga Yakobe kuti ndi Silo, ndi Yezu Kristu. Anju m’bodzi alonga tenepa thangwi ya Yezu: “Yahova Mulungu anadzampasa mpando waumambo wa babace, Dhavidhi.” (Luka 1:32, 33) Pontho Yezu asacemerwa “Nkhalamu ya dzindza ya Yuda.”—Apok. 5:5.

17. Tinatowezera tani Yahova munjira inaona ife anango?

¹⁷ Tisapfundzanji? Yuda acita madawo makulu, mbwenye Yahova apikira kumpasa nkhombo. Kodi abale ace Yuda abvundzika kuti thangwi yanji Yahova acita pikiro ineyi kuna iye? Nee tisapidziwa. Pinadziwa ife ndi pyakuti Yahova aona makhaliro adidi a Yuda mbampasa nkhombo thangwi ya pyenepi. Tinatowezera tani citsandzo ca Yahova? Khala m’bale peno mulongo apaswa mwai wakutumikira panango ife tinabvundzika kuti thangwi yanji iye apaswa mwai unoyu khala tisadziwa madodo ace. Cakufunika ndi kukumbuka kuti Yahova asaona makhaliro adidi a m’bale unoyu. Yahova asaona makhaliro adidi a atumiki ace. Ife tisafunikambo kuwangisira toera kucita pibodzi pyene.

18. Thangwi yanji tisafunika kukhala akupirira?

¹⁸ Cinthu cinango cidapfundza ife na pinthu pidacitikira Yuda, ndi kufunika kwa kukhala akupirira. Yahova ndzidzi onsene asakwanirisa mapikiro ace. Mbwenye midzidzi inango iye nee asacita pyenepi mu ndzidzi unadikhira ife na munjira inafuna ife. Atsogoleri akutoma a dzindza ya Izraeli nee abuluka mu dzindza ya Yuda. Mbwenye anthu a dzindza ya Yuda akhala akukhulupirika mbaphedzera ale akhadasankhulwa na Yahova toera kutsogolera mbumba yace (ninga Mose wakuti akhali wa dzindza ya Levi; Yoswa wakuti akhali wa dzindza ya Efraimu na Mambo Sauli wakuti akhali wa dzindza ya Bhenjamini.) Lero, tisafunikambo kuphedzera ale anasankhulwa na Yahova toera kutitsogolera.—Aheb. 6:12.

19. Mafala adalonga Yakobe kuna anace pikhali iye dhuzi na kufa asatipfundzisanji thangwi ya Yahova?

¹⁹ Tisapfundzanji na mafala akumalisa adalonga Yakobe kuna anace akulu anai? Tisapfundza kuti “Mulungu nkhabe kuona pinthu ninga munapionera munthu.” (1 Sam. 16:7) Yahova ndi wakupirira na wakulekerera kakamwe. Ndimomwene kuti Yahova nee asatawirisa pinthu pyakuipa, mbwenye iye nee asadikhirambo kuti atumiki ace acite pinthu ninga aungwiro. Iye anakwanisa kupasa nkhombo ale akuti akhadacita madawo makulu mbatcunyuka mbatoma kucita pinthu pyadidi. Mu nsolo unatowera, tinapfundza mafala adalonga Yakobe kuna anace anango.