“Akucenjera Ninga Nyoka Na Akuona Ntima Ninga Nkhangaiwa”—Mphangwa zino zabuluswa mu Anuário das Testemunhas de Jeová de 2015
Republika Dominikana
Tsamba 111-116
‘Yezu ndi Nsolo’
Mudamala kuthamangiswa amisionaryo, Donald Nowills, wakuti akhali na pyaka pinai pyakubatizwa na 20 pyakubalwa, asankhulwa toera kuyang’anira basa pa filiali. Maseze iye akhadatumikira ninga muyang’aniri wa cisa mu nthanda zakucepa, basa ya pa filiali ikhali ipswa kuna iye. M’bale Nowills akhali na ofesi yakucepeseka ku nyumba kwace, yakucitwa na matabwa, yakuphimbirwa na malata, pontho yakukhonda kusasanyirwa mwadidi pantsi. Iyo ikhali ku Gualey, cisa cakugopswa kakamwe ca Ciudad Trujillo. Na ciphedzo ca Felix Marte, iye adhinda marevista a Ncenjezi toera aphatisirwe mu dziko yawo yonsene.
Henrique mukhali iye nkaidi, nkazace anacemerwa Mary Glass, aphedza m’Bale Nowills. Mary alonga: “Ndikhakotoka ku basa ndzidzi 5 wakumaulo, mbandienda ku ofesi ya m’Bale Nowills toera kalemba Ncenjezi. Buluka penepo m’Bale Nowills mbadagumanya matsamba mu ntcini. Mulongo unango wa ku Santiago, wakudziwika na ‘anju,’ akhakwata marevista akudhindwa mbaaikha mu lata inabwera na mafuta akudya ya malitru 20. Buluka penepo iye akhagudumira marevista na nguwo padzulu pace mbaikhapo nfalinya, bambaya peno madhumbe. Padzulu pace akhathasikapo sakha ya khwekwe. Buluka penepo iye mbadakwira motokala kuenda ku mulolo kwa dziko mbasiya revista ibodzi na ibodzi m’mipingo yonsene. Anthu akhabwera mwakubwereza-bwereza toera kubwereka revista ineyi mbaipfundza ninga banja.”
Mary athimiza: “Tikhafunika kukhala akucenjera kakamwe, thangwi n’njira zonsene anthu a mautongi akhasaka mbuto ikhadhindwa revista ya Ncenjezi. Mbwenye iwo nee atigumana. Ndzidzi onsene Yahova akhatitsidzikiza.”
‘Akucenjera Ninga Nyoka Na Akuona Ntima Ninga Nkhangaiwa’
Pikhafunika kuti atumiki akukhulupirika a Yahova apitirize kutambira cakudya cauzimu mu ndzidzi wakutcingwa, mbwenye ukhali ndzidzi wakugopswa kwa alambiri andimomwene a dziko ineyi. M’pyaka pyenepi, abale azinji akhapitiswa nkaidi na kutongwa kukhala nkaidi ndzidzi uzinji.
Juanita Borges alonga: “Mudabatizwa ine mu 1953, ndikhapidziwa kuti ninga m’bodzi wa Mboni za Yahova, ndikhali pa ngozwi yakumangwa. Pyenepi pyacitikadi. Mu nthanda ya Bingu ya 1958, mudaenda ine kaona Mulongo Eneida Suarez, apolixa acibisobiso abwera mbatitunizira kuti tikhacita misonkhano. Tamangwa mbatitongwa kukhala nkaidi nthanda zitatu na tikhafunika kulipa kobiri yakukwana 100—yakuti mu ndzidzi unoyu ikhali sawasawa na madolare 100 a (E.U.).”
Utongi wayesera njira zonsene toera kukhondesa Mboni za Yahova kusonkhana, mbwenye abale akhapitiriza. Natenepa, iwo akhafunika kukhala ‘akucenjera ninga nyoka na akuona ntima ninga nkhangaiwa.’ (Mat. 10:16) Andrea Almanzar asakumbuka: “Toera kugumanika pa misonkhano, tikhafunika kufika ndzidzi wakusiyana. Pakukotoka, kazinji kene tikhabuluka mwakudembuka toera anthu akhonde kunyingwa.”
Jeremias Glass, abalwa mu ndzidzi ukhali babace Leon nkaidi na akhala m’mwazi mphangwa mu 1957 mukhali iye na pyaka pinomwe pyakubalwa. Iye asakumbuka misonkhano ikhacitwa mwacibisobiso panyumba pawo na gaxugaxu akhacita iwo toera akhonde kumangwa. Jeremias alonga: “Anyakubvesera onsene akhapaswa citsamba cakukhala na numero inapangiza ndzidzi wace wakubuluka pakukotoka. Misonkhano ingamala, babanga akhandiikha pa nsuwo toera kuona numero ya tsamba ya munthu na kutsogolera ale anabuluka toera aende awiri-awiri na njira zakusiyana.”
Tikhacitambo gaxugaxu mukusankhula kucita misonkhano mu ndzidzi wakuti ngozwi ya kuphatiwa ikhali yakucepa. Mwacitsandzo, Mercedes Garcia apfundza undimomwene na yavu wace, Pablo Gonzalez. Mukhali iye na pyaka pinomwe pyakubalwa, mama wace alowa mu ndzidzi wakuti babace akhali nkaidi, mbasala okhene iye na abale ace apfemba. Mercedes abatizwa mu 1952 mukhali iye na pyaka pipfemba pyakubalwa. Toera kucalira kumangwa, abale acita nkhani ya ubatizo ndzidzi 3 na hafu wakumacibese. Nkhani yacitwa pa nyumba ya m’bale, buluka penepo anthu abatizwa mu Nkulo Ozama. Mercedes alonga: “Ife tabwerera kunyumba mu ndzidzi 5 na hafu wakumacibese mukhalamuka kwene anyakuendekana athu.”