Mianmar
Matsamba 104-105
Yahova Andipasa Manyerezero Mapswa
WILSON THEIN
CAKA CAKUBALWA 1924
CAKA CAKUBATIZWA 1955
MBIRI YACE Mamuna unoyu wakuti akhali mbava, awangisira kakamwe toera kucinja umaso wace, cincino asatumikira ninga mpainiya wakupambulika mu pyaka 54.
MPIKHAKHALA ine mphale, ndapfundza maxoko, kumenyana, na kumanga ndale. Pyenepi pyandicitisa kukhala na umaso wauphanga, na waukali. Pikhakhala ine na pyaka 19, ndikhacita khundu ya nsoka ukhaba na mpfuti. Buluka penepo, ndaphatwa mbanditongwa kuikhwa nkaidi mu pyaka pisere, mwenemu ndatoma kunyerezera pinthu pyakuipa pikhacita ine mu umaso wanga mbandiphembera kazinji kene. Muntima mwanga, ndikhafuna kakamwe kudziwa pizinji thangwi ya Mulungu.
Pidabuluswa ine nkaidi, ndaenda kakhala ku Yangon, mbanditoma kugumanika pa misonkhano ya Mboni za Yahova. Na ciphedzo ca kupirira kwa abale azinji, mu kupita kwa ndzidzi, ndathema toera kubatizwa.
Pakumala kubatizwa, ndapitiriza kuwangisira toera kupangiza makhaliro Acikristu. (Aef. 4:24) Ndikhali na cipendamiro ca kusumula anango, pontho kazinji kene ndikhaipirwa na iwo. Ndikhafuna kukhala munthu wa makhaliro adidi kakamwe, mbwenye nee ndikhakwanisa kutonga mabvero anga. Ndikhaona ninga nkhabe kwanisa cinthu, natenepa, midzidzi inango ndikhaenda ku nkulo mbandilira m’midzidzi mizinji.
Mu caka 1957, ndakhazikiswa ninga mpainiya wakupambulika. Pakutoma ndatumikira ku cisa ca Mandalay. Kweneku ndaphata basa pabodzi na misionaryo anacemerwa Robert Richards, wakuti akhali ninga baba kwa ine. Iye andipfundzisa kuona makhaliro adidi mwa anthu, na kudzindikira mwakucepeseka kusowa kwanga ungwiro. (Agal. 5:22, 23) Ndzidzi onsene ukhaipirwa ine, ndikhadembetera kuna Yahova toera andipase “manyerezero mapswa, manyerezero akuwanga” akutsogolerwa na ntendere. (Sal. 51:10) Yahova atawira maphembero anga, mukupita kwa ndzidzi, makhaliro anga acinja.
Mukupita kwa ndzidzi, ndapfundza na mamuna wa pyaka 80 pyakubalwa wakuti akhali wa uphemberi wa Batista. Anthu a gereja yace mwakuipirwa andipambizira kuti “ndikhaba” mabira awo. M’bodzi wawo andithusa na mpeni mbalonga mwakuipirwa: “Ndi madawo kupha munthu?” Ndikhabva kuipirwa muntima mwanga. Mwakucimbiza ndaphembera mwaciwerewere kuna Yahova, buluka penepo ndatawira mwakukhurudzika na mwacinyindiro, “Tawirani imwe.” Iye anyinyirika, buluka penepo mbaenda. Ndapereka takhuta kuna Yahova thangwi ya kundiphedza toera kukhala wakukhurudzika. Mamuna wakugwesera akhapfundza na ine Bhibhlya abatizwa mwakukhonda dembuka, iye apitiriza kukhala wakukhulupirika mpaka kufa kwace.
Mu pyaka pizinji, ndatumikira mu pisa pyakukwana 17 ninga mpainiya wakupambulika, mbandiphedza anthu akukwana 64 toera kupfundza undimomwene. Ndinganyerezera udidi onsene unandicitira Yahova, maso anga asadzala na misozi yakukomerwa. Iye aphedza mphale wauphanga, waukali na wakutsukwala toera kukulisa makhaliro mapswa a ntendere.
[Cithundzithundzi pa tsamba 4]
Ndikhaona ninga nkhabe kwanisa cinthu, natenepa, midzidzi inango ndikhaenda ku nkulo mbandilira m’midzidzi mizinji