Yahova Asatiphedza Kukwanirisa Mabasa Athu—Mphangwa izi zabuluswa mu Anuário das Testemunhas de Jeová de 2013

Nyanmar (Burma)

Tsamba 102 ndima 1

Kumwaza Mphangwa na Kupfundzisa mu Burmese

Athumburuzi anewa akutoma agumana pinentso pyakusiyana-siyana. Naygar Po Han, acita khundu ya muyang’aniri wa nsoka wa athumburuzi mu ndzidzi wakuti Ba Oo nee akhakwanisabve kucita basa ineyi. Iye asakumbuka: “Macibese na masikati ndikhaphata basa toera kutsalakana banja yanga. Na masiku, ndikhathumburuza marevista mpaka tcititciti, ndikhaphatisira luju yakukhonda gaka mwadidi. Nakuti nee ndikhadziwa mwadidi Cingerezi, kazinji kene ndikhadodomeka. Mbwenye tikhafuna kakamwe kuti marevista athu agawirwe kwa anthu azinji.” Mudaphemba Robert Kirk kuti Doris Raj athumburuze A Sentinela mu cilongero ca Burmese, iye adzudzumika kakamwe mbatoma kulira. Doris Raj alonga: “Mapfundziro anga a xikola akhali akucepa, pontho nee ndikhali na luso yakuthumburuza. Mbwenye m’bale Kirk andiwangisa toera kuyesera. Natenepa, ndacita phembero kuna Yahova mbinditoma kuthumburuza.” Lero, kwapita pyaka cifupi 50, Doris akupitiriza kutumikira ku Beteli ya Yangon ninga nyakuthumburuza. Naygar Po Han, wakuti ali na pyaka 93, akupitirizambo ku Beteli mu kuphedza mabasa a Umambo wa Mulungu na phinga ibodzi ene.

Tsamba 111 ndima 3, mpaka tsamba 112 ndima 2

Kuthimizirika mu Cisa ca Chin

Mudabuluka Than Tum mu cisa ca Hakha, Donald Dewar, mpainiya wakupambulika wa pyaka 20 apita pa mbuto yace. Nakuti anyakubala a Donald, Frank na Lily Dewar (kale akhacemerwa Lily May), akhadamala kubuluswa mu cisa ceneci, m’bale wace Samuel wa pyaka 18 aenda kakhala pabodzi na iye. Donald alonga: “Tikhakhala mu nyumba ing’ono ya mazinku, yakuti ikhapisa kakamwe m’malimwe, pontho ikhathondola mu ndzidzi wa khoni. Mbwenye, kwa ine cinentso cikulu kakamwe cikhali kutsoperwa. Kazinji kene ndikhabuluka ndekha m’basa ya m’munda, pontho nee ndikhalonga mwadidi Chin Hakha, cilongero ca cisa ceneci. Basi ene, ine, Samuel na amwazi mphangwa awiri tikaenda ku misonkhano. Ndadzakhala wakutsukwala kakamwe mbindinyerezera kusiya upainiya.

“Mu caka ceneci, ndaleri mphangwa zakutsandzayisa mu Anuário zikhalonga pya kukhulupirika kwa abale a ku Malawi, ngakhale atcingwa mwakuipa kakamwe.a Ndabvundzika: ‘Khala ine nkhabe kwanisa kupirira kutsoperwa ndinakwanisa tani kupirira kutcingwa?’ Buluka penepo, ndaphembera kuna Yahova thangwi ya pinthu pikhandidzudzumisa, ndatoma kupibva mwadidi. Pontho ndawangiswa kubulukira mu kuleri na kunyerezera mwacidikhodikho Bhibhlya na misolo inango ya A Sentinela. Mwakukhonda dikhira, pidacedzerwa ine na Maurice Raj pabodzi na O’Neill, pikhali ninga ndikhaona aanju awiri! Mwapang’ono pang’ono ndakhala pontho wakutsandzaya.”

Mu kupita kwa ndzidzi, pikhatumikira iye ninga muyang’aniri wa cisa, Donald aphatisira cakugumana naco cace toera kuwangisa abale mu pisa pyakutali na mizinda. Kuwangisira kwace kwabweresa maphindu mazinji mu cisa ca Hakha, cakuti lero ciri na mpingo wakuwanga, pontho kusacitwa misonkhano ya cisa, yakupambulika na ya gawo mwakukhonda phonya. Amwazi mphangwa awiri akhagumanika pa misonkhano ya mpingo mu cisa ca Hakha, Johnson Lal Vung na Daniel Sang Kha, adzakhala apainiya akupambulika aphinga, pontho aphedza kumwaza mphangwa zadidi m’mbuto zizinji za cisa ca Chin.

[Cidzindikiro capantsi]