Yahova Angakhonda Kumanga Nyumba, Anyakumanga Asaphata Basa Papezi (Sal. 127:1) Mphangwa izi zabuluswa mu Anuário das Testemunhas de Jeová de 2013
Tsamba 148 ndima 4, mpaka tsamba 150 ndima 3—MIANMAR
Pakhafunika Ofesi Ipswa Ya Filiali
Pa ndzidzi unoyu, abale akhadacinja ofesi ya filiali ikhagumanika pa Nseu 39 mbaenda kakhala panyumba ya ndzulu ya maandare mawiri pa mbuto ya mametru akukwana pikwi piwiri pya ulaphi na pya ugugumi mu Nseu wa Inya, mu cisa cadidi kunkwiriro kwa nzinda. Mbwenye, nyumba ipswa ineyi nee ikhalibve na mbuto yakukwana. Viv Mouritz, adacedzera Mianmar ninga Muyang’aniri anacedzera Mafiliali, asakumbuka: “Piwalo pyakukwana 25 pya banja ya Beteli akhaphata basa mwakunentseka. Nee akhali na fugau. Mulongo m’bodzi akhaphikira pa fugau ing’ono yakuti ikhaphata basa na magesi. Pontho nee akhali na ntcini wakufula nguwo: mbwenye mulongo m’bodzi akhafula na manja. Abale akhafuna kugula fugau ibodzi na ntcini wakufula nguwo, mbwenye pikhanentsa kakamwe kupita napyo mu dziko eneyi.”
Mwakukhonda penula, abale akhafuna kakamwe ofesi ikulu ya filiali. Natenepa, Mathubo Akutonga atawirisa kubodola nyumba ya ndzulu ya maandare mawiri toera kumanga inango ya maandare manai, yakuti mbidakhala na makwartu akugona na maofesi. Mbidzati kutoma basa, pakhali na mipingizo mizinji toera kuikunda. Wakutoma, pakhafunika kutawiriswa na misoka mitanthatu ya utongi. Waciwiri, anyakumanga nyumba apacisa nee akhadadzolowera kumanga nyumba mbaphatisira utale, natenepa, nee mbadakwanisa kuphata basa. Wacitatu, abale akuperekeka a madziko akunja nee mbadakwanisa kupita mu dziko. Pakumalisira, pyakumanga napyo nee pikhagumanika mu dziko ineyi, pontho nee mbadakwanisa kubweresa pyakumanga napyo pya kunja kwa dziko. Basa ikhali yakunentsa. Mbwenye abale anyindira Yahova. Mbidakhala kuti ndi cifuno ca Yahova, filiali ipswa mbidamangwa!—Sal. 127:1.
‘Nee Na Mphambvu, Mbwenye Na Nzimu Wanga’
Kyaw Win, wa Departamento Jurídico ya filiali, alonga: “Tsamba ya phembo ya alvará toera kumanga nyumba yapita m’misoka mixanu mwa mitanthatu ya utongi, kuphatanizambo Ministério dos Assuntos Religiosos. Mbwenye, Comissão de Desenvolvimento da Cidade de Yangon, yalonga kuti nyumba ya maandare manai ndi yakulapha kakamwe, natenepa yakhonda phembo yathu. Tacita pontho phembo mbakhonda. Komiti ya Filiali yandiwangisa toera kupitiriza kucita phembo. Natenepa, ndacita phembero mwakuwanga kuna Yahova buluka penepo ndatumiza pontho tsamba kacitatu mbitawirwa!
Buluka penepo, taenda ku Ministério de Imigração. Kweneku, anyautongi atidziwisa kuti anthu akunja anakwanisa kupita na phaso toera kumala ntsiku zinomwe ninga anyakufuna kuona dziko. Mbwenye mudafokotoza ife kuti anyakupereka anewa akunja kwa dziko akhali na maluso adidi, pontho kuti mbadakwanisa kupfundzisa anyabasa apacisa toera kukhala na maluso akumanga nyumba, iwo atipasa maphaso akhatawirisa kumala nthanda zitanthatu!
“Buluka penepo, taenda ku Ministério de Comércio, kweneku tapangwa kuti basa yakubweresa pinthu pyakunja yakhondeswa. Mbwenye pidafokotoza ife ntundu wa nyumba ikhafuna ife kumanga, iwo atipasa phaso yakutawirisa kubweresa pinthu pyakumanga napyo nyumba pya ntengo wakupiringana miliyau ibodzi ya madolari. Ndiye tani kulonga pya nsonkho wakutawirisa kubweresa pinthu pya madziko akunja? Taenda ku Ministério das Finanças mbatitawiriswa kubweresa pinthu mwakukhonda kulipa nsonkho. Mu njira zenezi na zinango, takwanisa kuona kunyindirika kwa mafala Mulungu: ‘“Nee na mphambvu ya anyankhondo, nee ya utongi, mbwenye na nzimu wanga,” alonga Yahova wa anyankhondo.’”—Zak. 4:6, Tradução do Novo Mundo.