Ife Tisafudza Pinthu Pyakulikha Kakamwe
1 M’piaka madzana mazinji, mu kuphatisira pipfunziso pyaunthawatawa na unyengereri, Sathani asanyengerera mitima na manyerezero a anthu azinji. Iye asamwaza pipfunziso ninga Utatu, kukhonda kufa kwa moyo na infernu ya moto. Iye asacitisa anthu kupenula kukhalapo kwa Nciti na kuacitisa kupenula khala ndi Mulungu adalembesadi Biblya peno nkhabe. Kusankhula ntundu wa khanda na kudzikuza kwa madzinza ndi pidzudzumiso pinango pinacitisa anthu kukhonda kutawira undimomwene. (2 Akor. 4:4) Kodi tinakwanisa tani kufudza pikhulupiro pyenepi pyakulikha?—2 Akor. 10:4, 5.
2 Mabvero Aphatanizwa: Pikhulupiro pyakale kakamwe pyauphemberi kazinji kene pisaphataniza mabvero a mu ntima wa munthu. Anango apfunziswa pinthu pyaunthawatawa kutomera mu uwana wawo. Towera kuphedza anthu anewa, ife tisafunika kulonga mu njira yakuti isapangiza cilemedzo ku maonero awo.—1 Ped. 3:15.
3 Ife tinakwanisa kupangiza cilemedzo kwa anthu anewa, mu kuatawirisa kulonga pinakhulupira iwo na thangwi yanji. (Tgo. 1:19) Panango iwo asakhulupira kakamwe kuti moyo nkhabe kufa thangwi iwo aluza anyakufunika awo mu kufa na asafuna kuaona pontho. Panango iwo asakumbuka mafiriyadu thangwi asakomerwa na miyai yakukhala pabodzi na mabanja awo. Kubvesera pinalonga iwo kunadzatiphedza towera kudziwa pinanyerezera iwo na kutiphedza towera titawire mu njira yadidi.—Mis. 16:23.
4 Sangizirani Yezu: Yezu apereka citsanzo cadidi kakamwe kwa ife mudatawira iye mibvunzo ya mamuna wakudziwa mwadidi Mwambo. Yezu hadampanga pikhafunika iye kucita tayu, thangwi mbadampanga panango iye mbadakhonda thangwi yakuti pikhulupiro pyenepi pikhadalikha mu ntima mwace. Mbuto mwace, Yezu atculula Malemba, mbamphemba kuti alonge maonero ace, na kumphedza kunyerezera mu kuphatisira nsangani.—Luka 10:25-37.
5 Mafala a Mulungu anakwanisa kucitisa anthu kusiya kukhulupira manyerezero auphemberi waunthawatawa. (Aheb. 4:12) Kufokotoza mwakupirira undimomwene kunakwanisa kucitisa mitima ya anyakubvesera athu kucita pinthu na ife tinakwanisa kuphedza anthu kucalira unthawatawa na kutawira undimomwene wakuti unakwanisa kuacitisa kukhala aufulu.—Jwau 8:32.