Khalani Mbumunyerezera Ntsiku Ya Yahova

¹ ‘Ntsiku ikulu ya Yahova iri duzi. Iri duzi, na ikucimbiza kakamwe.’ (Sof. 1:​14, Tradução do Novo Mundo) Sofoniya na alembi anango a mabukhu 12 akumalisa a Malemba Acihebere akhakhala mbanyerezera ntsiku ya Yahova. Kudinga pyakulembwa pyawo pyakupumirwa pa Pfunziro yathu ya Bukhu ya Mpingo ninga munapangizwa ipyo m’bukhu yakuti Viva Tendo em Mente o Dia de Jeová kunadzatiphedza kukhala akukhunganyika pa ntsiku ineyi yakugopswa.​​—⁠Sof. 2:​2, 3.

² Makhundu Akupambulika: Mbuto mwa kugomezera mabvekero aciphiphiriso peno a vesi na vesi a mafokotozero a mabukhu anewa 12 aciprofesiya, bukhu yakuti Dia de Jeová isafokotoza kuti pyakulembwa pyenepi pyakupumirwa pisaphata tani basa m’makhaliro a umaso wandimomwene unathimbana na ife ntsiku zonsene. Iyo isagomezera kuti thangwi yanji tisafunika kukhala akudziwa kucimbiza kwa ndzidzi m’pisankhulo na m’pyakucita pyathu pyonsene. Pinthu pya umaso wa banja, uxamwali na anyakukhulupira anzathu, kusankhula ubalangazi, utumiki wathu na kusankhula basa pisadingwa.

³ Khundu 1 ya bukhu isatipanga pya aprofeta 12 na pyakulembwa pyawo. Kodi iwo akhali ani? Kodi ndi api makhaliro ali na ife lero akuti iwombo akhali nawo mu ntsiku zawo? Khundu 2 isadinga makamaka pya Yahova na makhaliro ace. Kodi ndi udziwisi upi na umunthu wa ntundu wanji wa Yahova unalongwa na aprofeta anewa? Khundu 3 isalonga makamaka pya makhaliro athu ene na matsalakaniro athu anthu anango. Kodi tinakwanisa tani kukomeresa Yahova mu umaso wathu wa ntsiku na ntsiku? Khundu 4 isafokotoza kuti tinakwanisa tani kukhala mwakutsanzaya munadikhira ife ntsiku ya Yahova.

⁴ Khunganyikani Cincino Towera Muphindule: Khalani akudzitonga cincino towera muphindule mwadidi na pfunziro ya bukhu yakuti Dia de Jeová, yakuti inadzatoma sumana 4 ya nthanda ya Malimwe ya 2008! Citani masasanyiro akugumanika pa Pfunziro ya Bukhu ya Mpingo masumana onsene. Khunganyani pfunziro ibodzi na ibodzi mwacidikhodikho, mbumuleri malemba towera kuona kuti iwo asabverana tani na mphangwa zinadingwa. Nyerezerani mwacidikhodikho mphangwa zenezi mu kubvunzika: ‘Kodi ndinaphatisira tani mphangwa zenezi pa nyumba, ku xikola, ku basa, mu utumiki wanga na m’matsalakaniro anga abale pabodzi na alongo anga Acikristu?’ Ndokoni ku pfunziro wakukhunganyika kuti mukatawire towera mukwanise kubalangazana.​​—⁠Arom. 1:⁠12.

⁵ Tikuphembera kuti kudinga kwathu bukhu yakuti Dia de Jeová kunadzatiphedza cincino towera tikwanise ‘kupirira’ ntsiku ‘ikulu na yakugopswa’ ya Yahova. Mwandimomwene ntsiku ineyi iri cifupi kakamwe!​​—⁠Yoele 2:​11.